Kisah Rasul-rasul 9 - Taaz Weru Witu u Nunuwu'en Tombulu

Si Saulus nima'éman wia si Yesus

¹ In toro niitu, si Saulus éng kawua-wuayana i ma'indé' wo mahwunu' sé tou mahkii-kiit an tutuzu' ni Yesus Mahpiara. Ni sia masimaru wia si Walian Wangko',

² i mahaléi um pinantik u méhémé kawasa wia ni sia im pahalin wia sé tonaas am walé peraragésan né tou Yahudi witi Damsyik. Wo sa sia ikailekla sé tuama kaapa wéwéné sé mahkiit an tutuzu' ni Mahpiara, ni séra én toro tionanna wo ipahwali witi Yerusalem.

³ I ni sia melampang mangé witi Damsyik, i merétémoma um wanua tua'na itii, kumompo'mé ém wéwéhan u sena' mahsena'mé im witi langit limiklika ni sia.

⁴ A sia ikawesahma witu un tana' an talinganamé u nuwu' kimuamé in téntii, “Saulus, Saulus, kaa Aku pahzézéhannu?”

⁵ A mingkota si Saulus, “Tuang, séi Ko wé?” Ang kuan-Na, “Ni Akumo si Yesus si pahzézéhannu itii.

⁶ Taan in tarékan é rumendaiomé wo muntepoma witi Damsyik. Im wanamokan wo ko makuaan apa u léwo'zéi' im wangunennu.”

⁷ In toro niitu, sé tou mahwali kariana é menganga-nganga pahpaan ni séra é mahtalingamé u nuwu' itii taan ni séra zéi'kan nimilek tou zozo' in esa.

⁸ Rumendaié si Saulus a sia mukala um werenna taan ni sia én zéi'mo makailek, niitumo ni sia é niahkit néramokané i muntep witi Damsyik.

⁹ Teluna endo ung kauré sia in zéi'kan makailek wo zéi'kan mahkan wo mahelep.

¹⁰ Im witi Damsyik ém wéwéhan si tou mahkiit an tutuzu' ni Yesus Mahpiara si makangaran Ananias. A ni sia nuwu'ala ni Mahpiara witu um pina'ilekna. Ni sia én tinawahla ni Mahpiara, “Ananias!” A sia mingkotla, “Kenumo aku, Mahpiara!”

¹¹ Ang kuan ni Mahpiara, “Rumendaiomé wo mangémo witi walé ni tou makangaran Yudas witi lalan makangaran Lalan Terén. Im witu ém penéronnula si tou makangaran Saulus si witi Tarsus a méyé. Ni sia éng karegas i mengaléi.

¹² Si Saulus ém wéwéhano um pina'ilek. Im witu um pina'ilekna itii, ni sia é nimilek si tou makangaran Ananias nimuntepa a mazumeta' u lengenna wo sia toro milek sumaup.”

¹³ A mingkotla si Ananias, “Azo Mahpiara. Tinalingakumola wia sé tou lakez an tumoro si tou itii. Totozo lakez sé tou-Mu witi Yerusalem sé zinézéhana.

¹⁴ Wo ni sia kasii i niméyé wia'i éng karia ung kawasa méiwéhémé né tonaas né walian witi Yerusalem in tumion sé tou mahtawah u ngaran-Mu.”

¹⁵ Taan si Mahpiara nimuwu'ma wia ni sia, “Mangémo! Pahpaan si tou itii ém pinéléng-Kumo i maéndo tou mahpaayang wia ni Aku i mahwoka' u ngaran-Ku wia sé tahsasana wanua walina wo wia sé kolano wo kasii wia sé tou Israel.

¹⁶ Ni Aku in esa si mapata'u wia ni sia, an zézéha totoz lakez a léwo'zéi' im pendanenna pahpaan u ngaran-Ku.”

¹⁷ A si Ananias mangé witi walé pahento'an ni Saulus a muntepa witu. I nimahilekanola karia ni Saulus, si Ananias zimeta'ma u lengenna wia si Saulus ang kumua, “Saulus, katuariku, si Yesus Mahpiara si nimatu ni aku i méyé wia ni ko. Ni Sia si nimapailek un tou-Na wia ni ko witi lalan i mahéyé wia'i. Ni Sia si nimatumé ni aku i méyé wia ni ko wo ko toro milek sumaup wo mawuta-wuta ung kawasa ni Roh Lenas.”

¹⁸ In toro niitukan, wéwéhan un tanu an erap nimagogomé im witu um werenna, a sia toromo mahilek sumaup. A sia rumendaié a saranila.

¹⁹ Sia kumanla a maenté'mé sumaup. Si Saulus ém woopé' pirana endo i nimahento'mé witi Damsyik karia né mahkii-kiit si Mahpiara.

Si Saulus mahwoka' tumoro si Yesus im witi Damsyik

²⁰ In toro niitu kangkasii ni sia mahuntepa wana am walé peraragésan né tou Yahudi wo mahkua wia sé tou i si Yesus én Oki' ni Opo Empung.

²¹ Péléng sé tou timalinga si Saulus é mengusi-ngusingsing a mahkua, “Zéi'kankuaa si tou kenu si mahwunu' sé tou mahtawah u ngaran ni Yesus witi Yerusalem? Zéi'kankuaa sia i niméyé wia'i é métumion sé tou mahtawah u ngaran ni Yesus wo mahwali sé tou itii wia sé tonaas né walian?”

