1 Kolinto 2 - Chipangano Chabwangu

Ifyo Paulo ashimikile pali Klistu

¹ Bawesu, ulo nayishile kuli mwe ukwebati musambishe ifyafisama ifyo Lesa afisulwile, nshasoselepo kubati uwamulangwe, uwayishiba ifyashika.

² Pakuba ulo nali pali mwe, nshalikufwayapo ukwishiba akantu akali konse, kuntu Yesu Klistu enka nemfwa yakwe iya pamutanshi.

³ Ulo nayishile kuli mwe nali uwabunake nakambi uwatutuma ukwinekantu nomwenso.

⁴ Echo ulo nalikusosa nangula ukushimika, nshasoselepo amashiwi aamulangwe, ukufwaya ukukoboola wabuntu iyowo, kuntu nabalangile nechishibilo ichafiso fyaku Mupashi Wabuta.

⁵ Nalichitile mfilya ukwebati mwichetekelapo pamulandu wamulangwe wabantu, kuntu kufiso fyaku Lesa.

Umulangwe uufuma ku Mupashi Wabuta

⁶ Nomba pabantu abashika tusosa ifyamulangwe, kuntu temulangwepo uwabuntunse iyowo nangula uwantungulushi shamuchalo nshi ishiloba.

⁷ Umulangwe uwo tusosa waku Lesa, uwamubumfishi, uwafisama ukufuma kubantu. Lesa talatala ichalo, apekenye kabela ukuti atupele ubuleme.

⁸ Tapapo bakateka banchino chalo abayishibe umulangwe ngu. Nga balishibile, nga tabasamikilepo Bashikulu ababuleme pamutashi.

⁹ Chabati nimulya Amalembo asosa ati, “Ifyo umuntu atabwenepo nangu ukumfwa, ifyo umuntu atalangulukilepo ukuti chakuchitika, echo Lesa apekanishishe abo abamutemwa.”

¹⁰ Fwebo Lesa alitufisulwila mfi ukupitila mu Mupashi Wabuta. Pakuti Mupashi ngu ewayishiba ifintu fyonse ukufikapo nefyashika ifyaku Lesa.

¹¹ Napo kuli uwingeshiba amalangulushi amuntu ukuchila umwine? Munshila imo yenka tapapo umuntu uwingeshiba amalangulushi aku Lesa, sembi Umupashi wakwe umwine.

¹² Fwebo tatwapokelelepo umupashi wapanonse iyowo, kuntu twapokele Umupashi Wabuta uwafuma kuli Lesa, ukwebati ese twafwilisheko ukumfwisha ifyo Lesa atupele bwaka.

¹³ Kanshi ifyo tusosa, temashiwipo amulangwe wabantu, kuntu mashiwi awo Mupashi Wabuta atusambisha. Tusambisha ifyachine ifyamupashi kubantu abakwata Umupashi Wabuta.

¹⁴ Umuntu uutakwetepo Umupashi Wabuta tomfwapo ififuma ku Mupashi ngu. Kuli ye fipuneme. Elo tekuti afyumfwikishepo pakuti fishibikwa bwaka kumuntu uukwete Umupashi Wabuta.

¹⁵ Umuntu uukwete Mupashi Wabuta angeshiba ukuwama nokubipa kwafintu fyonse, elo tapapo uungamutalikapo.

¹⁶ Kubati nimfilya Amalembo asosa ati, “Mba ninani uwishibile amalangulushi aku Bashikulu? Ninani uwingalanga Bashikulu ifyakuchita?” Nomba fwebo tulikwete amalangulushi aku Klistu.