1 Kolinto 14 - Chipangano Chabwangu

Nafimbi ifyabupe ifyo Mupashi Wabuta upela

¹ Mweshe ukuba nechitemweko. Elo mufwayishe ifyabupe ifyo Mupashi Wabuta upela, nokuchilapo ichabupe chikushimika amashiwi aku Lesa.

² Pakuba umuntu uukososa indimi shitayishibikwapo, tasosapo kubantu iyowo, kuntu kuli Lesa. Pakuba tapapo umuntu uumfwa ifyo akososa. Mupashi Wabuta eumulenga ukusosa ifyamfisolo.

³ Nomba uusosa amashiwi aafuma kuli Lesa, asosa kubantu, elo alabafwilishako, alabakoselesha nokubasangalasha.

⁴ Uusosa mundimi ishitayishibikwapo ayafwilisha enka. Nomba uusosa amashiwi aku Lesa afwilisha ichilonganino.

⁵ Kuti natemwa nga mwe bonse mukososa mundimi ishitayishibikwapo. Nomba kuti natemwa ukuchilapo nga ichabupe chenu kushimika amashiwi aku Lesa. Uusosa amashiwi aku Lesa achilapo uusosa mundimi ishitayishibikwa. Nga chakuti tapapo ungaalula ifyo asosa, kuti akula shani ichilonganino?

⁶ Nomba, mwe bawesu, nga naisa kuli mwe nkososa mundimi ishitayishibikwapo, nindo mwingasangamo? Takupo mwakubonamo mukusosa kwanji nku, sembi namuletela ifyo Lesa aamfisulwile, amano, ubutumi bwakwe nangu ukusambisha kumbi.

⁷ Nangu ifintu babomfya mukwimba bafilisha mumusango umo wine, mba kuti mwayisha shani ukupusana pakati kamutolilo nangula sese.

⁸ Elo uukolisha ulupenga nga takolishapo bwino, ninani uungayipekanya ukuya kunkondo?

⁹ Efyo chili nakuli mwe. Umuntu kuti ayishiba shani ifyo mukososa nga tamukososapo amashiwi ayomfwika? Mungalokusosa kumwela bwaka.

¹⁰ Kwalibapo indimi ishinji panonshi, nomba shonse shilikwete ifyo shikoalula.

¹¹ Nomba nga nshishibilepo ifyo akososa, ndimwinafyalo kuli ye, elo naye mwinafyalo kuli ne.

¹² Efyo chili nakuli mwe. Apo muli abakukabila ifyabupe ifyo Mupashi Wabuta upela, mulokwesha ukubomfya ifyabupe mfi mukukosha ichilonganino.

¹³ Pamulandu ngu, umuntu onse uusosa mundimi ishitayishibikwapo, alombe ukuti apelwe ifiso ifyakwalula.

¹⁴ Pakuti nga nalomba mundimi iitayishibikwapo, mupashi wanji eukolomba, nomba amano anji taanonkapo akantu.

¹⁵ Nomba nkochita shani? Nakulomba nomutima wanji, elo namano anji. Nakwimba nomutima wanji, elo namano anji.

¹⁶ Nga mukotota Lesa nomutima wenu wenka, nga umuntu uuli namwe pamo uutayishibapo ifyamumutima wenu, angasosa shani ati, “Ameni” pakulomba kwenu ukwakutotela Lesa ulo ye teshibilepo ifyo mukososa?

¹⁷ Nangu chibe ati mukototela Lesa mubune, nomba ngulya muntu takosangapo akantu nangu panini.

¹⁸ Nkototela Lesa ukuti nebo ndasosa mundimi ishitayishibikwapo ukuchila mwe bonse.

¹⁹ Nomba muchilonganino kuti natemwa ukusosa amashiwi asano bwaka angomfwika ukuchila amashiwi amakana ikumi mundimi iitayishibikwapo.

²⁰ Bawesu, lekeni ukulanguluka nga utwaiche. Ukulosha kububi mube utucheche, nomba mukulanguluka kwenu, mube abakulu.

