1 Kolinto 6 - Chipangano Chabwangu

Imilandu pakati kabena Klistu

¹ Kati umuntu umo uwaku mwebo alinomulandu kumwina Klistu munakwe, kuti autwala shani kubantu bakunse nokusha abantu baku Lesa banakwe?

² Napo tamwishibilepo ukwebati abantu baku Lesa ebakwisa kupingula abapanonshi? Nomba nga nimwe abakupingula abantu bonse, mwingafwilwa shani ukupingula utumilandu tunini?

³ Napo tamwishibilepo ukuti twakwisa kupingula abangelo? Nga kanshi kuti chamukanga shani ukupingula imilandu yapanonshi?

⁴ Nomba nga muli nemilandu yamfi, napo kuti mwaya kupingulwa kubantu abatalipo akantu muchilonganino?

⁵ Ukuba nkososa mfi ukuti mwashe nsoni. Napo pali mwe tapapo nangu umo uwamulangwe uungapingula imilandu pakati kabena Klistu banakwe?

⁶ Mba nindo nga umwina Klistu umo akopela umulandu umwina Klistu munakwe mutwala umulandu ngu kubatachetekelapo ukuti bamulubulwishe?

⁷ Apo mukopelana imilandu pakati kenu, chikoyalula ukuti chamukanga kale. Nindo tekuti mulekefye balokumubifisha bwaka? Napo tekuti chiwamepo abantu bambi balokumwibila?

⁸ Nomba mwebo emukobifisha bambi, elo mulebebila nangu bo bena Klistu banenu.

⁹ Napo tamwishibilepo ukuti imbifi tashakabonepo ubufumu bwaku Lesa? Mwilokuyibepapo, abachende, abalomba tungosa wakubasa, inchechemeshi, abaulungana nabalalume banabo,

¹⁰ bang’o, bakabundulu, bachakolwa, abansele, nangula utupondo tabakenjilemo mubufumu bwaku Lesa.

¹¹ Bambi muli mwe efyo bali kale. Nomba mwalisambwa kububi nokuba abana baku Lesa. Lesa alimulungamika ukupitila mwishina lyaku Bashikulu Yesu Klistu no Mupashi waku Lesa.

Bomfyeni imibili yenu mukuchinshika Lesa

¹² Umuntu umbi kuti asosa ati, “Ifintu fyonse fyalisuminishiwa kuli nebo.” Ina, nomba tefyonsepo ifiweme. Kuti nasosa ati, “Fyonse fyalisuminishiwa kuli nebo.” Nomba nalikana ukuti ichintu ichili chonse chinteke ubusha.

¹³ Umbi naye kuti asosa ati, “Ichakulya chamumala, namumala mwachakulya.” Nangu chibe mfi, Lesa wakufyonaula fyonse fibili. Umubili tewakuchitilako ubuchende iyowo, wakubomfiwa mukupyungila Bashikulu. Echo Bashikulu ebene bamubili ngo.

¹⁴ Lesa abushishe Bashikulu kumfwa, elo ewakwisa kubusha nafwe kufiso fyakwe.

¹⁵ Napo tamwishibilepo ukuti imibili yenu filundwa wamubili waku Klistu? Napo nakubula ifilundwa fyamubili waku Klistu nakufilundanya kuwabuchende? Nangu panini.

¹⁶ Napo tamwishibilepo ukuti umuntu nga aulungana nomwanakashi wabuchende basanguka umubili umo? Pakuba Amashiwi aku Lesa alisosa ati, “Mba babili bakuba umubili umo.”

¹⁷ Nomba uwilundanya kuli Bashikulu balaba umo na Bashikulu mu Mupashi.

¹⁸ Talamukeni kubuchende. Pakuti ukubifya kumbi umuntu achita kwaba kunse yamubili, nomba umuntu uuchita ubuchende, abifya nomubili wakwe kumo.

¹⁹ Napo tamwishibilepo ukuti umubili wenu ninanda ya Mupashi Wabuta? Lesa amupela Umupashi ngu ukwebati wikale muli mwe. Echo ubumi mukwete tebwenupo.

²⁰ Lesa alimushitile pamutengo uukulu. Echo muchinshike Lesa nemibili yenu.