Lukas 18 - Taaz Weru Witu u Nunuwu'en Tombulu

Un aandéan tumoro si menonotoz mahsanaweka wo si wéwéné mahesa-esamokan

¹ A si Yesus kumua un aandéan in tumuzu' sé pahtuzu'en-Na, wo ni séra léwo'zéi' sekezé é mengaléi wo tia' maseso'.

² Kuan-Na, “Witu um wanua tua'na ém wéwéhan si menonotoz ulit kaapa zéi'kan am pahwangunen né tou. Ni sia én zéi'kan maindé' si Opo Empung wo zéi'kan mahsigi' sé tou walina.

³ Witu um wanua tua'na itii kangkasii ém wéwéhan si wéwéné mahesa-esamokan si wéwéhan um pahéndo-éndoan. Wo ni sia sekezé é méyé wia si menonotoz itii i mekisawang wo mahkua: Sawangampé'mé ni aku wo ni aku muntung i sumaru si pahsarungku.

⁴ Ing kataré-taré si menonotoz mahsanaweka itii é soo sumawang si wéwéné mahesa-esamokan itii. Taan ing kamurian si menonotoz mahsanaweka itii éng gimenangkala in téntii: ‘Zozo' ni aku zéi'kan maindé' si Opo Empung wo zéi'kan mahsigi' sé tou walina,

⁵ taan pahpaan si wéwéné mahesa-esamokan kenu én zéi'kan kumana' i merau-raung ni aku, tawimo sia sawangangkuma wo sia zéi'mo memuri-murimé wia'i wo mangun ni aku maseso'.’ ”

⁶ Ang kuan ni Yesus, “Wéhanla genang a méikuama ni menonotoz mahsanaweka itii!

⁷ Si Opo Empung é sumawang um pahéndo-éndoan né tou-Na sé endo wo wengi én zéi'kan kumana' i mahtawah ni Sia. Wo ni Sia én zéi'kan mahuré-uré i sumawang ni séra.

⁸ Ikua-Kuma wia ni kamu: ni Sia én zéi'kan mahuré-uré i sumawang ni séra im wana am pahéndo-éndoan néra. Taan, sa si Oki' ni Tou méyé, apa wéwéhampé' sé tou wia ung kaayahan kenu sé ma'éman wia ni Sia?”

Un aandéan tumoro si tou Farisi wo si menanagi am pajak

⁹ Wia sé tou mahgenangla un touna én ulit wo mahgenangla péléng sé tou walina ém wawa', si Yesus kimua un aandéan kenu,

¹⁰ “Wéwéhan sé tou zua nimangé witi Walé ni Opo Empung i mengaléi. Si esa é esaané im wia sé sana réwok tou Farisi wo si esa é menanagi am pajak.

¹¹ Si tou Farisi itii rumendaié wo mengaléi: ‘O Opo Empung, ni aku éng kumuama u makasé wia ni Ko, pahpaan ni aku én zéi'kan tanu sé tou walina, zéi'kan angkum, zéi'kan tantowo, zéi'kan mahsamek wo ni aku én zéi'kan masuat wo si menanagi am pajak kenu;

¹² sekez minggu ni aku é makahzuzua i mahpuasa, u sana pahpulu' wana péléng ang kinailekangku ém pahwéhéku wia ni Ko.’

¹³ Taan si menanagi am pajak itii é rimendai zou'ma oki', wo lumouspé'tarémé niitu ni sia é maindé' i lumoho' witi langit, karia i mahpéhos um wezwezna pahpaan i mene'sel wo mahkua: ‘O Opo Empung, iraraaté ndootuumé ni aku si memua-muali a singkéla' kenu.’

¹⁴ Ikua-Kuma wia ni kamu, si menanagi am pajak kenu i mawurima witi waléna é niéndo ulit ni Opo Empung, taan si tou Farisi itii én zéi'kan. Pahpaan, séi uman si mahlooz un touna, ni sia én iroros ni Opo Empung wo séi uman si meroros un touna, ni sia é loozen ni Opo Empung.”

Si Yesus kimamang sé koki'

¹⁵ A méyé sé tou nimahwalimé sé oki' néra sé koki'pé' wia si Yesus, wo Sia zumeta' u lengen-Na ing kumamang ni séra. I nimilekla niitu, ang kakoro'ala né pahtuzu'en-Na sé tou itii.

¹⁶ Taan si Yesus timawahma sé koki' itii ang kuan-Na wia sé pahtuzu'en-Na, “Iwayamola sé koki' itii i méyé wia ni Aku, tia' pahséro'en niou séra, pahpaan sé tou tanu sé koki' kenumo sé makaanu ung Kakolanoan ni Opo Empung.

¹⁷ Uli-ulit ikua-Kuma wia ni kamu: Séi uman sé zéi'kan sumungkul ung Kakolanoan ni Opo Empung tanu sé koki' kenu, ni sia én zéi'kan ikauntep witu.”

Sé tou wa'ilan én totoz wutez i muntep witi Kakolanoan ni Opo Empung

¹⁸ Wéwéhan si tonaas né tou Yahudi meligau wia si Yesus, “Méster lé'os, apa u léwo'zéi' wangunengku i makailek ung katou-touan makaz ing kauré-uré?”

