1 Kolinto 11 - Chipangano Chabwangu

¹ Mulokutenteka nebo ukubati ifyo ntenteka Klistu.

Umuchinshi wabanakashi

² Nkomutotela pakunjibukisha muli fyonse nokwikatisha ifyo namusambishe.

³ Nomba nkofwaya ukuti mwishibe ati Klistu emutwi wamwalalume onse, nomutwi wamwanakashi mwalalume. Elo umutwi waku Klistu ni Lesa.

⁴ Umwalalume onse uulomba nangu ukobilisha icho Lesa amufisulwila pachintu-bwinji, alifimbile kumutwi wakwe, asebanya Klistu.

⁵ Umwanakashi onse uulomba nangu ukubilisha icho Lesa amufisulwila tafimbilepo kumutwi wakwe, asebanya umulume wakwe. Elo tapapo ubupusano pali ye nomwanakashi uwabeya.

⁶ Kati umwanakashi takofimbapo kumutwi wakwe, alingile ukubeya bwaka umukuyu. Pakuti chingalenga insoni kumwanakashi ukubeya imishishi, nangu ukumubeya umukuyu, kanshi alingile ukufimbako kumutwi wakwe.

⁷ Umwalalume talingilepo ukufimba umutwi wakwe pakuti ye chipasho nomuchinshi waku Lesa, kuntu umwanakashi muchinshi wamwalalume.

⁸ Pakuba umwalalume tabumbilwepo ukufuma kumwanakashi, kuntu umwanakashi ewafumine kumwalalume.

⁹ Nakambi umwalalume tabumbilwepo pamulandu wamwanakashi, kuntu umwanakashi ewabumbilwe pamulandu wamwalalume.

¹⁰ Echo pamulandu wabangelo, umwanakashi afimbe umutwi wakwe ukuti chibe ichishibilo chakwebati umulume wakwe ali nensambu pali ye.

¹¹ Mubumi bwesu muli Bashikulu, umwanakashi takupo ifyo ali ukwambula umwalalume, elo umwalalume naye takupo ifyo ali ukwambula umwanakashi.

¹² Ina, umwanakashi afumine kumwalalume, efyo nomwalalume naye afyalilwe kumwanakashi. Nomba ifintu fyonse fifuma kuli Lesa.

¹³ Kanshi nomba ipinguleni mwebene nga chakuti chiweme umwanakashi ukulomba kuli Lesa nga tafimbilepo kumutwi wakwe.

¹⁴ Napo ichifyalilwa chesu tachisambisha ukuti chansoni umwalalume nga ateka imishishi.

¹⁵ Nomba kumwanakashi chamuchinshi. Pakuba Lesa apele umwanakashi imishishi iitali ukuti alokwifimba kumutwi wakwe.

¹⁶ Nomba nga umbi akofwaya ukutalika, nebo kuti namwasuka ukwebati fwebo pamo nefilonganino fyaku Lesa, tatukwetepo akafuto kambi.

Umulalilo waku Bashikulu

¹⁷ Ukubako pali mfi fimbi tanshikomutotapo pantu ifyo muchita mukulongana kwenu tafyawamapo iyowo.

¹⁸ Ichakubalilapo, ndyumfwile ati ulo mulongana kulaba ukupatukana pakati kenu. Ukuba nandibo kumbi nkochetekela ati mfi fyachine. (

¹⁹ Nachine kulingile ukuba ukupatukana pakuti abalungama beshibikwe.)

²⁰ Ulo mulongana pamo, tepo umulalilo waku Bashikulu mulya iyowo.

²¹ Pantu ulo mukolya umuntu onse afwayisha ukulya ichakulya chakwe enka. Echo umbi kuti alifwile kunsala, elo umbi naye alikolelwe.

²² Napo tamwakwatapo amananda akulilamo nangula ukunwenamo? Napo mufwaya ukusula ichilonganino chaku Lesa nokulenga insoni kubachula? Findo nkososa nebo? Napo mutotele? Nangu panini!

²³ Pakuti napokelele kuli Bashikulu amashiwi awo namuletele aakuti ubushiku bwenka ubo Bashikulu Yesu bapelekelwemo, babulile umufuba.

²⁴ Ulo ashilile ukutotela kuli Lesa, aliwusunawile nokusosa ati, “Ngu mubili wanji uwapelwa pamulandu wenu. Mulokuchita mfi pakunjibukisha.”

²⁵ Munshila imo yenka, ulo ashilile ukulya, Yesu abulile ulukombo nokusosa ati, “Ndu lukombo chipangano chabwangu ichapamulopa wanji. Mulokuchita mfi lonse ulo mukonwa pakunjibukisha.”

²⁶ Pakuti inshita shonse ulo mulya ngu umufuba nokunwenako kulukombo ndu mubilisha imfwa yaku Bashikulu basuke bakabwele.

²⁷ Echo nga umuntu alya umufuba ngu nokunwa kulukombo lwaku Bashikulu munshila iitalingilepo, akuba nomulandu wakusula umubili nomulopa waku Bashikulu.

²⁸ Umuntu alingile ayiyesha enka, elo alye umufuba nokunwena kulukombo ndu.

²⁹ Pakuba onse ulya umufuba nokunwa kulukombo ndu ukwambula ukulanguluka umubili waku Bashikulu, alalya nokunwa kukupingulwa kwakwe.

³⁰ Echo abenji muli mwe bakolwalilila nokunaka, elo bambi nabo balifwile kale.

³¹ Nga chakuti tuleyesha fwe bene, nga tatupelwapo umulandu.

³² Nomba ulo Bashikulu batupingula, batuchenjesha ukuti twikapelwapo umulandu pamo nabatayishibapo Lesa.

³³ Echo bawesu, ulo mulongana ukuti mulye umulalilo wa Bashikulu, mulokulindana.

³⁴ Nomba nga umo ali nensala, kaalya kumwakwe ukutina ukuti Lesa engabalanga pamulandu wakulongana kwenu ukubi. Imilandu imbi nakwisa kumweba ulo nakwisa kuli mwe.