2 Korintus 10 - Taaz Weru Witu u Nunuwu'en Tombulu

Si Paulus mahkelung am pinaayangna

¹ Ni aku Paulus, si pahkuan niou in zéi'kan wuaya sa nimasaruan karia niou, taan wuaya uman im wana am pinantikku sa nimazou'an karia niou. Ni aku mahaléi wia ni kamu witu u ngaran ni Yesus Kristus si roros até wo lé'os uman.

² Tia' menutu' ni aku im wuaya i nimasaruan karia niou i ni kita mahwali-wali. Pahpaan ni aku éng gimenang i mapailek i ni aku én totoz wuaya wia sé woopira tou im wia ni kamu, sé mahkua ni kai i menou-nou é mahkiit uman ang kapaaz wia ung kaayahan.

³ Zozo' ni kai é menou-noupé' wia ung kaayahan, taan um pakahsaru nai sé tou mahtuzu' an zéi'kan ulit én zéi'kan tanu um pakahsaru né tou wia ung kaayahan.

⁴ Pahpaan an ipahkoro' nai i mahsaru sé kakoro' én zéi'kan wia ung kaayahan a méyé, taan an ipahkoro' nai ém wia si Opo Empung a méyé karia ung kawasa-Na, un toro kumemu an tampa totoz enté' winangun né kakoro'.

⁵ Ni kai kimala ang kaweraan a mahraung sé tou i mahtata'u si Opo Empung. Ni kai kasii kimala ang genang né tou wo mahwangun ni séra mahtali-talinga wia si Kristus.

⁶ Sa kamu uli-ulito i mahtali-talinga si Kristus, taré kai mukum séi si mahsaru si Opo Empung.

⁷ Ilekela wo kata'uan nioula am witu u sinaru niou! Sa si tou uli-ulit ma'éman i ni sia én anu ni Kristus, ni sia kangkasii én totoz i mahgenangla witu un touna in esa i ni kai én anu ni Kristus tanu ni sia.

⁸ Ni aku én zéi'kan maizang zozo' ni aku tahlous mahlooz un touku, i mahkua ung kawasa méiwéhé ni Opo Empung wia ni kai. Pahpaan ni Sia i niméhé ung kawasa itii wia ni kai, zéi'kan i luméwo' um pa'émanen niou, taan i mahenté' um pa'émanen niou.

⁹ Kasooku sa am pinantikku a méiwéhéku wia ni kamu ém pahkuan niou i ma'indé' ni kamu.

¹⁰ Pahpaan wéwéhan sé mahkua, “Um pakahnuwu' ni Paulus én totoz mengéndo im wana am pinantikna, taan sa nimasaruan, um pakahnuwu'na én zéi'kan mengéndo wo zéi'kan siapa torona.”

¹¹ Taan si tou mahkua an téntu é léwo'zéi' mata'ula sa am wangunen nai i nimasaruan karia niou é masuat uman wo a méikua naimola wana am pinantik nai i ni kita zéi'kan nimasaruan.

¹² Ni kai én zéi'kan wuaya i mangun un tou nai masuat kaapa zéi'kan masuat wo sé tou mahlooz un tou néra in esa. Ni séra é mahukur un tou néra karia an ipahukur néra in esa wo pahpasuaten néra un tou néra karia un tou nérakan. Ni séra ndootuu in téntu én zéi'kan siapa kata'uan.

¹³ Ni kai én zéi'kan téntu. Ni kai i mahlooz zéi'kan lumousé un toro ipahloo-looz nai, um pahloozen nai én akaz uman um pinaayang nai wana an tampa méitotoz ni Opo Empung im paayangen nai. Ni kamu kangkasii é méikauntep wana an tampa méitotoz wia ni kai.

¹⁴ Ni kai i mahwoka' u Nuwu' Lé'os tumoro si Kristus é méikaayomoma wia ni kamu wo ni kai én zéi'kan limeweta taan nimakaz umanla witu un tampa tinotozo im pahpaayangan nai.

¹⁵ Ni kai én zéi'kan mahlooz un tou nai im wana am pinaayang né tou walina, wana an tampa an zéi'kan tinotoz im pahpaayangan nai. Taan ni kai é mengalé-ngaléi in tumondong sa um pa'émanen niou éng kaenté'namo, ni kai én toro maayang wia ni kamu lumouspé'mé an tampa walina an tinotozo im pahpaayangan nai.

¹⁶ Karia in téntu, ni kai én toro mahwoka' u Nuwu' Lé'os wana an tampa zumou'pé'ma im witu un tampa niou wo zéi'kan mahlooz am pinaayang né tou walina wana an tampa méitotoz wia ni séra im pahpaayangan néra.

¹⁷ Méipantik witu um Pinantik Lenas én téntii, “Séi uman si mahlooz, tawimo sia mahlooz um winangun ni Opo Empung.”

¹⁸ Pahpaan zéi'kan si tou mahlooz un touna in esa si ulit im witu u sinaru ni Opo Empung, taan si tou pahloozen ni Opo Empung.