1 Kolinto 13 - Chipangano Chabwangu

Ifyakutemwa

¹ Nangu ningasosa shani mundimi shabantu nangu shabangelo, nomba nga nshikwetepo ukutemwa, ukusosa kwanji kuli bwaka kubati ninyenjele nangu ichingolo ichikolila.

² Nangu ndi nechabupe ichakusambisha, nangu nalishiba ifyamubumfisolo fyonse, nokumfwikisha fyonse, nangu ningakwata ichichetekelo ichakusesha impili, nomba nga nshikwetepo ukutemwa, tanshipo kantu.

³ Nangu ningapela abachula ububoni bwanji bonse, nangu ukupela umubili ukuti bawoche, nga nshikwetepo ukutemwa, tapapo akanji.

⁴ Ukutemwa kuteka umutima nokufuuka. Ukutemwa takukwetepo umufimbila, ukuyitondayisha nangu ukuyitutumuna.

⁵ Ukutemwa takukwetepo imiya nangu bukayitemwe, nangu ichipyu. Ukutemwa takusungapo ifibipile.

⁶ Ukutemwa takusangalalapo mububi, kuntu muchine.

⁷ Ukutemwa kulelela fyonse, kulachetekela inshita shonse, kulalindilila, elo kulashipikisha.

⁸ Ukutemwa takushilapo. Ubusoseshi bwakushila, ukusosa indimi ishapusana-pusana kwakushila, elo namano yabantu yakuloba.

⁹ Pakuba twalishiba ifintu mukupelebela, nakambi tulashimika mukupelebela,

¹⁰ nomba ulo ichafikapo chakwisa, ichitafikapo chakuluba.

¹¹ Ulo nali umwaiche, nalikusosa nga umwaiche, nalikulanguluka nga umwaiche, elo ifintu nalikuchita nga umwaiche. Nomba ulo nakulile, nalifilekele fyonse ifyachaiche.

¹² Nomba nkobona ifintu kubati chinshingwa muchilola. Elo pali njilya nshita twakubonana amenso namenso. Nduno ndishibile panini, kuntu pali njilya nshita nakwishiba ukufikapo, kubati nimfilya banjishiba ukufikapo.

¹³ Pakuba pali ifintu fitatu: ichichetekelo, ukulindilila nechitemweko. Nomba muli mfi, ichikulu ukuchilapo kutemwa.