2 Korintus 9 - Taaz Weru Witu u Nunuwu'en Tombulu

A sasawang wia sé jamaat witi Yudea

¹ Zéi'mo ipantikkuma wia ni kamu tumoro un isawang sé tou linenas ni Opo Empung witi Yudea.

² Pahpaan kata'uangkumo i ni kamu én totoz mahpaa-paaz i sumawang. Ni kamu é méipahloo-loozku wia sé tou ma'éman witi Makedonia. Méipahkuakumola wia sé tou ma'éman witi Makedonia sa ni kamu im witi Akhaya i nanta'un é nimimeko i méhé an zoit sasawang. In tarékan, ung kapaaz niou itii é nimangun sé tou ma'éman witi Makedonia in totoz mahpaa-paaz kangkasii mahwéhé an zoit sasawang.

³ Taan zozo'pé' in téntu, si Titus wo sé zua katuari esa pa'émanen é méiatuku i mangé wia ni kamu i sumawang ni kamu. Karia in téntu, u méipeloo-loozkumola tumoro ni kamu én zéi'kan sirita towo uman. Kapaazku an zoit sasawang é rinéwokola, un tumuzu'mé i ni kamu é nimimekola tanu u méipahkuakula.

⁴ Én taa sé tou Makedonia i mahwalimé kariaku méyé wia ni kamu, ang kata'uan nérala i ni kamu én zéi'kampé' riméwok an zoit sasawang, ni kai én totoz maizang. Pahpaan mémoikua nai wia ni séra i ni kamu én timotozola i sumawang. Sa téntu maan ni kamu kangkasii é maizang.

⁵ Niitumo, méiatuku sé katuari esa pa'émanen itii i mapuunama mangé wia ni kamu witi Korintus, wo séra toro sumawang ni kamu i mimek an zoit sasawang, a méikua niouo in iwéhé. Sa kamu nimimeko, niitu un tumuzu'mé i ni kamu én uli-ulit paaz mahsawang, zéi'kan pahpaan im pahlusun.

Mahsawangla karia i mahpaa-paaz

⁶ Wéhanla genang ang kenu: séi si kimeroz un toyo', un upu'enna kangkasii én toyo' uman. Taan séi si lakez a méikeroz, un upu'enna kangkasii é lakez.

⁷ Péléng sé tou é léwo'zéi' i mahwéhé a sasawang mengiit ung kapaazna. Tia' mahwéhé a sasawang sa niitu é mahwangun uman un até i rumara kaapa im pahlusun, pahpaan si Opo Empung é rumaraaté sé tou mahwéhé karia i mahpaa-paaz.

⁸ Si Opo Empung makawawa i méhé péléng ang kamang tatambér-Na wo sekezé péléng am pemandungen niou ém pakawutulen. Lumousé niitu, am wia ni kamu é malake-lakez i mangun a lé'os wia sé tou walina.

⁹ Méipantik witu um Pinantik Lenas én téntii, ‘Si Opo Empung é mahwéténg, ni Sia mahwéhé wia sé tou zéi'kan siapa apa, wo um pahwangunen-Na un ulit én zéi'kan mahzéi-zéi'la makaz ing kauré-uré.’

¹⁰ Si Opo Empung si mahtambéré am watuna tatanemen wia sé mahkeroz wo mahwéhémé wia ni kita ang kakanen ing kanen. Ni Sia kangkasii si mahimeké am watuna tatanemen wia ni kamu wo nimangun am watuna tatanemen itii i malake-lakez wo tumoumé am wua'na kaulitan wia ni kamu.

¹¹ Ni kamu é mawa'ilan im wana am péléng wo ni kamu sekezé é meripu' umané i mahwéhé, u mangun sé tou lakez mahkua u makasé wia si Opo Empung pahpaan ni kai.

¹² Pahpaan a sasawang niou in isawang sé tou ni Opo Empung sé zéi'kan siapa apa witi Yudea, zéi'kan uman i mahwuwutul am pemandungen néra, taan niitu kangkasii é mangun lakez sé tou mahkua u makasé wia si Opo Empung.

¹³ I sé katuarita nimakailekla an zoit sasawang itii, ni séra é mahlooz wo mahsigi' si Opo Empung, un tumuzu'mé i ni kamu én uli-ulit kimiit wo ma'éman u Nuwu' Lé'os tumoro si Kristus. Ni séra é mahlooz wo mahsigi' si Opo Empung pahpaan i niilek nérala ni kamu é meripu' umané i mahwéhé a sasawang wia ni séra wo wia péléng sé tou.

¹⁴ Ni séra é rumaraaté ni kamu, makaz ni kamu én ipahpengaléi néra, pahpaan ung kamang méitambér ni Opo Empung é lakezo wia ni kamu.

¹⁵ Makasé wia si Opo Empung, pahpaan u méitambér-Na wia ni kita én zéi'mo kakuaan.