1 Tesalonika 4 - Chipangano Chabwangu

Ubumi busekesha Lesa

¹ Pakulekelesha, mwe bawesu, tukomupapata pali nchi mwasambilile kuli fwebo ifyo muli nokwikala mukusekesha Lesa. Nachine efyo mukochita. Nomba tukomupapata nefiso fyonse muli Bashikulu Yesu Klistu ukuti mulundepo ukuchita mfi.

² Pakuti mulishibile ifilangililo twamupele ifyafumine kuli Bashikulu Yesu.

³ Icho Lesa akofwaya chakuti mube ababuta mumitima yenu. Emukuti mufume kubulale-lale.

⁴ Umuntu onse muli mwebo eshibe umwakwikalila nomukashi wakwe, munshila iiweme nakambi iyamuchinshi.

⁵ Teyalunkumbwapo kubati benafyalo abashamwishibapo Lesa.

⁶ Pali nchi umuntu uuli onse talingilepo kulufyanya nokubepa umunakwe. Kubati nimfilya twamukonkobeshe kale, Lesa akulandula bonse abakochita mfi.

⁷ Pakuti Lesa taatwitilepo ukuti twikale mukubifya iyowo, kuntu mukubuta.

⁸ Ekuti uyo onse uulengulula ukusambisha nku, takolengululapo muntu iyowo, kuntu Lesa uutupela Umupashi Wabuta.

⁹ Ukusosa pafyakutemwana abena Klistu, tanshilingilepo nokumulembela pantu Lesa umwine amusambishe ifyo muli nokutemwana.

¹⁰ Nachine mwalitemwana nabena Klistu banenu abali mu Masedoniya. Nomba, mwe bawesu, mulundepo ukuchita mfi.

¹¹ Esheni ukwikala mumutende. Uuli onse eshibe ifyakwe. Mubombeshe namaboko enu. Muchite mfi ukubati nimulya twamusambishe.

¹² Muli nji nshila, abashachetekela bakumupela umuchinshi, elo tamwakachebepo kumuntu umbi kufintu ifyo mukokabila.

Ukwisa kwaku Bashikulu

¹³ Mwe bawesu, tukofwaya ukumwebako pali mbalya abafwa ukuti mwilokusakamanapo ukubati nimulya abashikwete ukulolela mukubuka.

¹⁴ Tulachetekela ukuti Yesu alifwa nokubuka, nakambi munshila imo yenka tulachetekela ukwebati bo abafwile nechichetekelo muli Yesu, Lesa akubabusha nokubasenda pamo na Yesu.

¹⁵ Nomba kamwebe amashiwi a Bashikulu abene basosele kuli fwebo fwe bakuli abomi pakasuba Bashikulu bakwisa, tatwakatangililepo mbalya abafwa kale iyowo.

¹⁶ Kwakuba ukubilisha neshiwi lyamungeli umukulu, nechiwunda chepenga lyaku Lesa, na Bashikulu abene bakwisa ukufuma kumulu. Mbalya abafwile nechichetekelo muli Klistu ebakubuka pakubala.

¹⁷ Elo fwebo bakasanga tuli ababumi pali njilya nshita, twakupintwa pamo nabo mumakumbi mukukumanya Bashikulu mulwelele. Elo twakwikala na Bashikulu lonse.

¹⁸ Kanshi mukoseleshanye muli nga mashiwi.