1 Kolinto 9 - Chipangano Chabwangu

Ifyo umutumwa alingile ukupokelela

¹ Napo nshilipo muntungwa? Napo tanshilipo umutumwa? Napo nshamubwenepo na Yesu Shikulu wesu? Te mwepo ifitwalo pamulimo napyungila Bashikulu?

² Nangu tanshilipo umutumwa kuli bambi, kuntu kuli mwebo ndi mutumwa pakuti muli ichishibilo ichabutumwa bwanji muli Bashikulu.

³ Ifyo nkoyasuka abakochita ifitala pali ne nimfi:

⁴ Napo tatulingilepo ukupokelela ifyakulya nefyakunwa?

⁵ Napo tatwasuminishiwa ukuya nabakashi besu bachina Klistu pabulwendo bwesu ukubati nimfilya abatumwa banesu bachita nabawabo baku Bashikulu na Kefasi?

⁶ Napo nine na Banabasi fwenka abalingile ukuyipyungila ukuti tusange ifyo tatukwetepo?

⁷ Napo eko aba umushilikali uuyilipila enka mumulimo wakwe? Mba ninani uungabyala ifitwalo ukwambula ukufilyako? Napo kuli chembela wamukuni uutanwako umukaka kumukuni wakwe?

⁸ Mwati nkososa mfi kumano abantunse? Napo Amafunde taasosapo fyenka?

⁹ Pakuba tupenda mu Mafunde akwa Mosesi ati, “Wilokukakapo akanwa kantungu ulo shikonyanta tiligu.” Napo nipamulandu wang’ombe epala Lesa akosakamanapo, bayi?

¹⁰ Napo takososapo mfi kuli fwe? Nachine fyalilembwa pamulandu wapali fwe pakuti umulimi nowakutwa bonse balalindila ukuti bakupokako kufyo babombele.

¹¹ Nga fwebo twalibyala ifiweme ifyakumupashi pakati kenu, nomba tatungapokapo shani kuli mwe ifyo tubulisha mubumi bwesu?

¹² Kati bambi balilingile ukupokelelako mfi, napo fwebo tatwachilapo pali bo? Nomba insambu nshi tatwashibomfeshepo iyowo. Twalishipikishe ukutina ati twinganenusha abantu munshila iili yonse ukuti bapokelele Ubutumi Bwawama ubusosa ifyaku Klistu.

¹³ Kanshi tamwishibilepo ukuti bapyunga munanda yaku Lesa, balya ififuma munanda njilya? Napo tamwishibilepo ukuti abapyungila pachipupililo balaakana ifyachipupo?

¹⁴ Chimo chine Bashikulu balipingula ati abashimika Ubutumi Bwawama bakulya ukufuma mukushimikila Ubutumi bo.

¹⁵ Echo nebo nshabomfeshepo insambu nshi. Elo tanshikolembelapo kalata nji ukufwaya ukubomfya insambu nshi. Nomba kuti nafwa bwaka muchifulo chakuti umo afumye icho njitakishapo.

¹⁶ Nomba nga nshikobilishapo Ubutumi Bwawama, apo penka nshikwetepo apakuyitutumuna, pakuti Bashikulu ebanjebele ukuchita mfi. Ishamo kuli ne nga nshikobilishapo Ubutumi Bwawama mbu.

¹⁷ Nga chakuti nkobomba umulimo ngu mukuyipela, ekuti nakupokelelapo amalipilo. Nomba nkobomba pakuti mfwile ukubomba, pakuba Bashikulu ebampele ukuchita mfi.

¹⁸ Nomba ichilambu chanji nindo? Ala, ninchi ichakwebati ndokubilisha Ubutumi Bwawama ukwambula amalipilo nokutalindila ukupokelela ifyalinga mukubilisha Ubutumi mbu.

¹⁹ Ndimuntungwa, tenepo musha wamuntu uuli onse. Nomba nayilengele umusha wabantu bonse ukwebati nonke abenji.

²⁰ Ku Bayuda njikala nga Muyuda ukwebati nonke Abayuda. Kubakotungululwa na Mafunde, ndekala kubati nibo ukwebati mbanonke.

²¹ Kuli bo abashikwetepo Amafunde, ndekala kubati nibo ukwebati mbanonke. Te kwebati nshikwetepo Amafunde aku Klistu.

²² Kubanaka muchichetekelo, ndekala kubati nibo ukwebati mbanonke. Kubantu bonse ndekala kubati nibo ukwebati nonkepo bambi pali bo.

²³ Fyonse mfi ndafichita pamulandu wa Ubutumi Bwawama ukuti nandibo mpokelele nabo ishuko ilya Butumi mbu

²⁴ Napo tamwishibilepo ukuti bonse balachimfyanya mulubilo, kuntu umo eupokelela ichilambu? Echo ukubutuka kwenu kube ukwakupokelela ichilambu.

²⁵ Uuli onse uuchimfyana mulubilo alayikanya kuli fyonse. Ye alachita mfi ukuti apoke ingala iyonayika, nomba fwe tulachita ukuti tukapokelele ingala iitashila.

²⁶ Echo nebo nshibutukapo ichibutuke-butuke iyowo. Elo nshilipo ukubati muntu uuposa amakofi ichipose-pose.

²⁷ Ndachusha umubili wanji ukuti unakile. Nshikofwayapo ukuti nga nashila ukushimikila bambi, nebo nkafwilwe ukupoka ichilambu.