1 Kolinto 7 - Chipangano Chabwangu

Amafumbo pamulandu wafyupo

¹ Nomba nkofwaya ukwasuka pamulandu uwo mwanembelepo. Chiweme umwalalume ukutopa.

² Nomba pamulandu wakutina ubuchende, umwalalume onse abe nomukashi wakwe, nomwanakashi naye abe nomulume wakwe.

³ Umulume achitile umukashi wakwe ifilingile, elo umukashi naye alingile ukuchita mumo mwenka kumulume wakwe. Chila umo pali bo afikilishe ubufwayo bwamunakwe.

⁴ Umukashi tatungululapo umubili wakwe, kuntu umulume wakwe. Fyenkefyo umulume tatungululapo umubili wakwe, kuntu umukashi wakwe.

⁵ Mwilokutananapo, sembi ulo mwaumfwana panshita inini ukuti muyipele mukulomba. Elo panuma twalilileni ukwikala pamo nga baupana ukuti Satana emwesha pamulandu wakukangilwa ukushipikisha.

⁶ Nasosa mfi ukumupandako amano te mukumupela ifunde iyowo.

⁷ Nga chaliweme ukuti mwebo mwapalana nandibo, nomba Lesa apele chila muntu ichabupe chakwe, umbi ichamfi, naumbi naye ichamfilya.

⁸ Nomba kubashimbe nefyokolo nkobeba ati chiweme ukuti bekale bwaka ukwambula ukupa ukubati ifyo ndi.

⁹ Nomba nga chikobakanga ukushipikisha, chiweme ukupa ukuchila ukunyeka kulunkumbwa.

¹⁰ Kuli bo abali mufyupo ifunde lyanji ilikofuma kuli Bashikulu lyakuti umukashi ebenga umulume wakwe.

¹¹ Nomba nga afumako, ekale uwambule kupwa nangu bawikishanye nomulume wakwe. Munshila imo yenka, umulume naye talingilepo ukubenga umukashi wakwe.

¹² Kuli bambi nkososa, (Nebo te Bashikulu iyowo,) ukuti umwina Klistu uwaupa umwanakashi uutachetekela muli Yesu Klistu, naye umwanakashi asumina ukwikala nakwe, umulume wakwe emubengapo iyowo.

¹³ Umwanakashi umwina Klistu naye nga ali nomulume utachetekela, elo umulume ngulya asumuna ukwikala nakwe, talingilepo ukumubenga iyowo.

¹⁴ Pakuti umulume uutachetekela alashuka pamulandu wamukashi wakwe uwachetekela. Naye umukashi utachetekela chimo chenka pamulandu wamulume wakwe uwachetekela. Nga tachali mfi abana ababa abakunse, kuntu nomba bana baku Lesa.

¹⁵ Nomba uutachetekela kati akofwaya ukubenga umwina Klistu, kamubenge. Nga chaba mfi, umulume uwachetekela nangu umukashi takakwapo. Pakuba Lesa alimwita ukuti mwikale mumutende.

¹⁶ Napo we mwanakashi wachetekela, kuti wayishiba shani ukuti wakwisa kupulusha umulume obe? Na we umwalalume uwachetekela, kuti wayishiba shani ukuti wakwisa kupulusha umukashi obe?

Ifyakwitwa na Lesa

¹⁷ Umuntu onse alingile ukwikala nobumi ubo Lesa amwitilemo. Mfi efyo nkoeba abantu bonse abamufilonganino.

¹⁸ Nga umuntu balimwita ali uwashilimunwa, talingilepo ukufisa ifishibilo. Chimo chine nga Lesa alikwita taulashilimunwa, taulingilepo ukushilimunwa.

¹⁹ Ukushilimunwa nangu ukutashilimunwa takwalulapo kantu. Ichikulu kulama Amafunde aku Lesa.

²⁰ Umuntu onse alingile ukuba ifyo ali ulo Lesa amwitile.

