1 Kolinto 5 - Chipangano Chabwangu

Ifyabuchende muchilonganino

¹ Chalyumfwika mpanga yonse ukuti pali ubulale-lale pakati kenu ubo nabantunse tekuti bachitepo. Chikoumfwika ukwebati banyika bakoulungana nomwana wakusanga munanda.

² Nga kuti mwayitutumuna shani? Mulingile ukumfwa insoni mwebene nokutamfya pakati kenu uukochita mfi.

³ Echo nangu nshili pamo namwe, kuntu ndi uko namwe mumutima wanji. Echo namupingula akale umuntu ngu uwachitile mfi, ukubati ndi namwebo pamo.

⁴ Ulo mwalongana mwishina lyaku Bashikulu Yesu, nadibo ndi namwe mumutima nefiso fyaku Bashikulu Yesu filipo,

⁵ mulingile ukuposa ngu muntu kuli Satana ukuti umubili wakwe ukonayike, pakuba umupashi wakwe ukapulushiwe pakasuba kaku Bashikulu.

⁶ Ukuyitutumuna kwenu takuwemepo! Napo tamwayishibapo insoselo iyakuti, “Utwamimena utuche tututumuna ichamufuba chonse.”?

⁷ Fumyenipo ichimena ichakale ichabubi ukuti mube umufuba uwabwangu. Elo mwakuba umufuba wabwangu kubati nimfilya muli. Pakuti Klistu, Umwana Wambelele wesu uwa Chakulya Chakuchilila, alipayilwe kale nga ipupo.

⁸ Echo katusekelele ukusefya nku ukwambula ichimena ichakale nchilya ichabubi nokubipa ukwamutima, kuntu nemifuba iitatutumuka, mukuwama umutima nokwebesha

⁹ Muli kalata njilya namulembele, nalimwebele ukuti mwipangapo ichibusa nabo abachita ubuchende.

¹⁰ Nshikososapo ati mwilokumfwanapo nabantu abapanonshi ababulale-lale, bakabundulu, utupondo nangula abakulomba tungosa wakubasa. Nga chali mfi, nga mwalifumine kale panonshi.

¹¹ Nomba nalimulembele ukuti mwipangapo buchibusa nomuntu uusosa ati mwina Klistu, kumbi akochita ubuchende, kabundulu, uulomba tungosa wakubasa, uwansele, chakolwa, nangula umung’o. Umuntu uwaba mfi, tamulingilepo nangu ukulya pamo nakwe.

¹² Napo mukoyebati mulimo wanji ukupingula abakunse? Napo te bo abali muchilonganino mulingile ukupingula?

¹³ Lesa eupingula abakunse mbalya. Echo Amalembo asosa ati, “Mufumyenimo umuntu umubi uyo pakati kenu.”