1 Kolinto 15 - Chipangano Chabwangu

Ukubuka kwaku Yesu

¹ Mwe bawesu, nkofwaya ukumwibukishapo Ubutumi Bwawama ubo namushimikileko. Mwali bupokelele nokwimakaninapo ndi muchichetekelo chenu.

² Lesa akumupulusha ukupitila mu Butumi Bwawama mbu kati mukosunga bwino amashiwi akwe kubati nimfilya namwebele. Achatali mfi, ukuchetekela kwenu nga kwali kwabwaka.

³ Pakuba amashiwi aakulu ayo namusambishe eyekayo nandibo napokele. Amashiwi nga yakwebati Klistu afwilile amabifyo esu kubati ifyo Amalembo asosa.

⁴ Alishikilwe mumanda, mukasuba kalenga shitatu alibukile kubafwa kubati ifyo Amalembo asosa.

⁵ Elo alibonekele kuli Petulo nakubatumwa ikumi na babili mbalya.

⁶ Panuma abonekele kuli bawesu imyanda isano nokuchilapo panshita imo. Abengi muli bo epobali, nangu bambi balifwile kale.

⁷ Ukufumapo abonekele kuli Yemusi nakubatumwa bonse.

⁸ Pakupelako abonekele kuli nebo nangu nali kubati muntu ngulya uutafyelwepo bwino.

⁹ Pakuba ndi umunono pabatumwa bonse. Tanshilingilepo nokwitwa umutumwa pakuti nalikuchusha ichilonganino chaku Lesa.

¹⁰ Nomba pakuti Lesa alinkwatile ubwanshi, ndi kubati ifyo ndi. Elo ubwanshi bwakwe bwapangilepo akantu muli ne pakuti nalibombele imilimo ukuchila pabatumwa bonse. Nomba tenepo uwabombele, kuntu ubwanshi bwaku Lesa ubukobombela muli ne.

¹¹ Nomba kati chafumine kuli ne nangu kuli bo, mfi efyo bonse tushimikila, nakambi efyo mwachetekela.

Ukubuka kubafwa

¹² Nomba pakuti tukoshimika ukwebati Klistu alibukile kubafwa, mba nindo bambi muli mwe bakoebela ati, “Abantu abafwa tabakabukepo?”

¹³ Nga abafwa tabakabukepo, ekwebati Klistu naye tabukilepo kubafwa.

¹⁴ Nomba nga Klistu tabukilepo kubafwa, ekwebati ukushimika kwesu kwabwaka, elo nokuchetekela kwenu takupo akantu.

¹⁵ Nga fili munshila nji, ekwebati nifwe imboni shabufi pafyaku Lesa. Pakusosa ati Lesa abushishe Klistu kubafwa. Nga chachine ukwebati abafwa tabakabukepo, ekwebati Lesa tamubushishepo Klistu.

¹⁶ Echo nga abafwa tababuka, ekwebati Klistu tabukilepo kubafwa.

¹⁷ Elo nga Klistu tabamubushishepo, ekwebati ichichetekelo chenu tachilipo kantu, elo muchili mububi.

¹⁸ Penkapo nabo abafwile bakochetekela muli Klistu, baliluba.

¹⁹ Nga twashintilila ukuchetekela kwesu muli Klistu pamulandu wabumi mbu bwenka, epela nifwe bamwansha nsoni ukuchila abantu bonse.

²⁰ Ukubako Klistu alibuka kubafwa. Pakati kabonse abafwa, ewakwamba ukubuka kubafwa.

²¹ Pakuti imfwa yayishile panonshi ukupitila mumuntu umo, echo nokubuka kubafwa kwayishile ukupitila mumuntu umo.

²² Ukubati fintu abantu bonse bafwa pamulandu wakwa Adamu, efyo abantu bonse bakubuka kubumi pamulandu waku Klistu.

²³ Ukubako umuntu onse akubuka panshita yakwe: Uwakwambilapo ni Klistu, elo panshita yakwisa kwakwe abantu bakwe nabo bakwisa kubuka kubafwa.

²⁴ Elo umupwilo wachalo wakwisa. Klistu akushilisha ubufumu bonse, ubutungulushi bonse, elo nefiso fyonse. Akupela ubufumu mbulya kuli Lesa Bata.

²⁵ Pantu Klistu alingile ukutungulula ukufika akuchimfya abalwani bakwe bonse.

²⁶ Umulwani uwakulekelesha ukuchimfya nimfwa.

²⁷ Amalembo akososa ati, “Lesa abikile ifintu fyonse panshi yamakasa akwe.” Ulo asosa ati, “Ifintu fyonse,” talikusanshako na Lesa uwabikile ifintu fyonse panshi yamakasa aku Klistu.

²⁸ Nomba ulo fyonse fyalikupingulwa na Klistu, elo Umwana naye akunakila Lesa, uyo uwamubikile pamulu wafintu fyonse. Akuchita fyonse mfi ukwebati Lesa abe uupyungila ifintu muli fyonse.

²⁹ Nga Yesu tabukilepo kubafwa, nindo abantu bakobatishiwa muchifulo chabafwa? Nga abafwa tabakabukepo, nomba nindo abantu babatishiwa muchifulo chabo.

