1 Petulo 4 - Chipangano Chabwangu

Ifyabumi bwabwangu

¹ Kubati nimfilya Klistu achulile mumubili, namwebo muyikoseleshe namalangulushi enka ngalya. Pakuba uuchula mumubili wakwe ekwebati alekana namabifyo.

² Echo ulo muchili nobumi panonshi, tamwakonkepo ukufwaya kwabuntunse, kuntu ukufwaya kwaku Lesa.

³ Pakuba akale mwaposele inshita mukwikala mumichitile iyo abatachetekela Lesa bafwaya ukuchita. Mwalikwenda mubusali, mulunkumbwa ulubi, mubuchakolwa, mubukabundulu, mufitala fyapabwalwa nokulomba tungosa wakubasa utwamuselu.

⁴ Nomba abantu batachetekela balashimbwa pakubona mwebo mwalileka ukuchita ifintu ifibipile ifyo bo basekelelamo. Echo bakomusuulila.

⁵ Mba bantu bakwisa londolola benka umulandu wabo kuli Lesa, uwayipekanya ukulubulwisha abomi nabafwa.

⁶ Echo Butumi Bwawama bwabilishiwe nokuli bo abafwa, ukwebati nangu bakapingulwe mumubili nga bantu, kuntu mumupashi babe nobumi kubati Lesa.

Abena Klistu babomfye ubupe bwaku Lesa

⁷ Nomba kumupwilo wafintu fyonse kwapalama. Echo mube abachenjela nokwikanya pakuti mulokulomba bwino.

⁸ Ichachilapo chakuti mulokutemwana ukufikapo pakuba ukutemwa kulafimba amabifyo ayenji.

⁹ Pakutandalilana mulokutebetelana ukwambula ukuyilishanya.

¹⁰ Chila muntu abomfye ubupe apokelele kuli Lesa mukwafwilisha banakwe. Mube kubati bakasunga ababomfya bwino ubupe bupusene-pusene ubufuma kuli Lesa.

¹¹ Nga umo abilisha, kabilisha wamashiwi aafuma kuli Lesa. Nga umo akopyunga, kapyunge nefiso ifyo Lesa amupela. Pakuti muli fyonse, Lesa achinshikwe muli Yesu Klistu. Pakuba umuchinshi nefiso fyakwe umuyayaya. Ameni!

Ukuchula pamulandu wakuba umwina Klistu

¹² Mwe batemwekwa, mwilokushimbwapo pakuponenwa namachushi awo mukochulako. Mwilanguluka kubati mwaponenwa icheni.

¹³ Mulokusangalala pantu mukochulako kubati ni Klistu ukwebati nga umuchinshi waboneka mukasangalale ukwinekantu.

¹⁴ Abantu kati bakomuchusha pamulandu weshina lyaku Klistu, ekwebati mwalishuka, pantu Umupashi wamuchinshi, Mupashi waku Lesa, walikala pali mwe.

¹⁵ Pesangwapo nangu umo pali mwebo ukochula pamulandu wakwipaya umuntu, nangu ukwiba, nangu ukuchita ichibi nangu ukwinjilila ifyabene.

¹⁶ Nomba nga mukochula pakuti muli bena Klistu, mwiumfwapo nsoni, kuntu muchinshike Lesa pamulandu weshina lyenu.

¹⁷ Nomba inshita yafika iyakuti Lesa apingule abantu bakwe. Nga ukupingulwa kwakutatikila pabantu bakwe, mba chakuba shani kuli bo abatomfwa Ubutumi Bwawama bwaku Lesa?

¹⁸ Amalembo asosa ati, “Nga chakuti abalungama bakupuluka mukuchuchutika, mba kumbifi ishitomfwilapo ifyaku Lesa chakuba shani?”

¹⁹ Echo abantu abachula pamulandu wakufwaya kwaku Lesa, bayipele kuli Kabumba wabo uuchetekelwa, nokuchita imilimo iiweme.