2 Korintus 7 - Taaz Weru Witu u Nunuwu'en Tombulu

¹ Katuari-katuari ikararaatéku. Ni kita é nimakaileko a méitaaz ni Opo Empung. Niitumo, kumana'mola i memua-muali a singkéla', u mahwangun un tou wo si rohta makati'tiren. Ni kita é mahsigi'la wo maindé'la wia si Opo Empung wo péléng ung katou-touanta u linenas-Na é malekep.

Sé tou Korintus timula'umola a singkéla' néra

² Katuari-katuari, sungkulené kai karia u raraaté. Ni kai én zéi'kan siapa sinala'la wia si séi uman, zéi'kan siapa zozo' in esa si tou tinowoan nai wo zéi'kan siapa zozo' in esa si tou niéndoan nai kauntungan.

³ Ni aku éng kumuama in téntu, zéi'kan i mukum ni kamu, taan tanu u mémoikuaku, ni kamu ém pahwéhan nai genang. Ni kai én zéi'mo toro patampasen karia niou, ni kita é nimaesamo i menou-noupé' kaapa i matéma.

⁴ Ni aku én totoz ma'éman wia ni kamu, lumouspé'tarémé niitu ni kamu én ipahloo-loozku. Im wana péléng an zézéha nai, ni kamu é mahenté' un atéku wo totoz mahwéhé a makapaazen.

⁵ I méikaayola witi Makedonia, ni kai én zéi'kan siapa oras ing kumana'. Lakez an zézéha pahsarun nai: Sé tou mahsaru ni kai wo un indé' witu un tou nai.

⁶ Taan si Opo Empung si mahenté' an até né tou sé kimana'mola i mengalé-ngaléi é nimenté' un até nai i si Titus niméyé.

⁷ Zéi'kan uman si Titus i niméyé u nimenté' un até nai, taan u nimenté' un até nai kangkasii éng kura ni kamu i mahenté' un aténa. Méikuana ni kamu én totoz lumelo i mahilekan kariaku, totoz pene'selen niou am winangun nioula, pahtututu'en niou i mahkelung ni aku. Pahpaano niana, ni aku én totoz mahpaa-paaz.

⁸ Niitumo, zozo' um pinantikku nimangunola un até niou i rumara, ni aku én zéi'kan mene'sel. Totoz ulit ni aku é mene'sel i nimantika um pinantik itii, pahpaan kata'uangku niitu é nimangunola un até niou rumara zozo' in zéi'kan uré.

⁹ Taan in tarékan ni aku é mahpaa-paaz, zéi'kan pahpaan im winangunkuma un até niou i rumara, taan pahpaan un até niou i rumara a ni kamu tumula'ula a singkéla' niou ang kumiit um paaz ni Opo Empung. U merara un até niou itii ung kapaaz ni Opo Empung. Niitumo, zéi'kan siapa u nimaina'mé wia ni kamu zozo' in toyo' uman pahpaan um pinantikku itii.

¹⁰ Pahpaan u rumara un até mengiit um paaz ni Opo Empung nimangun si tou timula'u a singkéla' pahwangunenna, a sia ipiloté im witu un ukuman wana a singkéla'. U rumara un até tanu niitu én zéi'kan mangun mene'sel. Taan u rumara un até né tou zéi'kan mahkiit ung kapaaz ni Opo Empung, zéi'kan nimangun si tou itii in timula'u a singkéla' pahwangunenna, si tou itii én iwali witu um patéan makaz ing kauré-uré.

¹¹ Amoké pakagena-genangen nioula! Pahpaan u merara un até ung kapaaz ni Opo Empung nimamuali wia ni kamu, nimangun ni kamu kalousna mahtututu', mapailek i ni kamu zéi'kan mahsingkéla' wo u nimangun ni kamu maupi' wia sé tou mahwangun a singkéla' wo maindé' sa zéi'kan uli-ulit mahkiit si Opo Empung. Niitu kangkasii u nimangun ni kamu i lumelo wo totoz mahtututu' i mahwangun a lé'os, kapaaz niou sé tou mahsingkéla' én ukumen. Im wana niana péléng tumuzu'mé i ni kamu én zéi'kan siapa a sinala'.

¹² Niitumo, ni aku i nimantik um pinantik méiwéhé wia ni kamu, zéi'kan pahpaan si tou simala', kaapa si tou zézéha pahpaan a sinala' itii. Ni aku i nimantik um pinantik itii, ung kalakoana ni kamu én toro mata'ula i ni kamu én uli-ulit mahwéhé genang wia ni kai witu u sinaru ni Opo Empung.

¹³ Pahpaan ni kamu ing kimiit a méipantikku itii, un até nai éng kaenté'na. Un até nai én zéi'kan uman kaenté'na, taan kangkasii kalousna i mahpaa-paaz i nimata'ula si Titus é mahpaa-paaz. U mahpaa-paazna ém pahpaan ni kamu é nimangun un aténa nimaenté'.

¹⁴ I si Titus zéi'kampé' nimangé wia ni kamu, ni kamu é méipahloo-loozku wia ni sia, wo ni kamu én zéi'kan mapaiza-izang ni aku. Péléng a méikua nai wia ni kamu én ulit. Téntu kangkasii péléng a méipahloo-looz nai tumoro ni kamu wia si Titus én ulit.

¹⁵ U raraatéanna wia ni kamu éng kalousna, im pahgenangennala ni kamu é mahtali-talinga ni sia, wo ni kamu kangkasii simungkul karia i maindé' wo mahsigi-sigi' ni sia.

¹⁶ Ni aku é mahpaa-paaz, pahpaan ni kamu én toro pa'émanengku im wana am péléng.