2 Korintus 12 - Taaz Weru Witu u Nunuwu'en Tombulu

Si Paulus mahkua a niilekna

¹ Ni aku én totoz mahlooz un touku, zozo' ing kata'uangkumo u mahlooz itii én zéi'kan siapa torona. Taan, ni aku éng kumua wia ni kamu a méipapailek ni Opo Empung wia ni aku wo a méipapata'u-Na wia ni aku.

² Kata'uangku wéwéhan si tou ma'éman wia si Kristus, mapulu' wo epatna ta'un limangkoila, si tou itii kumompo'mé ém winénétoma witi kasendukan katelu. In toro niitu, zéi'kan kata'uangku sia im winénéta ém winénéta karia un touna kaapa akaz uman si rohna si winénéta. Si Opo Empung uman si mata'u niitu.

³ Si tou itii éng kata'uangku, taan zéi'kan kata'uangku sa sia im winénéta karia un touna kaapa zéi'kan. Si Opo Empung uman si mata'u niitu.

⁴ Kumompo' umané si winénétoma mangé witi Firdaus. Im wana an tinalinga ni tou itii a nuwu' zéi'kan kakuaan makaz in zéi'kan siapa im wia peléng sé tou si toro kumua a nuwu' itii.

⁵ Ni aku toro mahlooz si tou tanu ni sia, taan zéi'kan toro mahlooz un touku. Sa ni aku mahlooz un touku, ni aku é mahlooz an zéi'kan enté' im wia ni aku.

⁶ Sa ni aku paaz lumooz un touku, ni aku én zéi'kan tou lemou pahpaan ni aku é mahkua an ulit. Taan ni aku nimenes umanla wo sé tou zéi'kan mahgenangla i ni aku é lumousé a niilek néra, kaapa an tinalinga néra wia ni aku.

⁷ Taan wo ni aku zéi'kan maloozan pahpaan an zéi'kan kakuaan a méipapata'u ni Opo Empung wia ni aku, ni aku é nimakailek u saki. U saki itii nimangun ni aku in totoz zézéha, niitu én tanu u susulah witu un touku méiwéhémé ni tonaas né sétang wia ni aku wo ni aku zéi'kan maloozan.

⁸ Tumoro u saki kenu, ni aku é makatelumo nimahaléi wia si Opo Empung i lumé'os u sakiku.

⁹ Taan winingkot umané ni Opo Empung, “Ung kamang méitambér-Ku wia ni ko én toromo. Pahpaan, i ni ko zéi'kan enté' ung kawasa-Ku totoz nimalekep.” Niitumo, ni aku mahpaa-paaz i mahlooz un touku in zéi'kan enté', wo kapenda-pendanangku ung kawasa ni Kristus é memali-mali kariaku.

¹⁰ Niitumo, ni aku é mahpaa-paaz zozo' un touku in zéi'kan enté', pahséro'an, wana ang kasusaan wo pahzézéhan, lakez am pengalin pahpaan mahkiit si Kristus. Pahpaan i ni aku zéi'kan enté', in toro niitumo ni aku nimaenté'.

Un ikaindé' ni Paulus wia sé tou ma'éman sé witi Korintus

¹¹ Ni aku é nimalemouola pahpaan ni kamu sé nimangun ni aku nimaténtu. Un ulitna, ni aku si totoz loozen niou. Pahpaan zozo' wéwéhan sé mahkua ni aku in zéi'kan siapa torona, taan im wana am péléng, sé aatu towo itii én zéi'kan lumousé ni aku.

¹² Ni aku i memali-malipé' karia niou, ni aku mapailek wia ni kamu an tumuzu'mé i ni aku én uli-ulit aatu ni Yesus, ni aku én ezen zozo' im pahzézéhan. Wo ni aku é nimangun a makakompo'en, an zéi'kan kakuaan an tumuzu'mé ang kawasa ni Mahpiara.

¹³ Um pakahpaayangku im wia ni kamu wo sé woopira jamaat walina é masuat uman. Un zéi'kan masuat én akaz uman: ni aku én zéi'kan kawisa nimaéndo pengalin im wia ni kamu i mahwuwutul am pemandungengku. Sa ni aku i mangun niitu ém pahgenangen nioula i simala', ampungané ni aku.

¹⁴ In tarékan éng katelumo ni aku nimimek i mangé wia ni kamu. Wo ni aku i mangé wia ni kamu én zéi'kan i maéndo pengalin im wia ni kamu, pahpaan zéi'kan u sangkum niou um penérongku taan um penérongku én tou niou. Pahpaan zéi'kan sé koki' sé totoz mahwuwutul am pemandungen né tu'a néra, taan sé tu'a sé totoz mahwuwutul am pemandungen né koki' néra.

¹⁵ Niitumo, kapaazku i méhé péleng an anuku i sumawang ni kamu, taka-takazan ung katou-touangku én iwéhéku i sumawang ni kamu. Téntu um wangunengku i mapailek i ni aku én totoz rumaraaté ni kamu, taan ni kamu én zéi'kan tahlous rumaraaté ni aku.

¹⁶ Ni kamu mahkua ni aku én zéi'kan maéndo pengalin wia ni kamu. Taan wéwéhan sé mahkua ni aku é siga' menowo, i mahééndo an anu niou.

¹⁷ Im wia sé méiatuku i mangémé wia ni kamu, wéwéhan wé sé méiatuku i matumowo i mahééndo an anu niou?

¹⁸ Si Titus é méiatuku i mangé wia ni kamu. Ni aku kasii é nimatuma si katuari ma'éman walina i mangé kariana. Si Titus én zéi'kan kawisa timowo i ma'éndo an zoit niou. Ung ginenang wo um pahpaayangengku é masuat wo si Titus.

¹⁹ Kaa kamu ém woo mahgenangla péléng am pinantik nai kenu é mahuulit un tou nai? Zéi'kan ndootuu! Katuari-katuari ikararaatéku, a mémoipahkua nai wia ni kamu én ulit im witu u sinaru ni Opo Empung. Ni kai i mahkua téntu pahpaan ni kai é mahkiit um paaz ni Yesus Kristus. Wo péléng a méipahkua nai wia ni kamu é maheenté' um pa'émanen niou.

²⁰ Pahpaan ikaarétku, sa ni aku méyé wia ni kamu, um pahwangunen niou zéi'kan kapaazku wo um pahwangunengku zéi'kan kapaaz niou. Ikaindé'ku kasii ni kamu ém wéwéhan sé mahéndo-éndoan, mahtétéutéuan, mahuupi'an, mahgenang uman un touna, mahtawuruk, wayaan uman kanuwu'an, loozan wo mahkayo' sé tou.

²¹ Ni aku kasii é maindé', sa ni aku méyé sumaup, si Opo Empung mapaiza-izang ni aku witu u sinaru niou makaz un atéku i rumara. Pahpaan, im wia ni kamu é lakezpé' sé memangu-mangunpé' a singkéla' rengan im puuna wo zéi'kampé' timula'u a saparuni, a samek wo mahwangun ang kaizangnokané.