1 Petulo 3 - Chipangano Chabwangu

Abalume nabakashi

¹ Namwe mwe banakashi, nakilileni abalume benu, ukwebati nga kuli bamo abatomfwa Amashiwi aku Lesa, muleke imyendele yenu ibaalulule. Tapalingilepo ukusosa amashiwi,

² pakuti bakuyibwena benka ubwikashi bwenu ubuweme.

³ Ukuyiwamya kwenu kwibapo ukwakunse bwaka kubati kuluka imishishi, ukufwala ifya golide nefyakufwala ifyachindama.

⁴ Nomba ukuyiwamisha kwenu kube ukwamumutima mukati, ukuwamya ukutashilapo ukwamutima-nteka nowatalala. Ubumi bwamfi bwalichindama kumenso aku Lesa.

⁵ Pakuba efyo abanakashi bakale ababuta imitima nokuchetekela Lesa, baleyiwamisha. Elo balenakila abalume babo.

⁶ Efyo Sala alikunakila Abulahamu nokumwita ati, “Bashikulu wanji.” Echo namwe muli bana bakwa Sala nga mukochita ifyalungama ukwambula ukutina ichili chonse.

⁷ Namwebo mwe balume mulokwikala bwino nabakashi benu. Mulingile ukubachinshika pakuti bo bantu abatakosele. Elo mwakupokelela pamo ichabupe chabumi butashila icho Lesa akupela mubwanshi bwakwe. Mulokuchita mfi ukuti pebapo akakulesha ukulomba kwenu.

Ukuchula pamulandu wabulungami

⁸ Pakulekelesha nkoti beni abamutima umo, abomfwilana ubulanda. Temwanenipo nabawenu. Mube abamutima wankumbu nabayichefya.

⁹ Mwibweleshapo ububi pabubi bunakwe, nangula amatuka pamatuka. Nomba mwebo mubashukishe pakuba efyo Lesa amwitile mubwikashi mbu ukwebati mupokelele ukushukisha kwakwe.

¹⁰ Amalembo asosa ati, “Onse uufwaya ukutemwa ubumi, nokubona inshiku ishiweme, akanye ululumi lwakwe ukusosa ifibi, nemilomo yakwe ukusosa ubufi.

¹¹ Aleke ifibi, achite ifiweme. Afwayilishe umutende nokuukonka.

¹² Pakuba Lesa alachingilila abalungama, alakutika kukulomba kwabo. Nomba Lesa mukali kubachita ifibi.”

¹³ Mba ninani uungamuchitila ichibi nga muli abachinchila ukuchita ifiweme?

¹⁴ Nomba nangu mukoumfwa ukufinya pamulandu wakuchita ifiweme, mwakushukishiwa. Mwilokutinapo abantu nangu ukuchula mumutima.

¹⁵ Nomba mumitima yenu muchinshike Klistu pakuti ni Shikulu wenu. Mube abayipekanya inshita yonse ukwasuka mubufuke namumuchinshi abantu abamufumba ukulindilila kwenu.

¹⁶ Ikaleni nomutima uwabula akantu ukwebati abo abakomusuula pamulandu wamibele yenu iiweme muli Klistu mubanshe nsoni.

¹⁷ Chiweme ukumfwa ukufinya nga mukochita ichiweme, nga Lesa echo afwaya, ukuchila ukumfwa ukufinya pamulandu wakuchita ichibi.

¹⁸ Kubati Klistu naye alifwilile kamo pamulandu wamabifyo abantu bonse. Umuntu uwalungama alifwilile fwebo abatalungamapo ukuti atulete kuli Lesa. Alipayilwe kumubili, nomba alibushilwe kumupashi.

¹⁹ Mumupashi mwenka aliile ukushimika kumipashi iyali muchifungo.

²⁰ Mipashi njilya yabantu abataumfwile ulo Lesa alindilile nomutima wakushipikisha panshita Nowa alikupanga ingalaba. Mungalaba njilya abantu abanono bwaka, basano nabatatu, ebapulukile kumenshi.

²¹ Amenshi ngalya alipalana nolubatisho ulo shino nshiku lukomupulusha pamulandu wakubuka kwaku Yesu Klistu. Ukubatishiwa nku tekusambapo ifiko ifyapamubili, kuntu ukuyipela kuli Lesa nomutima wachine. Lulamupulusha ukupitila mukubuka kwaku Yesu Klistu kubafwa.

²² Yesu aliile mumulu. Ali kukuboko ukwamulyo ukwaku Lesa. Kwenka nkulya, abangelo, babuntungulushi nabafiso bakomunakila.