1 Tesalonika 1 - Taaz Weru Witu u Nunuwu'en Tombulu

U sigi'

¹ Um pinantik kenu ém wia ni aku Paulus wo wia sé kakariaku si Silas wo si Timotius a mangé. Um pinantik kenu én iwéhé wia ni kamu sé jamaat witi Tesalonika. Ni kamu é ma'éman wia si Opo Empung Ama'ta wo wia si Yesus Kristus Mahpiara. Mengalé-ngaléi uman ung kamang tatambér wo ung kaluasan witu un até, um wia si Opo Empung é menaté-natér ni kamu.

Si Paulus mahkua u makasé wia si Opo Empung

² Ni kai sekezé é mahkua u makasé wia si Opo Empung pahpaan ni kamu péléng wo ni kamu sekezé én ipahpengaléi nai.

³ Sekez kai i mengaléi wia si Opo Empung wo si Ama'ta, ni kamu ém pegena-genangen nai pahpaan am pahpaayangen niou i ma'éman wo kura kamu i mahsawang sé tou walina pahpaan rumaraaté ni séra wo kasii pahpaan ung kaezenan niou i mahéré' wo ma'éman uman wia si Yesus Kristus Mahpiarata, zozo' in zézéha.

⁴ Katuari-katuari sé ikararaaté ni Opo Empung. Kata'uan nai, ni kamu ém pinéléng-Namo.

⁵ Pahpaan u Nuwu' Lé'os tumoro si Yesus un ipahtuzu' nai wia ni kamu én zéi'kan uman karia u nunuwu'en, taan karia ung kawasa ni Roh Lenas wo karia ung kaulitan u Nuwu' Lé'os un totoz kata'uan nai. Kata'uan niouo kura ni kai mahpaayang i mahsawang ni kamu, i ni kai memali-mali karia niou.

⁶ Ni kamu é nimahkérémola wia ni kai wo nimahkérémola wia si Yesus Mahpiara. Zozo' ni kamu én totoz zézéha, ni kamu é simungkul u Nuwu' ni Opo Empung un ipahtuzu' nai wia ni kamu karia u mahpaa-paaz u méiwéhémé ni Roh Lenas.

⁷ Karia in téntu ni kamu é nimaéndomola kékéréan wangun péléng né tou sé ma'éman wia si Yesus sé witi tana' Makedonia wo Akhaya.

⁸ Pahpaan rengan wia ni kamu in tou Tesalonika, u Nuwu' ni Opo Empung é méikawoka'moma zéi'kan uman witi tana' Makedonia wo Akhaya, taan kangkasii u sirita tumoro kura kamu i ma'éman wia si Opo Empung é méikawoka'moma wana péléng an tampa, taka-takazan zéi'mo siapa un ikua naima tumoro niitu.

⁹ Pahpaan ni sérakan sé simiritala kura kamu i simungkul ni kai wo kura kamu in timula'u sé opo-opo a menéro si Opo Empung si menou-nou wo ulit, i maayang wia ni Sia.

¹⁰ Ni séra kasii sé simirita tumoro kura kamu i ma'ento' si Yesus, si Oki' ni Opo Empung si witi kasendukan wo méyé, si méitoumé sumaup ni Opo Empung im wia sé nimaté, si milot ni kita sé ma'éman wia ni Sia im witu un upi' ni Opo Empung u méyé in tumondong.