1 Kolinto 8 - Chipangano Chabwangu

Ifyakulya bapupila tungasa wakubasa

¹ Nomba nkofwaya ukwasuka pamulandu mwanembele wafyakulya bapupilila tungosa wakubasa. Nachine bonse tulikwete amano, nomba amano enka alenga umuntu ukuyitutumuna. Ichitemweko echimaka.

² Umuntu uwilanguluka ukuti alishibapo ifintu, ekwebati tafishiba ukufikapo.

³ Nomba umuntu uwatemwa Lesa, alishibwa na Lesa.

⁴ Nomba pamulandu wafyakulya ifyo bapupila tungosa wakubasa, tulishibile ukuti tatukwetepo akantu. Elo tapapo Lesa umbi, sembi umo enka.

⁵ Nangu kwaba abetwa balesa kumulu nangu panonshi, icho benji, nabashikulu nabo benji.

⁶ Nomba fwebo tulikwete Lesa umo epela. Shifwe uwapangile ifintu fyonse. Muli Ye emo tukwatilemo ubumi. Tuli na Bashikulu bamo benka, Yesu Klistu. Lesa alengele fyonse ukupitila muli Ye. Elo nafwe tuli obomi pamulandu wakwe.

⁷ Nomba te bonsepo abeshibile mfi. Bambi balibelesha ukupupa tungosa wakubasa. Ukufika nanduno nga balya ifyo bapupila tungosa wakubasa, balanguluka ukuti ichakulya nchilya chapelwa kutungosa wakubasa. Nomba pakuti kampingu wabo uunakile, elo bayilanguluka ukuba abakowela kuchakulya nchi.

⁸ Nachine ichakulya tekuti chitufikishepo kuli Lesa iyowo. Nga tatulilepo, tatulufyapo akantu nangu kamo iyowo, nakambi atwalya tatusangamo akantu nangu kamo iyowo.

⁹ Nomba muchenjele ukuti ubuntungwa mukwete bwiba ichipunwisho kuli bo abatakosa muchichetekelo chabo.

¹⁰ Nga chakuti umo akubona webo uwayishiba ubuntungwa ubo ukwete ukoya munanda yakulombelamo tungosa wakubasa, napo nchi tekuti chimupelepo insambu shakulya ifyo bapupila tungosa wakubasa?

¹¹ Echo umuntu ngu uwanaka, wenu, akuloba pamulandu wakwishiba kobe. Wachita mfi kuli wobe uwo Yesu afwilile pamulandu wabuntungwa bobe.

¹² Ulo mubifisha bawenu munshila nji, nokubifisha abanaka imitima, mukobifisha Klistu.

¹³ Echo nga ichakulya chalenga wesu ukubifya, tekutipo ndye inama, ukutina ati ningawisha wesu.