1 Tesalonika 2 - Chipangano Chabwangu

Ifyamilimo yakwa Paulo mu Tesalonika

¹ Bawesu, mulishibile ukuti ukutandala kwesu takwali ukwabwaka iyowo.

² Mulishibile ifyo batuchushishe nokututukaula kubantu baku Filipi ulo tatulayisa ku Tesalonika. Nangu chali mfilya, kwali ukupusana ukwinekantu, na Lesa wesu alitukoseleshe ukuti tubilishe Ubutumi Bwawama ubwafuma kuli Ye.

³ Pakuba ifyo tukomusambisha tafipo mukufwaya ukumubepa nangula ukumulangulukila ifibi nangula ukutachenjeleka umuntu.

⁴ Pali nchi, tusosa ifyo Lesa afwaya inshita yonse pantu alitupingula ukuba abenenene nokubika umulimo wa Butumi Bwawama muli fwebo. Tatusekeshapo bantu iyowo, kuntu Lesa uwesha amalangulushi esu.

⁵ Ukubati nimfiya mwayishiba, tatwayishile kuli mwe namashiwi akumunasha nangu ayakwichingilila kubunkalwe bwesu iyowo. Lesa ekamboni wesu.

⁶ Elo tatwalikufwayapo umuchinshi ukufuma kubantu nangu kuli mwebo nangu kubantu bambi.

⁷ Nga batumwa baku Klistu, twalingile ukumweba ukuti mutumfwe, lelo twayichefeshe ulo twali namwe ukubati nibanyina abakolela umwana wabo.

⁸ Twalimutemenwe ukwinekantu ichakuti twalipekenye ukwabana namwebo, te Butumi Bwawama bwaku Lesa bwenka iyowo, kuntu nobumi bwesu.

⁹ Nachine mukoyibukisha ifyo twalikubombesha ulo twali namwe. Twalikubomba akasuba nobushiku ukuti takupo bwafya kuli mwebo ulo twalikubilisha Ubutumi Bwawama ubufuma kuli Lesa.

¹⁰ Mwebo muli bakamboni pamo na Lesa ukuti ubumi bwesu ulo twali namwe bwali ubwapwililika, ubwaololoka, elo ubutakwetepo akalema nakambi bwalikusekesha Lesa.

¹¹ Mulishibile ifyo twalikulama umo na umo kubati niwishi uulama abana bakwe.

¹² Twalimukonkobeshe nokumutalalika imitima elo nokumukoselesha ukuti mube nobumi ubusekesha Lesa uyo uwamwitile ukuti mukenjile mu Bufumu bwakwe ubwabuleme.

¹³ Icho tutotelapo Lesa lonse nimukuti ulo mwaumfwile Amashiwi aku Lesa awo twamushimikile, mwaliyapokelela tekubati mashiwi amuntu iyowo, kuntu kubati nimfilya aaba, mashiwi aku Lesa. Amashiwi nga eyakopyunga umulimo muli mwebo abachetekela.

¹⁴ Bawesu, ifyamuchitikile nkulya efyachitikile namufilonganino fyaku Lesa ifyamu Yudeya. Abakaya benu bamuchushishe ukubati fintu bachilolo ba Bayuda bachushishe abena Klistu baku Yudeya.

¹⁵ Emba abayipeye Yesu Klistu nabasoseshi bakale pamo nafwebo. Mba bantu tabakosekeshapo na Lesa. Elo balapatana nabantu bonse.

¹⁶ Bo balikutukanya ukubilisha Ubutumi Bwawama kubenafyalo ukuti bapuluke. Mukuchita mfi bakoyilundilapo amabifyo abo, nobukali bwaku Lesa nomba bulifikile pali bo.

Paulo afwaya ukutandalila abena Tesalonika

¹⁷ Bawesu, ulo twamushile, nangu kali akashita kanini bwaka, twalikufwaya ukuti tubonane namwebo. Nangu twafumineko, imitima yesu yali kuli mwebo.

¹⁸ Echo twafwayile ukwisa bwangu kuli mwebo. Ina, nebo ne Paulo nalilwishishe ukubwelelamo mukwangufyanya, lelo Satana tekuti atulekepo.

¹⁹ Kanshi ulo bakwisa Bashikulu Yesu Klistu kumupwilo, ukulolela, ukusekelela elo nechilambu chesu fikafuma kwisa? Tepali mwebo?

²⁰ Pakuti ubukankala nokusekelela kwesu nimwe.