1 Kolinto 1 - Chipangano Chabwangu

¹ Nine Paulo, uwayitilwe ukulingana nokufwaya kwaku Lesa ukuti mbe umutumwa waku Klistu Yesu, pamo nawesu Sositenesi.

² Tukolembela ichilonganino chaku Lesa ichili ku Kolinto. Lesa alimupatula muli Klistu Yesu nokumwita abantu bakwe, pamo nabo abeta peshina lyaku Bashikulu, konse uko bali. Ye e Shikulu wabo nakambi wesu.

³ Lesa Bata na Bashikulu Yesu Klistu balokumushukisha nokumupela umutende.

Ishuko muli Klistu

⁴ Ndatotela kuli Lesa inshita shonse pamulandu waku mwebo, pakuti alimukwatila bwanshi muli Klistu Yesu.

⁵ Echo muli Klistu muli bachindama pali fyonse, ukuchilapo mukusosa namukwishibisha konse.

⁶ Pakuba amashiwi akupela bukamboni bwaku Klistu alishikile muli mwebo.

⁷ Echo tapapo ubupe ubo tamukwetepo ulo mukolindila ukuboneka nakambi kwaku Bashikulu Yesu Klistu.

⁸ Ye akumukosha ukufika nakumupwilo, ukwebati mwikabapo abamulandu pakasuba kaku Bashikulu Yesu Klistu.

⁹ Lesa wachishinka. Elo Ye ewamwitile ukwebati muwikishanye pamo no Mwana wakwe Yesu Klistu, Bashikulu wesu.

Ukupatukana muchilonganino

¹⁰ Mwe bawesu nkomupapata, mwishina lyaku Bashikulu Yesu Klistu ukuti mulokumfwanina pamo bonse. Pelokubapo ukupatukana pakati kenu, kuntu mulokumfwana nomutima umo, elo necho mufwaya.

¹¹ Pakuba bawesu abamulupwa lwakwa Koloye balinshimikilako ifyaku mwebo ukuti paliba ukupatukana pakati kenu.

¹² Ifyo nkososa nimfi ifyakuti umbi akososa ati, “Nebo ndiwakwa Paulo,” umbi naye ati, “Ndiwakwa Apolosi,” umbi naye ati, “Nebo ndiwakwa Kefasi,” elo umbi naye ati, “Nebo ndiwaku Klistu.”

¹³ Napo Klistu alyabikana, bayi? Napo ni Paulo uwamusamikilwa pamutanshi? Napo nimwishina lyakwa Paulo mwabatishiwe?

¹⁴ Nkototela Lesa pakuti tanshabatishapo nangu umo pali mwebo, kuntu Kilisipasi enka na Gayusi.

¹⁵ Kanshi tapapo nangu umo uungasosa ati nimwishina lyanji abatishikilwe. (

¹⁶ Ukubako, nalibatishepo Sitefanasi nabamunanda yakwe. Nomba nshikoyibukishapo ukubatisha na umbi.)

¹⁷ Klistu tantuminepo mukubatisha iyowo, kuntu mukubilisha Ubutumi Bwawama. Echo ningile ukushimikila ukutalingana nomulangwe wabuntunse, ukutina ukuti ifiso fyamfwa yaku Klistu pamutanshi fiboneka ukubati fyabwaka.

Klistu efiso nomulangwe waku Lesa

¹⁸ Pakuba amashiwi amfwa yaku Klistu pamutashi aba aabwaka kuli bo abakoluba, kuntu kuli fwe abakopuluka, fiso fyaku Lesa.

¹⁹ Pakuba chalilembwa ati, “Nakonaula umulangwe wabantu abamulangwe namano yabantu bamano nakulofya.”

²⁰ Nomba abamulangwe balikwisa? Nga abasambilila balikwisa? Nangula abachenjela mukutalikana ifyamuchalo balikwisa? Echo Lesa alitulanga ukuti umulangwe wabantu panonshi ulipuneme.

²¹ Pakuba mumulangwe wakwe, Lesa apekenye kabela ukwebati abantu bemwishiba mumulangwe wabo. Nomba Lesa chamuwamine ukwebati apulushe abantu abachetekela ukupitila mumashiwi awo balanguluka ukuba aapuneme awo tusambisha.

²² Abayuda bafwaya ukubona ifyafiso ifikulu, kuntu Abagiliki bafwaya ifyamulangwe.

²³ Nomba fwebo tulasambisha ifyaku Klistu uwo basamikile pamutashi. Ku Bayuda amashiwi nga akuyituntulako, kuntu kubenafyalo aapuneme.

²⁴ Nomba kuli bo Lesa ayitile, Abayuda nabenafyalo, balishibile ukuti Klistu efiso fyaku Lesa nomulangwe waku Lesa.

²⁵ Pakuba ichiboneka kubati kupunama kwaku Lesa, echamulangwe ukuchila amano abantu. Elo ichiboneka kubati bunake bwaku Lesa, chilachila ifiso fyabantu.

²⁶ Bawesu ibukisheni ifyo mwali panshita Lesa amwitilepo. Pakati kenu tapalipo abenji abantu abalikulanguluka ukuti bamulangwe, bafiso nangu abafyelwe mundupwa ishalulumbi.

²⁷ Nomba Lesa asalile ifintu ifyo abantu balanguluka ukuba ifipuneme ukuti aumfwishe insoni abamulangwe. Asalile nakambi ifintu ifyanaka ukuti aumfwishe insoni abafiso.

²⁸ Ifyo abantu balanguluka ukuba ifyabwaka, ifyamusalula, elo ifitakwetepo nakantu, mukwebati aonaule ifyo ichalo chilanguluka ukuba ifinenene.

²⁹ Lesa achitile mfi pakuti kwibapo nangu umo uwakuyitutumuna pachinso chakwe.

³⁰ Lesa ewamuwikishenye na Klistu, elo amulengele ukuba umulangwe wesu. Pamulandu waku Yesu, Lesa atulinga abalungama pamenso akwe. Tuli bantu baku Lesa ababuta, elo ababwanalale.

³¹ Kubati nimfilya Amalembo asosa ati, “Onse uufwaya ukuyitutumuna, ayitutumwine muli Bashikulu.”