²² Taan si Saulus éng katulapnamo i mahwoka' wia sé tou i si Yesus é Mesias. Pahpaano niitu, sé tou Yahudi witi Damsyik é nimalinganga wo zéi'mo mata'u kumua ing kura.

²³ Maapuma um woopirana endo, a mahesaala sé tou Yahudi i mahwuwunu' ni sia.

²⁴ Taan kinata'uan umanla ni Saulus ung genang léwo' néra itii. Endo wo wengi ni séra é mahtéiz witi loloangan um wanua tua'na wo toro munu' ni sia.

²⁵ Niitumo witu u sana wengi, sé mahkii-kiit ni sia é nimahwalima ni sia witi wawo u ri'riz mésel u makaliklik um wanua tua'na a sia itonton nérama karia ung karaya tua'na.

Si Saulus im witi Yerusalem

²⁶ Kumawusa niitu, si Saulus nimangé witi Yerusalem. I ni sia méikaayomola witu, ni sia ma'wa' i makimaria sé mahkii-kiit si Yesus Mahpiara. Taan ni séra péléng é maindé' wia ni sia pahpaan zéi'kan pa'émanen néra sa ni sia én uli-ulit mahkiito un tutuzu' ni Yesus.

²⁷ Taan wéwéhan si makangaran Barnabas nimahwalima si Saulus i nimangé wia sé aatu ni Yesus. Ni sia simirita wia sé aatu ni Yesus kura si Saulus i nimilek si Yesus Mahpiara witi lalan mangé witi Damsyik. Wo kura si Mahpiara i nimuwu' wia ni sia wo kasii kura ung kawuayana i mahwoka' tumoro u ngaran ni Yesus wia sé tou witi Damsyik.

²⁸ Niitumo, si Saulus nimento' mahwali-wali karia néra witi Yerusalem, wo karia im wuaya ni sia mahwoka' wia sé tou u ngaran ni Yesus Mahpiara.

²⁹ Si Saulus kasii é mahnuwu' wo mahzéi-zéi'an karia né tou Yahudi sé mahnuwu' karia a nunuwu'en né Yunani, taan ni séra mahtututu' i munu' ni sia.

³⁰ Ing kinata'uanla né katuari esa pa'émanen ung ginenang néra itii, ni sia é méipahwali nérama witi Kaisarea. Im witumokan a sia pekiangé néra witi Tarsus.

³¹ Kumawusa niitu, péléng sé jamaat witi Yudea, Galilea wo Samaria é mahlé'o-lé'osan. Pahpaan u sasawang ni Roh Lenas, um pa'émanen néra éng kaenté'namo, maindé' wia si Opo Empung wo ni séra kangkasii éng kalakeznamo.

Si Petrus im witi Lida

³² In toro niitu, si Petrus é mahliklik mahangé wia sé jamaat wisa uman ni séra. Ni sia én timulima wia sé tou ni Mahpiara sé mahento' witi Lida.

³³ Im witu ni sia nimahilekan karia ni tou makangaran Eneas, si waluna ta'uno i meneke-nekelokan pahpaan i lailai.

³⁴ Ang kuan ni Petrus wia ni sia, “Eneas, ni ko é liné'osoma ni Yesus Kristus. Niitumo tumoozomé wo imekenoma un tetekelannu!” In toro niitukan, si Eneas tumoozé.

³⁵ Im péléng sé tou witi Lida wo Saron nimilek si Eneas i lé'oso, ni séra é nima'éman wia si Yesus Mahpiara.

Si Petrus im witi Yope

³⁶ Im witi Yope, wéwéhan si wéwéné ma'éman si Yesus makangaran Tabita. (Im witu u nunuwu'en Yunani u ngaranna én Dorkas). Ni sia é makalakez mahwangun a lé'os wo meméméhé a sasawang.

³⁷ In toro niitu, ni sia é nimasaki a matéla. Kumawusa niitu a lelé'en nérala un awakna, an izeta'la witi welah atas.

³⁸ Sé tou ma'éman wia si Yesus witi Yope én timalingala i si Petrus ém witi Lida, um wanua zéi'kan tahlous zou' im witi Yope. Niitumo ni séra nimatuma sé tou zua i matumawah si Petrus karia kumua in téntii, “Pahrewekomé méyé wia ni kai.”

³⁹ Timalingala niitu, a si Petrus rengan nimimekla a mangé karia néra witi Yope. I méikaayomoma wana, a sia ipahwali nérama witi welah atas. Péléng sé wéwéné mahesa-esamokan é marimété si Petrus. Karia i mahamé' ipapailek nérala wia ni sia péléng ang karai wo ang karai tonton am winilit ni Dorkas i ni sia memali-malipé' karia néra.

⁴⁰ Taan ni séra péléng é méipekiondola ni Petrus. Ni sia kumuruzla a mengaléi. Ni sia sumarula un awak ni tou nimaté itii ang kumuama, “Tabita, tumoozomé!” A si Tabita mukamé um werenna. Kaiileknala si Petrus a sia tumoozé a rumumezla.

⁴¹ Tionala ni Petrus u lengen ni Tabita a sawangannala sia i rimendaié. An tawahené ni Petrus sé tou ni Mahpiara wo sé wéwéné mahesa-esamokan, an ipapaileknala wia ni séra i si Tabita é nimatoumomé sumaup.

⁴² U nimamuali itii é méikawoka'ma wia péléng sé tou witi Yope wo lakez sé tou é nima'éman wia si Yesus Mahpiara.

⁴³ Si Petrus ém woopirana endo i nimahwiti-witimé Yope, witi walé ni Simon si mahpaayang mahweresi ang kulit né binatang.