1 Kolinto 12 - Chipangano Chabwangu

Ifyabupe ifya Mupashi Wabuta

¹ Nomba mwe bawesu, nshikofwayapo ukuti mulokuluba pamulandu wafya bupe bwa Mupashi Wabuta.

² Mwalishiba ati ulo tamulachetekela, mwalikulufyanishiwa munshila shapusana-pusana ukuti mulokulomba tungosa wakubasa ututasosapo.

³ Echo umuntu onse uukotungululwa no Mupashi Wabuta tangasosapo ati, “Yesu alapishiwe.” Elo tapapo uungasosa ati, “Yesu ni Shikulu,” uutatungululwapo no Mupashi Wabuta.

⁴ Pali ifyabupe ifyapusana-pusana, nomba uufipela Mupashi Wabuta umo enka.

⁵ Pali ishila shapusana-pusana ishakubombelamo, nomba Bashikulu abo tubombela bamo benka.

⁶ Pali ifiso ifyapusana-pusana, nomba Lesa umo enka uubomfya ifiso mfi mubantu bonse.

⁷ Umupashi Wabuta upela chila muntu ichabupe ichakuti abomfye mukubomba inchito yakuwamina bonse.

⁸ Umupashi Wabuta ngu upela umuntu umbi amano ayakusosa ifyamulangwe, umbi naye Umupashi umo wenka upela ubupe ubwakusosa namano.

⁹ Umbi naye Umupashi umo wenka upela ichichetekelo, Umupashi umo wenka upela umuntu umbi ifiso ifyakuposha.

¹⁰ Upela umuntu umbi ifiso ifyakuchita ifyafiso ifikulu, umbi naye ukushimika amashiwi aku Lesa. Elo umbi ukupatulula ubupe ubufuma ku Mupashi uuweme nangula uubi, umbi upelwa ukusosa mundimi ishitayishibikwa, nakuli umbi upela ukwalula indimi nshi.

¹¹ Fyonse mfi Mupashi Wabuta ewubomba mubantu. Alaakanya chila muntu umo umwine afwayila.

Umubili umo wakwata ifilewa ifinji

¹² Klistu aba kubati mubili umo uwaba nefilewa ifinji. Nangu ifilewa fibe ifinji, kuntu umubili waba umo enka epela.

¹³ Pakuba nangu fwebo tube Abayuda nangula abenafyalo, abasha nangula ababwanalale, twabatishiwe mu Mupashi Wabuta umo ukwebati tube umubili umo. Elo bonse twalipokelela Umupashi Wabuta umo wenka.

¹⁴ Umubili tawabapo ichilewa chimo bwaka iyowo, kuntu ifilewa ifinji.

¹⁵ Nga lukasa alwasosa ati, “Nebo nshilipo kuboko, echo tenepo ichilewa chamubili,” napo ulukasa talupo ichilewa chamubili pamulandu ngu?

¹⁶ Ukutwi nako akwaeba ati, “Nebo nshilipo ilinso, echo tenepo ichilewa chamubili,” napo ukutwi takulipo ichilewa chamubili pamulandu ngu?

¹⁷ Kati umubili onse wali ilinso, nomba kuti waumfwa shani? Nangula umubili onse nga wali ukutwi, nga kanshi kuti wanunsha shani?

¹⁸ Echo kanshi Lesa abikile ifilewa fyonse pachifulo chachiko mumubili ukulinga nokutemwa kwakwe.

¹⁹ Ifilewa fyonse nga fyali chimo, nga mubili kuti waba kwisa?

²⁰ Kanshi ifilewa fyaba ifinji, nomba umubili umo bwaka.

²¹ Echo ilinso tekuti lyebepo ukuboko ati, “Nshikwetepo inchito nawebo.” Nangu umutwi tekuti webepo amakasa ati, “Nshikwetepo inchito nawebo.”

²² Muchine, ifilewa ifyo tubona kubati finakile, nafyo filafwayikwa ukwinekantu.

²³ Ifilewa ifyo tubona ifitachindama, efyo tuchinshika ukuchilapo. Elo ifilewa fyamubili wesu ifitwansha nsoni, efyo tuchingilila ukuchilapo.

²⁴ Nomba ifilewa ifiboneka bwino, tatufichingililapo munshila nji. Lesa pakuluminkanya ifilewa ifyamubili, afichitile munshila yakuti apele umuchinshi kufilewa ifitakwetepo umuchinshi.

²⁵ Achitile mfi pakwebati pebapo ukupatukana pafilewa mumubili, kuntu ukwebati fyonse filokusakamanana.

²⁶ Nga ichilewa chimo chaumfwa ukufinya, fyonse pamo filomfwa ukufinya. Nga chapelwa umuchinshi, fyonse pamo filasekelela.

²⁷ Echo mwebo bonse muli umubili waku Yesu. Elo bonse muli ifilewa fyamubili waku Ye.

²⁸ Muchilonganino Lesa alibikamo mba: pakwamba abatumwa, muchabubili abasoseshi, muchabutatu abasambishi. Abikilemo abantu abangachita ifyafiso ifikulu, abakwete ifiso ifyakuposha, bambi ifyakwafwilishako, bambi ifyakutungulula, nabambi ifyakusosa mundimi ishapusana-pusana.

²⁹ Napo bonse batumwa? Napo bonse basoseshi? Napo bonse basambishi? Napo bonse bangachita ifyafiso ifikulu?

³⁰ Napo bonse bali nechabupe ichakuposha? Napo bonse bengasosa mundimi ishapusana-pusana? Napo bonse kuti bashalula?

³¹ Bikeni imitima yenu pafyabupe ubwachilapo. Nomba nkamulangepo inshila iiweme ukuchila.