1 Petulo 5 - Chipangano Chabwangu

Ibumba lyaku Lesa

¹ Nomba ndinamashiwi kubafilolo abamuchilonganino pakati kenu, nebo nechilolo munabo. Ndimboni nakambi wamachusho aku Klistu. Elo nkolindilila ukupokelela umuchinshi uwakwisa kufisululwa.

² Beni bachembela bambelele shaku Lesa isho amupela. Tekumupatikishapo iyowo, kuntu mukutemwa kwenu, ngomo Lesa afwayila. Mwilokupyunga ngu mulimo pamulandu wakunonkelamo ububoni, kuntu nomutima uufwayilisha ukupyunga.

³ Mwibapo nga imfumu pabantu abo mukotungulula, kuntu mube ichibwenesho ichiweme kuchilonganino.

⁴ Nomba ulo Chembela mukulu akuboneka mwakupokelela ichilambu ichitafota ichamuchinshi.

⁵ Namwebo mwe balumbwana mulokumfwila abakulu. Elo bonse mube abayipekanya ukupyungilana mukuyichefya. Amalembo asosa ati, “Lesa alatalika abayikusha, kuntu alapela ubwanshi kubayichefya.”

⁶ Echo muyichefye pachinso chaku Lesa Uwafiso fyonse ukwebati panshita iilingile akamusumbule.

⁷ Tuleni fyonse ifimusakamika kuli Ye pakuba ekasunga wenu.

⁸ Mulokutekanya nokuba abayibukila, pakuti akapondo kenu Satana akoyendauka uku nauku nge nkalamo ibuluma iikofwaya uwakwikata.

⁹ Mulwishanye nakwe nokwimakana ndi muchichetekelo, pakuba mwibukishe ukuti abena Klistu banenu panonshi bakoumfwa ukufinya kwenka nku.

¹⁰ Nomba ulo mwaumfwa ukufinya pakanshita, Lesa uwabwanshi akumwimaka nakambi nokumubika pamufula uukosele, nokumukoselesha. Ewamwitile ukuti mwinjile mumuchinshi wakwe uutashilapo uuli muli Yesu Klistu.

¹¹ Kuli Ye kube umuchinshi umuyayaya. Ameni.

Umutende wakupelako

¹² Nalemba kalata nji iipi mukwafwilishiwa na Siluvanasi, wesu uwachetekelwa. Nkofwaya ukumukoselesha nokupela bukamboni ukwebati mbu ebwanshi bwaku Lesa. Mwimakane ndi mubwanshi mbu.

¹³ Abanenu abachilonganino chaku Babiloni bakomuposha umutende. Maliko uuli kubati mwana wanji naye akomuposha umutende. Muposhanye.

¹⁴ Poshanyenipo umutende muchitemweko ichinenene. Umutende kuli mwebo bonse mwe bali muli Klistu.