1 Kolinto 16 - Chipangano Chabwangu

Ubupe bwabantu baku Lesa

¹ Nomba pamulandu wafyabupe ifyakwafwilisha abachetekela, muchite kubati nimfilya naebele ichilonganino chaku Galatiya.

² Pakasuba kakwamba akamulungu, uuli onse pali mwe alingile ukupatulapo ichabupe, ukulingana nefyo akwete. Mfi atale asunge kumwakwe, ukwebati pekabapo ukusangula ulo nakwisa.

³ Ulo nakwisa kuli mwe, nakwisa tuma abo mukasala nokubapela amakalata ayalondolola pali bo ukwebati bakatwale mfi fyabupe ku Yelusalemu.

⁴ Kati chakulinga ukuti nandibo nkaye nabo, chiweme nakwisa kuya nabo.

Paulo apinga ifyakuchita

⁵ Nakwisa kuli mwe panuma yakupita mu Masedoniya, pakuba nakubala ukupitanamo mu Masedoniya.

⁶ Nalimo nakwikalako kuli mwe akashita kanini, nangula inshita yonse yamwela. Nkofwaya ati panuma mukangafwilisheko pabulwendo bwanji ukuli konse uko nakuya.

⁷ Pakuba tanshikofwayapo ukumubwena mulupita iyowo, kuntu nkofwaya ati nkakokoleko nga Bashikulu batemwa.

⁸ Nomba nakwikala mu Efeso ukufikila neshita yapa Pentekosite.

⁹ Pakuba nkuno uko ndi kuli ishuko ilikulu ilyakupyungilako ifikulu, nangu abalwani benji.

¹⁰ Nga Timoti ayisa kuli mwe, mulingile ukwikala nakwe mumutende, ukwambula ichakumutinya pantu apyungila Bashikulu kubati nine.

¹¹ Kanshi pebapo nangu umo uwakumutinya. Mukamushikisheko mumutende pakubwelela kuli nebo. Pakuba nkomulindila pamo nabawesu bambi.

¹² Pamulandu waku wesu Apolosi, nalimukoseleshe ukwebati pamo nabawesu bambi, ese kuli mwe mukumupempula. Nomba ye talikufwayapo ukwisa. Nga akwata inshita, akwisa.

Amashiwi akumupwilo

¹³ Mulokuba abayibukila, abakosa muchichetekelo. Koseni elo mube abafiso.

¹⁴ Fyonse ifyo mukochita, mulokufichitila mukutemwa.

¹⁵ Mwe bawesu, mwalishiba ati Sitefanasi nabamunanda yakwe ebakwamba ukuchetekela muchalo cha Akaya. Elo balipele mukubombela abantu baku Lesa.

¹⁶ Echo nkomupapata bawesu ukuti mulokumfwila abantu bamfi, elo na onse uupyunga umulimo mukuyipela pamo nabo.

¹⁷ Nkosekelela ukuti Sitefanasi, Fotunatusi na Akayakasi, pakuti nebo nangu tanshilipo namwe, bo bakochita kubati benjile muchifulo chesu.

¹⁸ Balinsangulushako kubati nimfilya bamusangulushisheko namwe. Abantu abamfi mulingile ukubapela umuchinshi.

¹⁹ Ifilonganino fyamu Asiya fikomuposha umutende. Akwila na Pulisila, pamo nechilonganino ichikumanina munanda yabo, bakomuposha umutende bonse, abena Klistu banenu.

²⁰ Bawesu bonse bakomuposha umutende. Poshanyenipo umutende wine-wine uwabwina Klistu

²¹ Nebo Paulo nalemba nokuboko kwanji amashiwi nga ayakwebati, “Mutendepo mwane.”

²² Kati palipo umuntu uutatemwapo Bashikulu, alapishiwe. Maranatha! Bashikulu wesu, iseni!

²³ Ubwanshi bwaku Bashikulu Yesu bube namwe.

²⁴ Ukutemwa kwanji kube namwebo bonse muli Klistu Yesu. Ameni.