1 Kolinto 4 - Chipangano Chabwangu

Abatumwa baku Klistu

¹ Mwebo mulingile ukutubona nga bapyungi baku Klistu abasontwa ukwangalila ifyafisama fyaku Lesa.

² Nomba ichilingile kubasontwa kuba abachishinka kuli shikulu wabo.

³ Nebo tekuti nsakamanepo nangu panini ukupingulwa kuli mwebo nangula kumulingo wabuntunse. Elo tekuti njipingulepo nenka iyowo.

⁴ Ukuba mumutima wanji tamupo umulandu nangu umo. Nomba nangu chibe mfi, tanshikososapo ati ndiwakayele. Bashikulu benka ebampingula epala.

⁵ Echo mwipingulapo umuntu nangu umo ulo Bashikulu batalafika. Bo ebakwisa kusanikila fyonse ifyamubumfisolo ifyamumfishi. Elo akufisulula ifyamufinsolo nokufisulula amapange aafisama ayamumitima yabo. Panuma chila muntu akupokelela ukutonda kuli Lesa ukulingana nemilimo yakwe.

⁶ Mwe bawesu, mfi ifyo nkososa fyaku nebo na Apolosi. Nkofwaya ukwebati mfi fimusambishe amashiwi ngalya akososa ati, “Mulokuchishapo ifyo Amalembo akososa.” Echo muyitutumwina pali umbi nokusula munakwe.

⁷ Mba ninani uwakupele ubukulu pali bambi? Napo fyonse wakwata tafyafumapo bwaka kuli Lesa? Webo wapelwe bwaka, mba kuti wayitutumuna shani kubati tawapelwepo bwaka?

⁸ Napo mulikwete kale fyonse ifyo mukabila! Echo muli bachindami ukuchila fwebo. Nga chiliweme amuba bakankomba ukwebati nafwe tutungulule pamo namwe.

⁹ Elo nkobona ukuti fwebo abatumwa, Lesa alitubika kumpelo kwine kubati bantu bapingwila ukufwa. Twaaluka kubati chakubwenako kufyatalwa fyonse, tekubantu bwaka, kuntu nakubangelo bonse.

¹⁰ Pamulandu waku Klistu, fwebo bakotulanguluka ukuba abapuneme, elo mwe abamulangwe muli Klistu. Mwaliba abanaka, kuntu mwebo muli abafiso! Muli abachindama, nomba ifwe tuli abasulwa.

¹¹ Ukufika nanduno tulachula kunsala nakuchilaka. Elo twalisapula nokupumwa tulapumwa. Nokuchilapo tuseuluka bwaka.

¹² Tulapyunga imilimo namaboko esu. Ulo bantu batulapisha, fwebo tulabalombela kuli Lesa ukuti abashukishe. Ulo batuchusha, fwebo tulashipikisha.

¹³ Ulo abantu batubepesha, fwebo tulaasuka nomutembo. Nanomba tuli kubati fiswaswa fyamuno chalo, nabantu bonse batubona kubati fisoso.

¹⁴ Tanshikomulembelapo mfi ukumwansha insoni, kuntu ukuti muchenjesheko bwaka pakuti muli bana banji abatemwekwa.

¹⁵ Nangu mungakwata abakusambisha amakana ikumi mubwina Klistu bwenu, tekuti mukwatepo bawishinwe abenji iyowo. Pakuba muli Klistu, nabele wishinwe pamulandu wakumushimikila Ubutumi Bwawama.

¹⁶ Echo nkomupapatila ukuti mulokutenteka nebo.

¹⁷ Pamulandu ngu namutumina Timoti, umwana wanji uwatemwekwa nakambi uwachetekela muli Bashikulu. Ye akumwibukisha ifyabumi bwanji muli Klistu, ubo nsambisha mufilonganino fyonse.

¹⁸ Bambi bakoitutumuna ukubati nshakesepo kuli mwebo.

¹⁹ Nomba nga Bashikulu batemwa nakwisa bwangu kuli mwe. Penkapo nakwishiba ifiso fyaku bo abakoyitutumuna, temukusosa kwabo bwaka.

²⁰ Pakuba ichikulu mubufumu bwaku Lesa temashiwi bwaka, kuntu imilimo.

²¹ Mba chindo mukofwaya? Napo nkese kuli mwebo nechembya nangula nomupashi wakutemwa nokutekanya?