³⁰ Nindo twikalilamo mufintu ifyabusanso?

³¹ Mwe bawesu, imfwa nebo nyenda nayo akasuba nakasuba! Nkososa mfi pakuti ndayitakisha muli Klistu Yesu Shikulu wesu pamulandu wenu.

³² Nga ulo nalwishishe ifiswango mu Efeso, findo nasangilemo nga nalikukonka amalangulushi abantu bwaka? Nomba nga abafwa tabakabukepo tulokuchita kubati ifyo basosa ati, “Natulye nokunwa, pakuti mailo twakufwa.”

³³ Bemupunamikapo, “Ukwikatana pamo nembifi ekonaula imibele iiweme.”

³⁴ Bwelelenipo kumalangulushi enu aaweme, elo muleke nokubifya. Nkososa mfi ukuti mwanshe nsoni.

Ifyamubili uwo umuntu akubuka nawo

³⁵ Umbi kuti afumba ati, “Kanshi abafwa kuti babushiwa shani? Kanshi umubili wabo wakuba shani pakubuka?”

³⁶ Kupunama, bayi! Napo ifyo ubyala tafimenapo panuma yakufwa?

³⁷ Icho wabyala luseke bwaka, nalimo ulwaku tiligu nangu lumbi, tepo ichiti ichakwisa kukulapo panshita imbi?

³⁸ Lesa eupela kuluseke ndulya umubili afwaya. Alapela chila luseke umubili uulingile.

³⁹ Umunafi taubapo chimo. Pali umunafi wabantu, umbi wanama, umbi watoni, umbi naye uwanswi.

⁴⁰ Pali nakambi ifilengwa ifyakumulu nefyapanonshi. Nomba umuchinshi uwafyakumulu, walipusana nomuchinshi wafyapanonshi.

⁴¹ Akasuba kali nokusanika kwakako, umweshi nawo uli nokusanika kwakuko ukwapusana nokwakasuba. Intandala nasho shili nokusanika kwashiko ukwapusana neshinabo. Intandala imo-imo nayipusana mukusanika kuyinakwe.

⁴² Fyakuba mfi ulo abafwa bakubuka. Umubili bashika mwiloba ulabola, nomba pakubuka kubafwa wakuba uutangabolapo.

⁴³ Pakushika umubili uli wasulwa, nomba pakubuka wakuba wamuchinshi. Pakuushika ulaba uwanaka, nomba pakubuka wakuba uwafiso.

⁴⁴ Pakuushika wamunafi, nomba pakubuka wakuba wamupashi. Nga pali umubili wamunafi, ekwebati pali nowamupashi.

⁴⁵ Amalembo asosa ati, “Adamu wakwamba ngulya ayishile kuba umumi,” nomba Adamu wakumupwilo ayishile kuba Umupashi uupela ubumi.

⁴⁶ Uwakwamba tepo umubili wamupashi, yii. Wakwamba mubili wamunafi, elo panuma uwamupashi.

⁴⁷ Umuntu wakwamba ngulya afumine kwiloba. Umuntu wachibili afumine kumulu.

⁴⁸ Abantu bonse abapanonshi balilingana na Adamu ngulya uwabumbilwe kwiloba. Nomba bonse abakumulu, balilingana na Klistu uwakumulu.

⁴⁹ Ukubati ifyo twakwata ichipasho chamuntu wabumbilwe kwiloba, efyo twakukwata ichipasho chaku ngulya uwafumine kumulu.

⁵⁰ Icho nkomweba bawesu chakuti umuntu nomubili wakwe uwamunafi tangenjilamo mubufumu bwaku Lesa. Elo fyonse ifibola tekuti finjilepo uko ifintu fitabola.

⁵¹ Umfweni kamwebeko ichamumfisolo. Tekwebati bonse twakufwa iyowo, nomba bonse twakwaluka.

⁵² Mfi fyakuchitika pakashita kanini, mukukapawila kwalinso ulo lupenga lwakupelako lwakulila. Pakulila kwalupenga bwaka abafwa bakubuka nemibili iitangabolapo, elo fwebo twakwaluka.

⁵³ Pakuba umubili ngu uubola ulingile ukwaluka uutabolapo. Elo umubili ngu ungafwa, ulingile ukwaluka utangafwa.

⁵⁴ Ulo umubili uwingabola wakufwala uutangabolapo, penkapo fyakufikilishiwa ifyo Amalembo asosa ati, “Imfwa yachimfiwa ukufikapo!”

⁵⁵ “Webo we mfwa, mba ukuchimfya kobe kuli kwi? Webo we mfwa mba ulubola lobe luli kwi?”

⁵⁶ Ulubola lwamfwa kubifya, nefiso fyakubifya fyafuma ku Mafunde ngalya.

⁵⁷ Nomba tutondayishe Lesa uwalengele ukuti tuchimfye muli Bashikulu Yesu Klistu.

⁵⁸ Nomba mwe bawesu abatemweka, koseni ndi. Mwilekapo chimo chimuteshe. Mube abachinchila inshita yonse mumulimo waku Bashikulu. Pakuba mwalishiba ukuti mukupyungila Bashikulu tamulipo mwabwaka.