1 Korintus 6 - Taaz Weru Witu u Nunuwu'en Tombulu

Tia' mahwali si katuari esa pa'émanen witi pahtotozan

¹ Sa wéwéhan im wia ni kamu si tou ma'éman mahéndo-éndoan karia ni kasuat tou ma'éman, kaa kahuman ni sia zéi'kan mahaléi wia sé tou ma'éman wia si Opo Empung, taan nimahaléi uman taré wia si tou si zéi'kampé' mata'u si Opo Empung in tumotoz am pahéndo-éndoan néra itii?

² Kaapa zéi'kan kata'uan niou wé, i ni kamu in tou ni Opo Empung én tumotoz in ulit kaapa zéi'kan am pahwangunen né tou wia ung kaayahan? Niitumo, sa kamu tumotoz am pahwangunen né wia ung kaayahan, kaa kamu zéi'kan makawawa in tumotoz am pahéndo-éndoan za'i-za'i uman?

³ Zéi'kan kata'uan niou wé, i ni kita én tumotoz am pahwangunen né malaekat? Sa kita toro tumotoz am pahwangunen né malaekat, kaa kita zéi'kan toro in tumotoz a mahmuali i mendo-endo?

⁴ Niitumo, sa kamu toro tumotoz am pahéndo-éndoan tanu niana, ni kamu én tia'mo menéro tou sé zéi'kan méikarékén jamaat in tumotoz am pahéndo-éndoan niou.

⁵ Ang kenu én ikuakuma wia ni kamu i mapaiza-izang ni kamu, ‘Zéi'kan siapa tou tulap wé im wia ni kamu, si toro tumotoz am pahéndo-éndoan né tou ma'éman wia si Opo Empung?’

⁶ Kaa kamu in tou esa pa'émanen é mahéndo-éndoan karia ni kasuat tou esa pa'émanen wo mamenéro si tou zéi'kan ma'éman in tumotoz, séi si ulit kaapa zéi'kan wana am pahéndo-éndoan niou itii?

⁷ Im wéwéhan sé mahéndo-éndoan im wia ni kamu wo um pahéndo-éndoan itii pahalina witi pahtotozan, niitu un tumuzu'mé i ni kamu éng kalamo. Tawimo iwaya niouola ni kamu im pahwangunan a mahsanaweka kaapa wéwéhan a niéndo wia ni kamu.

⁸ Ni kamu é mahsanaweka wo wéwéhan u niéndo niou im wia sé tou sé tinowoan niou. Lumouspé'tarémé niitu, sé winangun niou téntu é sé katuari niou esa pa'émanen.

⁹ Kaapa zéi'kan kata'uan niou wé, i sé tou zéi'kan ulit én zéi'kan iwéhé ni Opo Empung i maéndo tou witi Kakolanoan-Na? Tia' kamu ikalulu! Sé tou: memua-muali a sinéro' im pahmualin né zéi'kampé' kimawéng, mahsigi' sé opo-opo, samek, sé tuama mahsamek karia né katuama néra, sé mahwangun a makaizangen wia sé kasuat néra,

¹⁰ sé maremu', sé angkum, sé matetewelen, sé mahtawuruk sé tou walina wo sé towo, péléng sé tou memangu-mangun tanu niana én zéi'kan muntep witi Kakolanoan ni Opo Empung.

¹¹ Sé woopira im wia ni kamu im puuna é mahlé'os an téntu. Taan in tarékan ni kamu wineresimo im wana a singkéla' niou, ni kamu é linenas ni Opo Empung wo winangun-Na ni kamu ulit witu u sinaru-Na. Niana péléng ém winangun-Na pahpaan ni kamu nimaesamo karia ni Yesus Kristus si Mahpiara wo karia ung kawasa ni Roh ni Opo Empungta.

Tia' mahsamek

¹² “Péléng am péléng én toro wangunengku,” taan zéi'kan péléng am péléng ém wéwéhan torona. Taan zozo' in esa uman, zéi'kan iwayaku un touku i maéndo ata péléng niitu.

¹³ Wéwéhan sé mahkua kasii, “Ung kakanen wéwéhan torona witu um poot wo um poot wéwéhan torona pahpaan ung kakanen.” Taan si Opo Empung é luméwo' ung kakanen wo um poot. Ni kamu én tia' mahwangun un tou niou i mahsamek, taan wangunela un tou niou i mahwangun uman ang kapaaz ni Opo Empung, pahpaan si Opo Empung si makaanu un toumu.

¹⁴ Si Yesus si Mahpiara é méitoumé sumaup ni Opo Empung im wia sé nimaté, wo karia ung kawasa-Na ni kita kasii én itou sumaup im wia sé nimaté.

¹⁵ Kata'uan niouo sa un awak niou é mémoikauntep witu un awak ni Kristus. Niitumo, toro wé um witu un awak ni Kristus in éndon wo maéndo esaané witu un awak ni wéwéné samek? Zéi'kan mamuali!

¹⁶ Kaapa zéi'kan kata'uan niou wé, sa si tuama simameko, un awakna é nimaesamo karia un awak ni wéwéné samek itii? Pahpaan méipantik witu um Pinantik Lenas, én téntii, “Un awak néra zua é maesa.”

¹⁷ Taan si tou niméhé un touna i maéndo anu ni Kristus si Mahpiara, si roh ni tou itii é maesa karia ni Roh-Na.

¹⁸ Ma'katla im wana ang kasamekan! Pahpaan si tou mahsamek, ni sia é mahwangun a singkéla' u maluméwo' un touna. Taan sa mahwangun a singkéla' walina, niitu é nimamuali zéi'kan witu un untep un awakna.

¹⁹ Totoz kata'uan niou sa un awak niou ém walé ni Roh Lenas, si mahento' wia ni kamu. Si Roh Lenas itii é méiwéhé ni Opo Empung wia ni kamu. Niitumo, un tou niou én zéi'mo anu niou, anumo ni Opo Empung.

²⁰ Ni kamu én tineleso wo pinakawaéro ni Opo Empung. Niitumo, un awak ni esa wo ni esa én ipahsigi' wo ipahlooz uman si Opo Empung.