1 Kolinto 3 - Chipangano Chabwangu

Abapyungi baku Lesa

¹ Elo nebo, mwe bawesu, nshasoselepo kuli mwe nga bantu abali no Mupashi Wabuta. Nalisosele namwe nga bantu abatakwetepo Umupashi Wabuta. Nalisosele kubati bantu abatemwa ifyapanonshi, nga incheche mubwina Klistu.

² Nalimunwishe umukaka, techakulya ichikosele, pantu tamwafikilepo. Nanduno tamulafikapo.

³ Muchili abantu bwaka. Pali mwe pachili umufimbila nefitala. Napo mfi tafikomushininapo ukwebati muchili abantunse? Napo tamukoyikalapo nga bantu bapanonshi

⁴ Ulo musosa ati, “Nebo ndiwakwa Paulo,” naumbi ati, “Nebo ndiwakwa Apolosi,” tamukolanga ukuti muli bantunse?

⁵ Mba Apolosi ninani? Mba Paulo naye ninani? Bapyungi bwaka abaku Lesa abaletele Ubutumi Bwawama kuli mwebo ubo mwachetekele. Umo-umo muli fwebo apyungile bwaka umulimo uyo Bashikulu bamupela.

⁶ Nebo nabyele imbuto, Apolosi ayitilile, kuntu uwashimeneshe ni Lesa.

⁷ Echo uubyala nowitilila tapapo ifyo bali, kuntu Lesa uufikusha eukwetepo akantu.

⁸ Umuntu uubyala nowitilila balilingana. Echo Lesa akulambula umo-umo pali bo ukulingana nomulimo uwo apyungile.

⁹ Pakuba fwebo tuli abapyungi baku Lesa, mwebo muli ibala lyakwe Elo muli nanda yaku Lesa.

¹⁰ Ukubomfya ichabupe icho Lesa ampele, nalibombele umulimo nga inchenshi mukwimaka nokuwamya umufula, elo umbi akoyimakapo. Nomba umo naumo alingile ukuchenjela umo emakila.

¹¹ Pakuba Lesa alibika kale Yesu Klistu ukuba emufula enka. Elo tapapo umufula naumbi uwo bangabika.

¹² Pali ngu mufula umuntu kuti ayimakapo nagolide, silubale, amabwe ayamutengo uukulu, ifiti, isani nangu namapelele.

¹³ Pakuba umulimo wamuntu wakuboneka apatubile tuutu ulo akasuba kabupingushi kakuyilanga. Akasuba nkalya kakwisa nomulilo. Elo umulilo ngulya wakwisa kwesha imilimo yamuntu uuli onse.

¹⁴ Kati ifyo umuntu ayimakile pamufula atafipilepo kumulilo, uwakwimaka ngulya akupokelela amalipilo.

¹⁵ Nomba nga fyalala kumulilo, takapokepo amalipilo. Nomba ye akupuluka, lelo kubati apuluka bwaka mumulilo.

Umuntu ninanda yaku Lesa

¹⁶ Napo mwebo tamwishibilepo ati muli inanda yaku Lesa, nokuti Umupashi waku Lesa wikala muli mwe?

¹⁷ Nomba nga umuntu umo aonaula inanda yaku Lesa, naye Lesa akumonaula. Pakuti inanda yaku Lesa yaba iyapatulika, elo inanda njilya nimwe.

¹⁸ Mulokuyibepapo. Nga umuntu umbi pali mwe akoyilanguluka ukuba uwamulangwe, ukusosa pafintu ifyapanonshi, alingile ukuboneka nga uupuneme ukwebati aaluke uwamulangwe.

¹⁹ Pakuti umulangwe wabantu uwapanonshi uupuneme pachinso chaku Lesa. Chili kubati nimfilya Amalembo asosa ati, “Lesa akekata abamulangwe wabuntunse mubuchenjeshi bwabo,”

²⁰ Pambi chalilembwa ati, “Bashikulu balishibile ukuti amalangulushi ayabamulangwe abwaka.”

²¹ Echo kwibapo nangu umo uwakwitutumwina kumuntu bwaka. Ifintu fyonse fyenu,

²² Paulo, Apolosi na Petulo, ichalo, ubumi nemfwa, fyonse ifilipo nafyonse ifikoyisa. Fyonse mfi fyenu,

²³ elo mwebo muli baku Klistu, Klistu naye waku Lesa.