²¹ Mumafunde chalembwa ati, “Ukupitila mundimi ishitayishibikwapo, mutunwa twabenafyalo, nakusosa kuli mba bantu, nomba nabo tabakangumfwepo, efyo asosa Shikulu.”

²² Ukusosa mundimi ishitayishibikwapo chishibilo chabatachetekela. Nomba ubupe bwakubilisha amashiwi aku Lesa, echishibilo chabantu abachetekela tepo abatachetekela.

²³ Nomba nga ichilonganino chonse chakumana pamo, elo bonse batatika ukusosa mundimi ishitayishibikwapo, elo mwayinjila abantu abatayishiba nangula abatachetekela, napo tekuti basosepo ati mukochita bwaka umusala?

²⁴ Nomba nga bonse bakoshimika amashiwi aku Lesa, elo muntu uutachetekelapo nangu uutayishiba ayinjila, akushininwa kufyo akoumfwa. Amashiwi onse akumwinjila mumutima,

²⁵ elo ifyamumutima wakwe fyakuboneka apatubile tuutu. Elo akuwa panshi mukulomba Lesa. Akusuminisha ukuti, “Nachine Lesa ali pali mwe!”

Ukuchita ifintu mubololoke muchilonganino

²⁶ Findo nakusosa bawesu? Ulo mulongana pamo, umbi ali nolwimbo, umbi neshiwi alefwaya ati asambilishe, umbi ali nakantu kambi ako Lesa amufisulwila, umbi naye akusosa mundimi ishitayishibikwapo, elo umbi naye wakwalula. Nomba fyonse mfi fichitwe mukukoselesha ichilonganino.

²⁷ Kati kulipo abakososa mundimi ishitayishibikwapo, basose mukulindilana babili nangula batatu epela, elo kubepo umo uwakwalula ifyo bakososa.

²⁸ Nomba nga tapapo umuntu uwakwalula, uyo ekale chelele muchilonganino. Alokwisosela enka mumutima wakwe, elo nakuli Lesa.

²⁹ Abakubilisha amashiwi aku Lesa babe babili nangula batatu, elo bambi balokupingulapo pafyo bakososa.

³⁰ Nomba Lesa, nga asokololapo fimbi muli umo uwikele muchilonganino, ngulya uukososa ekale chelele.

³¹ Pakuba bonse mungasosa amashiwi aku Lesa mukulindilana ukwebati bonse basambishe nokukoseleshiwa.

³² Bo abali nobupe ubwakusosa amashiwi aku Lesa, beshibe ifyakubomfya ubupe mbu.

³³ Pakuba Lesa te Lesapo wachimfulu-mfulu, kuntu wamutende. Nga mfilya chaba mufilonganino fyabantu baku Lesa,

³⁴ abanakashi bekale chelele mufilonganino. Pakuba tabapelwapo insambu shakusosapo. Kubati nimfilya Amafunde aku Mosesi asosa, abanakashi bekala abachumfwila.

³⁵ Kati bakofwaya ukufumbapo pafintu fimo, bakafumbe abalume babo kunanda. Chamwansha nsoni umwanakashi ukusosa muchilonganino.

³⁶ Napo amashiwi aku Lesa atulile kuli mwe, bayi? Napo yafikile kuli mwe mwenka?

³⁷ Nga chakwebati ukoyitunga ukuba umusambishi wamashiwi aku Lesa, nangula ukuti ulikwete ubupe ubo Mupashi Wabuta upela, asuminishe ukubati ifyo nkomulembela lifunde lyafuma kuli Bashikulu.

³⁸ Nga asuula mfi, Lesa naye akumusuula

³⁹ Echo bawesu, bikeni imitima yenu pakushimika amashiwi aku Lesa. Elo mwikanyapo abantu ukusosa mundimi ishitayishikwapo.

⁴⁰ Nomba lekeni ifintu fyonse fichitike mubune namunshila iyaololoka.