1 Petulo 2 - Chipangano Chabwangu

Ifyebwe ilyumi

¹ Echo posenipo ububi bonse, ubuchenjeshi bonse, bumbi-munda, mufimbila, nolwambo ululi lonse.

² Kubati tucheche utukofunga ibele, namwebo mufunge ibele ilinenene ukwebati umukushe nokumufikisha kuchipulusho.

³ Pakuba mwalisonda nokwishiba ubune bwaku Bashikulu.

⁴ Nomba iseni kuli Ye uuli libwe lyabumi ilyo abantu bakene, kuntu Lesa alisalile nokulichinshika.

⁵ Namwebo mwikale kubati mabwe awo Lesa akwimakilako inanda yakwe. Elo mubombe kubati bachipupila babuta ulo mupupila ifyabupe nomutima onse, ifyo Lesa atemwa ukupitila muli Yesu Klistu.

⁶ Pakuba Amalembo asosa ati, “Boneni nasala ibwe ilyachindama, nalibika mu Sioni nga libwe lyapachimfuntu. Uuchetekela taakoomfwepo insoni.”

⁷ Kanshi kuli mwebo mwe bachetekela ndi bwe lyaba ilyachindama. Nomba kubatachetekelapo lili kubati fintu Amalembo asosa ati, “Ibwe ilyo abakwimaka basulile, elyayishile kuba ilyapachimfuntu.”

⁸ Amalembo asosa nakambi ati, “Elyayishile kuba libwe lyakuyitutulako, ilyakuwisha abantu.” Balayitutulako pantu tabomfwila Amashiwi aku Lesa nga mfilya Lesa umwine apingwile kabela.

⁹ Pakuba mwebo muli umutundu uwasalwa, bachipupila ababufumu, umutundu wapatulika, abantu baku Lesa. Alimusalile ukuti mubilishe imilimo yakwe iiweme yaku ngulya uwamwitile ukufuma mumfishi nokwisa mukusanika kwakwe ukushimbwisha.

¹⁰ Akale tamwalipo abantu baku Lesa, kuntu nomba muli bantu bakwe. Akale tamwapokelelepo ubwanshi, kuntu nomba mwalibupokelela.

Ifyabapyungi baku Lesa

¹¹ Mwe batemwekwa, pakuti muli abalwendo panonshi, nkomupapata talamukeniko kufyalunkumbwa ulwamubili ifyo ifilwa namwe.

¹² Muchenjele nefyo mwikala nabantu abatachetekela, ichakuti nangu basose ati imilimo yenu mibi, kuntu babone ukuti iiweme. Elo bakuchinshika Lesa pakasuba ako akwishilamo.

¹³ Pamulandu waku Bashikulu, munakile abantu bonse babika ukuba bakateka. Nangu nikateka mukulu, pakuti akotungulula ishamfumu shimbi shonse.

¹⁴ Nangu nibakateka, banakililenipo pakuti batuminwe nakateka mukulu ukuti bapele umulandu abachita ububi nokutondayisha abachita ifiweme.

¹⁵ Pakuba Lesa akofwaya ati nemilimo yenu iiweme mutalalike ukusosa kwabatayishiba, ukwabantu abapuneme.

¹⁶ Ikaleni kubati bantu ababwanalale, kuntu mwiyalula ubwanalale bwenu ichakufimba pafibi fyenu. Ikaleni nga abapyungi baku Lesa.

¹⁷ Chinshikeni abantu bonse. Temwaneni abachetekela banenu. Mube abantu batina Lesa. Chinshikeni nakateka mukulu.

Ifyakuchula kwaku Klistu

¹⁸ Mwe bapyungi, umfwileni bo abamulembele umulimo. Tebo benka abaweme, kuntu nabankalwe kumo.

¹⁹ Pakuba chiweme nga umuntu, pamulandu wakulanguluka Lesa, akoshipikisha pakuchushiwa ifyo talingile.

²⁰ Mba chilambu ndo mungabwenamo kati bakomupama pamulandu wakubifya kwenu? Nomba nga mukoshipikisha ukupamwa pakuti mwachita ichiweme, ekwebati mwachita ichisekesha Lesa.

²¹ Ubwikashi mbu ebo Lesa amwitile. Pakuba Yesu naye alyumfwile ukufinya pamulandu wenu. Elo amushilile ichibwenesho ukuti mukonke.

²² Ye tabifishepo nangula ukusosa ubufi.

²³ Ulo abantu balikumusalula, tabalandwilepo iyowo. Ulo bamuchushishe, Ye tabachushishepo, kuntu abikile fyonse kuli Lesa uupingula umulinganya.

²⁴ Klistu umwine apitile ifibi fyesu mumubili wakwe pamutashi, ukwebati kububi tube abafwa, kuntu pakukonka mubike umutima onse mukuchita ifilungeme. Mwaposhiwe kufibenga fyaku Klistu.

²⁵ Pakuba mwali kubati imbelele ishalubile, kuntu nomba mwabwelela kuli chembela uukosunga ubumi bwenu.