1 Tesalonika 3 - Chipangano Chabwangu

¹ Ulo twafililwe, twalangulukile ukuba fwenka mu Atene.

² Emulandu wine twatumine Timoti, wesu nakambi umubomfi munesu uubilisha Ubutumi Bwawama ubusosa ifyaku Klistu. Twamutumine ukuti ese mukumukoselesha nokumwafwilishako muchichetekelo chenu.

³ Elo nokuti kwibapo nangu umo ungabwelela kunuma pamulandu wamachushi nga. Mwebene mulishibile ukuti amachushi aya mfi akochitika mukufwaya kwaku Lesa mwine.

⁴ Ulo twali namwe, twalimwebele libela ukuti tukaba namachushi. Nomba kubati ifyo mwayishiba, fikochitika ichine-chine.

⁵ Echo natumine Timoti kuli mwebo. Ulo nafililwe ukushipikisha, nalangulukile ukumutuma uko muli ukuti eshibe ifyo chaba ichichetekelo chenu. Natinine ukuti nangula Satana, kabepa, amubepele ukuti imilimo yesu yonse yakuba yabwaka.

⁶ Nomba Timoti alibwela nkuno. Alitushimikilako amashiwi aaweme aachichetekelo nokutemwa kwenu. Alitushimikila ukuti mukutemwa kwenu mulatwibukisha nokufwaya ukutubona kubati nimfilya tukofwaya ukumubona nafwe.

⁷ Pali nchi, mwe bawesu, mumafya namumachushi yesu onse, ukuchetekela kwenu kwatalalika imitima yesu.

⁸ Nachine tuli nobumi nga mwayimakana ndi muli Bashikulu.

⁹ Nomba kuti twamutotela shani Lesa pamulandu wakumwebo? Nachine tulitemenwe ukwinekantu muli Bashikulu pamulandu wakumwebo.

¹⁰ Nomutima onse tulalomba Lesa ukuti tukabonane namenso nokwisalundako kuli fyonse ififwayikwa kuchichetekelo chenu.

¹¹ Nkolomba ukuti Lesa Shifwe na Bashikulu wesu Yesu bateyanye inshila pakuti tufike kuli mwe.

¹² Bashikulu balundeko ukutemwana kwenu nokutemwa uko mukwete kubantu bonse ukubati ninku tukwete pali mwebo.

¹³ Echo Bashikulu bakoseleshe ukuti mube abaololoka nababuta ukufikapo kuli Lesa Bata, inshita Bashikulu Yesu Klistu bakwisa pamo nabasalwa babo.