²¹ Napo wali umusha ulo Lesa akwitile? Wilokusakamanapo. Nomba nga wasanga ubuntungwa, bupokelele.

²² Pakuba umuntu uwali musha ulo bamwitile Bashikulu, ye muntungwa wa Bashikulu. Chimo chine, uwali umuntungwa naye bamwitile, musha waku Klistu.

²³ Lesa alimushitile pamutengo uukulu. Echo mwiba abasha babantu.

²⁴ Echo bawesu umuntu onse alingile ukwikala pachinso chaku Lesa ukubati ifyo ali ulo ayitilwe.

Amepusho ambi ayafyupo

²⁵ Pamulandu waku bo abataupwa, tanshikwetepo ifunde ukufuma kuli Bashikulu, kuntu nkomweba amalangulushi anji ngoyo Bashikulu bakwatile ichisa ichakuti mbe uwachetekelwa.

²⁶ Pamulandu wamachushi aaliko nshino nshiku, nkolanguluka ukuti umuntu ekale fyenka ifyo ali.

²⁷ Napo walyupa? Wibengapo iyowo. Napo uli nkungulume? Wilangulukapo ukupa.

²⁸ Nomba nga waupa taukobifyapo iyowo. Umwansungu uutayishibapo umwalalume naye nga aupwa, tabifishepo iyowo. Nkofwaya ukumufumyako bwaka kumachunshi ayo abaupana bakwata.

²⁹ Icho nkososa mwe bawesu chakuti inshita ilishilile. Ukufuma pali nomba abaupa bekale kubati bataupapo.

³⁰ Bo abalila iminsoshi, babe kubati tabakolilapo, abasekelela babe kubati batakosekelelapo, abashita babe kubati tabakwetepo akantu nangu kamo.

³¹ Elo abo ababomfya ifyamuno chalo, bebikapo amalangulushi abo pali mfyo. Pakuba ichalo chapanonshi nemibonekele yachiko tachakabelelelepo inshita iitali.

³² Nkomweba ukuti mwilokusakamikwapo. Umwalalume uutaupa asakamana ifyaku Bashikulu, umo engabasekesha.

³³ Nomba umuntu waupa alapamfiwa nefintu fyapanonshi, kulanguluka ifyo angasekesha umukashi wakwe.

³⁴ Echo ekata kubili. Umwanakashi uutaupwa nangu uutayishibapo umwalalume, alapamfiwa ifyaku Bashikulu, ifyo angayipela kuli bo kumubili nakumupashi. Nomba umwanakashi uwaupwa alapamfiwa nefintu ifyapanonshi, ukulanguluka ifyo angasekesha umulume wakwe.

³⁵ Nkososa mfi ukwebati mwafwilisheko, te kwebati mukanye iyowo. Icho nkofwaya chakuti mulechita fyonse munshila ilingile. Elo ukwebati mwipele ukufikapo pakubombela Bashikulu.

³⁶ Nga umbi akolanguluka ukuti akokalifya umwanansungu uutayishibapo umwalalume uyo akobekele, ulo ye akotwalilila mukuteshiba umwalalume, elo umuntu ngulya atwalilila ukufwaya ukumupa, angamupa. Tabifyapo iyowo.

³⁷ Nomba nga umo, ukwambula ukupatikishiwa, alanguluka ukutopa umwanansungu ngulya naye achita ichiweme.

³⁸ Echo uwaupa umwanansungu ngulya, achita bwino. Nomba uwakana ukumupa achita bwino ukuchilapo.

³⁹ Umwanakashi alikakwa nefunde ulo umulume wakwe ali umumi. Nomba umulume nga afwa, ali nensambu ishakupwa kumwalalume umbi, nomba abe umwina Klistu.

⁴⁰ Nomba nkolanguluka ukwebati kuti asekelela ukuchilapo nga aikala ukwambula ukupwa. Pakuba nandibo ndikwete Umupashi waku Lesa.