2 Korintus 2 - Taaz Weru Witu u Nunuwu'en Tombulu

¹ Niitumo, ni aku én timotozola in zéi'mo mangémé sumaup wia ni kamu i mangun un até niou rumara.

² Pahpaan sa wangunengkuma un até niou rumara, zéi'mo siapa tou si mamenté' un atéku pahpaan winangunkumoma un até niou i rumara.

³ Pahpaano niitu, ni aku nimantik um pinantikku itii wo sa ni aku méyé sumaup wia ni kamu, un atéku én zéi'kan rumara i milekla ni kamu sé tou totoz mangun un atéku mahpaa-paaz. Un totoz kata'uangku, sa ni aku mahpaa-paaz, maan ni kamu péléng kasii é mahpaa-paaz.

⁴ Taan i ni aku nimantik um pinantikku itii, in toro niitu un atéku én totoz rumara, totoz paharétan wo mahamé'. Ung kalakoan ni aku i nimantik um pinantik itii, zéi'kan mahwawangun un até niou i rumara, taan wo kata'uan nioula i ni aku én totoz rumaraaté ni kamu péléng.

Ampungala si tou nimangun ang kasumalaan

⁵ Sa wéwéhan si tou simala'la a mangun un até rumara, zéi'kan un atéku u rumara, taan péléng ni kamu kaapa sé woopira im wia ni kamu sé rumara un até néra. Ni aku éng kimuama im woopira uman im wia ni kamu, pahpaan ni aku é soo kuan in tahlouso.

⁶ Wo wia si tou si nimangun un até niou rumara, sé lakez im wia ni kamu é nimukum ni sia, téntumo un ukuman wia ni sia.

⁷ In tarékan, ampunganola ang kasumalaanna wo enté'ela sia wo un aténa zéi'kan totoz rumara wo sia zéi'kan ikaléwo'.

⁸ Pahpaano niitu, ni kamu é sésaangkuma wo ni kamu mapailekla in totoz rumaraaté ni sia.

⁹ Ung kalakoan ni aku i nimantik um pinantik itii an iwéhé wia ni kamu é mahtata'u sa a méipahkuakuma wia ni kamu ém péléng pahwangunen niou kaapa zéi'kan.

¹⁰ Pahpaan, sa ang kasumalaan ni tou én niampungan nioula, ni aku kangkasii é méhé un ampungan wana ang kasumalaan ni tou itii, sa uli-ulit im wéwéhan un totoz ampungangku wia si tou itii. Pahpaan ung kawangunan niou witu u sinaru ni Kristus, ni aku méhé un ampungan wana ang kasumalaanna.

¹¹ Winangunku téntu, wo kita zéi'kan towoan ni tonaas né sétang, pahpaan kata'uanta ung ginenangna.

Si Paulus im witi Troas

¹² Ikaayola ni aku witi Troas i mahwoka' u Nuwu' Lé'os tumoro si Kristus, ni aku ém winukaané ni Opo Empung lalan i maayang wana.

¹³ Taan un atéku én zéi'kan katu'tulan, pahpaan zéi'kampé' nimahilekan wo si Titus, si katuari esa pa'émanen. Pahpaano niitu, ni aku timuzu'la a mangé witi Makedonia.

Um paayangen ni Paulus

¹⁴ Taan ni aku éng kumuama u makasé wia si Opo Empung, pahpaan ni Sia si nimaéndo tonaas si sekezé én timatér ni kai karia ung kawasa ni Kristus, makaz ni kai toro muntung. Ni kai é méiatu ni Opo Empung wo séra mata'u si Kristus, tanu u mahwou tariis ing kawouanna né tou lakez wisa uman un angéan nai.

¹⁵ Im wia si Opo Empung, ni kai én tanu u mahwou tariis um wia si Kristus a méyé, wia sé tou maipilot im witu un ukuman wana a singkéla' wo wia sé tou maléwo'en.

¹⁶ Im wia sé tou maléwo'en, ni kai é mahwou wuul pahpaan ni kai é mahwoka' i si Opo Empung é maluméwo' ni séra. Wo wia sé tou méipiloté im witu un ukuman wana a singkéla'na, ni kai ém pahkuan néra i mahwou tariis. Taan séi si makawawa i maayang am paayangen kenu?

¹⁷ Ni kai én zéi'kan mahwangun tanu sé tou lakez walina, pahpaan ni séra i mahwoka' u Nuwu' ni Opo Empung én tanu mahwangkér i menéro uman ang kawa'ilanan néra. Taan ni kai i mahkiit si Kristus én uli-ulit mahwoka' uman u Nuwu' ni Opo Empung wia sé tou, witu u sinaru-Na wo mahkiit uman a méiperénta-Na.