Lukas 19 - Taaz Weru Witu u Nunuwu'en Tombulu

Si Yesus wo si Zakheus

¹ I si Yesus méikaayomola witi Yerikho a Sia lumampang mahkiita um wanua itii.

² Witu um wanua itii ém wéwéhan si tou wa'ilan makangaran Zakheus. Ni sia én tonaas né menanagi am pajak.

³ Si Zakheus é mahtututu' i milek si Yesus. Taan zéi'kan kailekanna si Yesus pahpaan sé tou witu én totoz lakez wo kasii un touna ém potot uman.

⁴ A sia kumara' mahpuunama im wia sé tou lakez, lumawa'ma witu ung kai ara i milek si Yesus lumangkoi witu.

⁵ I si Yesus méikaayola witu un toro ung kai ara itii, a Sia lumoho'ma ang kuan-Na wia ni sia: “Zakheus, pahrewekla tumumpamomé! In endo kenu ni Aku é léwo'zéi' i mento'ma witu um walému.”

⁶ Si Zakheus mereweké in timumpamé wo karia i mahpaa-paaz sia simungkul si Yesus.

⁷ Nimilek niitu, péléng sé tou é menembu-nembut wo mahkua, “Ni Sia mamento' witu um walé ni tou memua-muali a singkéla'.”

⁸ Witi waléna, si Zakheus rumendaié ang kumua wia si Yesus, “Tuang, sana pahzua a sangkumku én iwéhéku wia sé tou zéi'kan siapa apa wo sa wéwéhan si tinowoangku, niitu én iwuriku makaepaté niitu.”

⁹ Ang kuan ni Yesus wia ni sia, “In endo kenu ni ko karia né wia um walé kenu én ipilot im witu un ukuman wana a singkéla', pahpaan ni ko kangkasii é suzu ni Abraham.

¹⁰ Pahpaan si Oki' ni Tou é méyé i menéro sé tou méikalulu wo milot ni séra im witu un ukuman wana a singkéla'.”

Un aandéan tumoro un zoit mas

¹¹ Karegaspé' sé tou mahtalinga an ipahkua ni Yesus, a Sia sumirita karia un aandéan pahpaan ni Sia é merétémoma u Yerusalem wo witu ung genang né tou ni séra é mamomilek ung Kakolanoan ni Opo Empung.

¹² Ang kuan ni Yesus, “Wéwéhan si suzu ni kolano mangé witi tana' zou'ma i mamototozen maéndo kolano witu un tana' itii. In tinotozola ing kolano a sia mawurimé sumaup.

¹³ Puunala sia i nimangé, ni sia timawahmé sé ata mapulu' a séra wéhannala tata'saan un zoit mas ang kuan-Na wia ni séra, ‘Pakéla un zoit kenu i mahwangké-wangkér takaz ni aku mawurimé sumaup.’

¹⁴ Taan sé kawanuana é soo ni sia, a séra matuma tou tumondonga i makumua, ‘Kasoo nai si tou kenu i maéndo kolano nai.’

¹⁵ Zozo' in téntu ni sia én tinotozkané i maéndo kolano. I ni sia mawurimomé witi wanuana am pekitawahnamé sé ata winéhannamo un zoit mas i mahtata'u sa pirakan ung kinailekan ni esa wo ni esa.

¹⁶ A méyé si kataré ang kumua, ‘Tuang, un zoit mas esa méiwéhémé wia ni aku é nimaéndomoma mapulu' zoit mas.’

¹⁷ Ang kuana wia si tou itii, ‘Totoz wangun um winangunmula itii, ni ko én ata wangun. Ni ko én toro pa'émanen i mahpaayang an totoz kori', niitumo ni ko ém wéhan ung kawasa i maéndo tonaas witu u mapulu' wanua tua'na.’

¹⁸ Méyé si kazua ang kumua, ‘Tuang, un zoit mas esa u méiwéhémé wia ni aku é nimaéndomoma lima zoit mas.’

¹⁹ Ang kuana wia si tou itii, ‘Kariamu é maéndo tonaas witu u lima wanua tua'na.’

²⁰ Méyé si ata walina ang kumua, ‘Tuang, kenu un zoit mas ni tuang, méilé'osku witu u léso.

²¹ Ni aku é maindé' wia si tuang pahpaan si tuang én tou léwo'. Si tuang é mahéndo un zéi'kan anu ni tuang wo mengungupu' un zéi'kan méitanem ni tuang.’

²² Ang kuana wia si tou itii, ‘Ni ko én ata léwo'! Ni ko én ukumengku mengiit a méikuamumé itii. Kata'uannumo sa ni aku én tou léwo', mengéngéndo un zéi'kan anuku wo mengungupu' an zéi'kan méitanemku.

²³ Sa téntu, kaa un zoitku itii zéi'kan méilé'osmu witi pelélé'osan an zoit? Wo sa ni aku mawurimé én toro méndo niitu karia a méikaawesé witu.’

