1 Kolinto 10 - Chipangano Chabwangu

Ifyawile abena Isilaeli fibe ifyakutuchenjesha

¹ Bawesu, nkofwaya ukumwishibishako ifyachitikile kufikolwe fyesu ifyakale mfilya. Bonse balikutanjililwa nekumbi elo bonse bayabukile Bemba Uuswetele.

² Echo bonse babatishiwe mwikumbi namuli bemba ukuti babe abakusambila bakwa Mosesi.

³ Bonse balile ichilyo chimo ichamupashi,

⁴ bonse balinwine ichakunwa chimo. Pakuti balikunwa ukufuma kwibwe ndilya ilyamupashi ilyali nabo. Ndi bwe ni Klistu.

⁵ Nomba Lesa tatemenwepo pabenji muli bo. Echo balifwile muchiswebebe.

⁶ Nomba ifintu fyonse mfi fyalichitikile ukutuchenjesha fwe, ukuti twilokufwayapo ifyabipa kubati nimfiya balikuchita.

⁷ Twilokulombapo tungosa wakubasa ukubati nimfilya bambi pali bo bachitile. Amalembo asosa ati, “Abantu balikele ukuti balye nokunwa, elo batatikile nokushana.”

⁸ Twibapo ababulale-lale ukubati nimfilya bambi balikuchita. Elo mukasuba kamo amakana amakumi abili na atatu balifwile.

⁹ Twiyeshapo Bashikulu ukubati nimfilya bambi bachitile. Elo balisuminwe kunsoka nokufwa.

¹⁰ Mwilokuyilishanyapo ukubati nimfilya bambi balikuchita. Elo umungelo wabonaushi alibepeye.

¹¹ Fyonse mfi fyalibaponene ukwebati fibe ifyakubwenako kuli bo. Nomba fyalilembelwe ukuti fituchenjesheko fwebo fwe bali nobumi munshiku shakupelako.

¹² Nomba onse uwilangulukila ukuti alimakana ndi achenjele pakuti ewapo.

¹³ Ukwesheka uko mwebo mwabona, takupusenepo nokweshekwa uko abantu bonse babona. Lesa wachine. Echo tekuti amulekeleshepo ukweshekwa ukuchila pafiso fyenu. Nga mwayeshekwa, umwine akumupela inshila yakupulukilamo, pakumupela ifiso ifyakwebati mushipikishe.

¹⁴ Echo mwe batemwekwa banji, fumeniko kukululomba tungosa wakubasa.

¹⁵ Nkososa mfi kuli mwe nga bantu abamano. Muyipingule mwenka pali mfi nkososa.

¹⁶ Ulo tunwako kulukombo uko tutotela Lesa, nku kwakanapo mumulopa waku Klistu. Umufuba uwo tusunaula, napo tatukumbinkanapo nomubili waku Klistu uyo tulyako?

¹⁷ Pakuba umufuba umo bwaka. Nangu fwebo tuli abenji, twaba umubili umo pantu tulya kumufuba umo.

¹⁸ Boneni ifichita abena Isilaeli! Napo bo abalyako ifipupo tabakanapo ifyo bapupila kuli Lesa?

¹⁹ Mba nindo nkososapo? Napo ipupo tupipila tungosa wakubasa lyaba nakantu? Napo tungosa wakubasa nato tulipo nakantu?

²⁰ Iyowo, kuntu ifyo abakunse bapupa bapupila kumipashi iibi, te kuli Lesapo iyowo. Nshikofwayapo ukuti mwebo mube abakumbinkana nemipashi iibi.

²¹ Te kuti munwenepo kulukombo lwaku Bashikulu elo nolwamipashi iibi. Te kuti mulilepo petebulo lyaku Bashikulu elo nelyamipashi iibi.

²² Napo tukofwaya ukuti Bashikulu bakalipe? Napo chine twalichila Bashikulu ifiso?

²³ Kuli insosele iyakuti, “Ifintu fyonse fyalisuminishiwa,” nomba te fyonsepo ifiweme. Nakambi, “Ifintu fyonse fyalisuminishiwa,” nomba te fyonsepo ifyafwa.

²⁴ Umuntu eyifwayilapo enka ifimuwamina, kuntu ifiwamina banakwe.

²⁵ Fyonse bashitisha muchisankane kuti mwalya ukwambula ukufumba pakuti amalangulushi enu engamuchusha.

²⁶ Amalembo asosa ati, “Ichalo nafyonse ifyabamo fyaku Bashikulu.”

²⁷ Kati umuntu umo uutachetekelapo amwita mukulya, elo mwayako, mulye ifyo amutebeta. Mwikafumbapo pakuti amalangulushi enu engamuchusha.

²⁸ Nomba nga umbi akweba ati, “Nji nama baliyipupilila kuli tungosa wakubasa,” mwilyako iyowo, pamulandu wamuntu uyo uwamuchenjeshako, elo namalangulushi enu.

²⁹ Nomba te wepo uungachula kumalangulushi, kuntu ningulya uwakubushako. Nalimo kuti wasosa ati, “Mba ubwanalale bwanji kuti bwapingulwa shani namalangulushi amuntu umbi?

³⁰ Kati nkotondayisha Lesa pachakulya chanji, nindo umuntu umbi engansulilapo pamulandu wachakulya icho mpokelela mukulomba Lesa?”

³¹ Echo nga mukolya, ukunwa nangu ulo mukochita ichili chonse, mufichite mukuchinshika Lesa.

³² Ubumi bwenu bwilenga Abayuda, abenafyalo nangula ichilonganino chaku Lesa ukubifya.

³³ Mulokuchita kubati ifyo nebo nchita. Ndesha ukusekelesha abantu bonse muli fyonse. Nshikofwayapo ukuyiwamisha nenka, kuntu ifiwamisha abantu bonse ukuti bapuluke.