1 Korintus 3 - Taaz Weru Witu u Nunuwu'en Tombulu

Um Pahéndo-éndoan né jamaat witi Korintus

¹ Katuari-katuari, i makasa, ni aku i mahnuwu' wia ni kamu én zéi'kan tanu i mahnuwu' wia sé tou pahahkiten ni Roh Lenas, pahpaan ni kamu é mahkiitpé' a lelo wia ung kaayahan. Um pa'émanen niou tumoro si Kristus én tanupé' sé taré itoumé.

² Ni kamu zéi'kampé' makawawa i makailek am pahkailekané né tou kinawasamo ni Roh Lenas, makaz in tarékan ni kamu én zéi'kampé' makawawa i makailek niitu. Ni kamu én tanu sé taré itoumé sé toro uman mahelep susu, sé zéi'kampé' mata'u kuman ang kakanen ketéh an toro uman pahkanen né tu'a.

³ Pahpaan ung katou-touan niou é mahkiit uman a lelo wia ung kaayahan, i ni kamu é mahtétéutéuan wo mahéndo-éndoan. Am pemangu-mangunen niou é mahkiitpé' a lelo wia ung kaayahan wo am pemangu-mangunen né tou zéi'kampé' ma'éman.

⁴ Sa wéwéhan si mahkua, “Ni aku ém wia sé sana réwok tou ni Paulus,” wo sé walina é mahkua, “Ni aku ém wia sé sana réwok tou ni Apolos”, nianamo an tumuzu'mé i ni kamu én totozpé' mahkiit ang kinanaram wia ung kaayahan.

⁵ Séi wé si Apolos? Séi wé si Paulus? Ni kai é méiatu uman ni Opo Empung i sumawang ni kamu wo toro ma'éman wia si Kristus. Ni kai é maayang uman a méiatu ni Opo Empung wia si esa wo si esa.

⁶ Ni aku si timanem, si Apolos si mahsirang. Si mangun a méitanem itii i mahtou é si Opo Empung.

⁷ Niitumo, si ipahpuu-puuna én zéi'kan si timanem wo si mahsirang taan si Opo Empung si nimangun an tinanem i mahtoumé.

⁸ Si tou timanem wo si tou mahsirang é masuat uman. Ni séra zua ém péléng makailek am wawaér mengiit am pinaayang ni esa wo ni esa.

⁹ Ni kai éng kapaayang ni Opo Empung. Ni kamu én tanu an uma ni Opo Empung wo tanu um walé winangun ni Opo Empung.

Um walé wo un to'tolan

¹⁰ Si Opo Empung én timambéré ung kamang wia ni aku makaz ni aku si nimaéndo tanu tonaas né mahpaayang in zimeta' um watu to'tolan um walé. Sé tou walinamokan sé mangun um walé witu um wawo um watu to'tolan méizeta'ku itii. Taan sé tou mahrendai um walé witu un to'tolan itii én totoz mile-ilek i mahpaayang.

¹¹ Pahpaan un to'tolan itii é si Yesus Kristus wo zéi'kan siapa tou zozo' in esa si toro zumeta' un to'tolan walina.

¹² Wéwéhan sé tou mahwangun um walé witu um wawo un to'tolan mahpaké a mas, am péra' wo am watu totoz mahal. Wo wéwéhan sé tou mahwangun um walé witu um wawo un to'tolan mahpaké ang kai, zukut pera kaapa an zahami.

¹³ Im witu un endo si Opo Empung in tumotoz ulit kaapa zéi'kan am pahwangunen né tou, ung kawangunan um pinaayang ni esa wo ni esa é maikatuzu'. Pahpaan un endo itii é méyé karia un api wo un api itii un tumuzu'mé um pinaayang ni esa wo ni esa im wangun kaapa zéi'kan.

¹⁴ Sa um winangun ni tou witu um wawo un to'tolan itii zéi'kan mala'ung, si nimangun niitu é makailek um wawaér.

¹⁵ Taan sa um pinaayang ni tou é mala'ung, wéwéhan a nimaina'ma wia si tou itii. Ni sia é méikaondolé, taan ni sia én tanu si tou kimonta'mokané im witu un api.

¹⁶ Zéi'kan kata'uan niou wé i ni kamu ém Walé ni Opo Empung wo si Roh ni Opo Empung é mahento' wia ni kamu.

¹⁷ Si Opo Empung é luméwo' si tou liméwo' um Walé-Na, pahpaan um Walé-Na én anu-Na. Un ulitna ni kamumo sé pahkuan Walé ni Opo Empung.

Si tou én zéi'kan toro mahlooz un touna

¹⁸ Tia' wo wéwéhan si tou mahtowo witu un touna in esa. Sa wéwéhan si tou mahkua un touna én tulap mengiit am wia ung kaayahan kenu, ni sia é maéndopé'la lemou wo taré sia toro uli-ulit matulap.

¹⁹ Pahpaan ung katulapan wia ung kaayahan éng kalemouan im wia si Opo Empung. Witu um Pinantik Lenas é méipantik téntii, “Ung katulapan né tou tulap ém wangunen ni Opo Empung i maéndo wetes wia sé tou tulap itii.”

²⁰ Witu um Pinantik Lenas kangkasii é méipantik in téntii, “Kata'uan ni Opo Empung ang ginenang né tou tulap, taan un ulitna péléng am pegena-genangen néra itii én zéi'kan siapa torona.”

²¹ Niitumo, zéi'kan toro si tou mahlolooz un touna i mahkiit si kasuat tou, pahpaan péléng a méiwéhé ni Opo Empung wia ni ko é nimaéndo anumu.

²² Téntu kangkasii si Paulus, si Apolos, wo si Petrus, ung kaayahan, ung katou-touan, um patéan, un oras in tarékan wo un oras in tumondongé ém péléng anumu.

²³ Taan ni ko én anu ni Kristus wo si Kristus én anu ni Opo Empung.