²⁴ Ang kuan ni kolano itii wia sé tou rimendai witu, ‘Éndonomé un zoit mas itii im wia ni sia wo iwéhéla wia si makaanumo u mapulu' zoit mas.’

²⁵ Ang kuan néra wia ni sia, ‘Tuang, ni sia é makaanumo u mapulu' zoit mas.’

²⁶ A séra wingkotenala in téntii, ‘Ikuakuma wia ni kamu, péléng sé tou makaanumo, wia ni sia én awesampé', taan séi si zéi'kan siapa, péléng am wia ni sia ém pakaéndon.

²⁷ Tarékan, ipahwalimé witu u sinaruku péléng sé kakoro'ku sé soo ni aku i maéndo kolano néra wo wunu'ela séra witu u sinaruku!’ ”

Si Yesus nimuntep witi Yerusalem

²⁸ I nimakakuamoma niitu, si Yesus mahlampang mahpuuna im wia ni séra i mangé witi Yerusalem.

²⁹ I merétémoma um Betfage wo Betania um witi kentur pahkuan kentur Zaitun, a si Yesus matuma sé zua pahtuzu'en-Na.

³⁰ Kuan-Na, “Mangémo witi wanua pahsaruna kenuma. I mawanala, ni kamu é mamilek si keledai peranggang méitapik wo si keledai itii én zéi'kampé' pinahsaké-sakéala né tou. Owarané si keledai itii wo pahaliné wia'i.

³¹ Sa wéwéhan si meligau wia ni kamu, ‘Kaa niowaran nioué si keledai itii?’ Wingkoten umanla in téntii, ‘Si keledai kenu ém pemandungen ni Tuang.’ ”

³² A mangé sé méiatuma itii, maileken néra én tanu a méikua ni Yesus.

³³ I niowaran néramé si keledai itii, a si makaanu kumuala wia ni séra, “Kaa si keledai itii niowaran nioua?”

³⁴ Am wingkoten nérala in téntii, “Si Tuang memandung si keledai kenu.”

³⁵ Am pahalin nérama si keledai itii wia si Yesus, sanihan nérala u ruuz ni keledai itii karia ang karai néra, a sawangan nérala si Yesus i sumaké wia si keledai itii.

³⁶ Karegas Sia i simaké wia si keledai itii, um pahlampangan-Na ém pahsanihan néra karia ang karai tonton néra.

³⁷ I merétémoma u Yerusalem, i mahperosoma witi kentur Zaitun, péléng sé mahkiit ni Sia sé lakez itii é mahpaa-paaz wo rimez i mahlooz si Opo Empung pahpaan péléng a makakompo'en niilek néramo.

³⁸ Kuan néra, “Loozen ni Sia si méyé ing Kolano karia u ngaran ni Opo Empung, in tarékan sé tou mahlé'o-lé'osano karia ni Opo Empung witi kasendukan, u sigi' wo u looz witi tampa totoz rakék!”

³⁹ Woo pira im wia sé sana réwok tou Farisi im wia sé tou lakez itii kimua wia si Yesus, “Méster, pekipenespé'la sé pahtuzu'en-Nu kenu.”

⁴⁰ Am wingkotela ni Yesus, “Ikua-Kuma wia ni kamu, ‘Sa séra menesla, am watu kenu éng kumérét.’ ”

Si Yesus mahamé' i nimilek u Yerusalem

⁴¹ I si Yesus merétémoma u Yerusalem, mileka um wanua itii a Sia mamé'.

⁴² Kuan-Na, “O ndootuu Yerusalem, totoz wangun sa in endo kenu éng kata'uannu kura i makailek u mahlé'o-lé'osan! Taan in tarékan niitu é méikawunipé' witu um werenmu.

⁴³ Un orasna é méyé i sé kakoro'mu lumiklik wo tumawun un tana' i lampangan néra muntep witu um wanua tua'na kenu wo sumeksek ni ko wana péléng a saruannu.

⁴⁴ Ni séra éng kumemu ni ko karia péléng sé toumu. Zéi'kan iwaya néra im wéwéhampé' am watu nimauusunan pahpaan zéi'mo kata'uannu un orasna si Opo Empung i mémilot ni ko.”

Si Yesus witi Walé ni Opo Empung

⁴⁵ A si Yesus muntepa witi lésaz um Walé ni Opo Empung an iwoho-Nama péléng sé mahwangkér witu.

⁴⁶ Kuan-Na wia ni séra, “Witu um Pinantik Lenas é méipantik: ‘Um walé-Ku ém walé pahpengaléian. Taan winangun niouola wuwunian né maremu'.’ ”

⁴⁷ Sekez in endo ni Sia é mahtuzu' witi lésaz um Walé ni Opo Empung. Sé tonaas né walian wo sé tou tulap un Torat karia né tou pahsigi-sigi'en né tou Yahudi itii é mahtututu' i munu' ni Sia,

⁴⁸ taan ni séra én zéi'kan méikailek lalan kura i mangun niitu, pahpaan péléng sé tou ém paaz wia ni Sia wo paaz tumalinga am pahtuzu'-Na.