¹⁹ A si Yesus mingkotla: “Kaa pahkuanu ni Aku é lé'os? Akaz uman si Opo Empung si lé'os, zéi'kan siapa walina.

²⁰ Am perénta kenu éng kata'uannumo: Tia' mahsamek, tia' mahwunu' tou, tia' mahremu', tia' mahtowo i mahkua tumoro a niilek wo an tinalingamu, wo pahsigi'ela si ama'mu wo si ina'mu.”

²¹ Ang kuan ni tou itii, “Péléng niana ém pinahkiitkumomé rengan ni aku in tarétumoupé'.”

²² Tumalingamé niitu ang kuan ni Yesus wia ni sia, “Esapé' un zéi'kampé' winangunmu: Ipakawangkérla an anumu wo ipeméténgla wia sé tou zéi'kan siapa apa, karia in téntu ni ko é makailek a sangkum witi kasendukan. Sa ko nimangunola niitu, mawurimé wia'i wo kumiitomé ni Aku.”

²³ In timalingamé u méikuamé itii, un aténa én totoz rumara pahpaan ni sia én totoz wa'ilan.

²⁴ I nimilekla si tou itii én totoz rumara un até, ang kuan ni Yesus, “Totoz susa si tou wa'ilan i muntep witi Kakolanoan ni Opo Empung.

²⁵ Pahpaan si ontapé' si melé'os umana i muntep witu um wosona ung kéténgen, taan si tou wa'ilan i muntep witi Kakolanoan ni Opo Empung.”

²⁶ Sé tou in timalingamé u méikua ni Yesus itii é meligau, “Sa téntu, séi si toro ipilot im witu un ukuman wana a singkéla'?”

²⁷ Ang kuan ni Yesus, “An zéi'kan mamuali im wia sé tou é mamuali im wia si Opo Empung.”

²⁸ Ang kuan ni Petrus, “Ilekené ni kai! Ni kai én timula'umomé an anu nai wo kumiit ni Ko.”

²⁹ Ang kuan ni Yesus, “Uli-ulit ikua-Kuma wia ni kamu, séi uman si pahpaan ung Kakolanoan ni Opo Empung timula'umé um waléna, kaapa si wéwéné mahayona, kaapa sé katuarina, kaapa sé tu'ana, kaapa sé oki'na,

³⁰ in oras kenukan é makailek um wéténg wawaér u lumouspé'mé a méitula'unamé, wo in oras in tumondong ni sia é makailek ung katou-touan makaz ing kauré-uré.”

Ung katelu si Yesus nimapata'u ni Sia i maté

³¹ Si Yesus tumawahmé sé mapulu' wo zua sé pahtuzu'en-Na, ang kumua wia ni séra, “In tarékan ni kita é sumosozo witi Yerusalem. Im wana, péléng a méipantiko né nabi tumoro si Oki' ni Tou é mamualimo.

³² Ni Sia én iayo wia sé tou zéi'kan Yahudi, séro'an néra, iperoros néra wo rura'an néra.

³³ Ni Sia é saluken wo wunu'en néra, taan witu un endo katelu ni Sia é matou sumaup.”

³⁴ Taan sé pahtuzu'en ni Yesus én zéi'kan makatulap péléng a méikuama itii. Ung kalakoan an ipahkua-Na é méikawunipé' im wia ni séra. Zéi'kan kata'uan néra tumoro apa um pahkuan-Na.

Si tou letok witi rété Yerikho liné'os ni Yesus

³⁵ I si Yesus merétémoma Yerikho, wéwéhan si tou letok rimumez witu ruruh lalan wo mengangaléi.

³⁶ Im pahtalinganamé lakez sé tou melangko-langkoi witu, a sia meligau, “Wéwéhan apa wé?”

³⁷ Ang kuan néra wia ni sia, “Si Yesus tou Nazaret é lumangkoi.”

³⁸ A si tou letok itii kumérét, “Yesus, Suzu ni Daud, iraraaté ndootuumé ni aku!”

³⁹ Sé mahpuuna é rengan i siméro'la ni sia i menesla. Taan karimezna uman taré si tou letok itii i mahkérét, “Suzu ni Daud, iraraaté ndootuumé ni aku!”

⁴⁰ A si Yesus mento'la am pekiwali-Namé si tou letok itii wia ni Sia. I mawitumola u rété-Na, a Sia meligau,

⁴¹ “Apa ung kapaazmu im wanguneng-Ku wia ni ko?” A si tou letok itii mingkotla, “Tuang, ni aku ém paaz in toro milek!”

⁴² A si Yesus kumuala wia ni sia, “In tarékan ni ko én toromo milek, um pa'émanennu u limé'os ni ko!”

⁴³ In toro niitukan, si tou letok itii é mahileko a sia kumiit si Yesus karia i mahlooz wo mahsigi' si Opo Empung. Sé tou lakez kangkasii i nimilekla niitu é mahlooz wo mahsigi' si Opo Empung.