1 Korintus 11 - Taaz Weru Witu u Nunuwu'en Tombulu

¹ Wangunela um pahwangunengku tanu ni aku i mahwangun um pahwangunen ni Kristus.

Tumoro un ipahkungkung un ulu né wéwéné i mahragés

² Ni aku é mahlooz ni kamu in jamaat ni Opo Empung wia ang Korintus pahpaan ni kamu sekezé é mahgenang am pahwangunengku wo mahkiit péleng an tutuzu' méipahtuzu'ku wia ni kamu.

³ Taan kapaazku ni kamu é mata'u un téntii: si Tonaas ni tuama é si Kristus wo si tonaas ni wéwéné é si tuama, wo si Tonaas ni Kristus é si Opo Empung.

⁴ Sa si tuama mengaléi kaapa mahkua wia sé tou a méikuamé ni Opo Empung wia ni sia, un uluna éng kinungkungan, ni sia é nimapaiza-izangola si Kristus, si tonaasna.

⁵ Sa si wéwéné mengaléi kaapa mahkua wia sé tou a méikuamé ni Opo Empung wia ni sia, un uluna én zéi'kan kinungkungan, ni sia é nimapaiza-izangola si tuama, si tonaasna. Niitu é makaizangen masuat wo si wéwéné lino'gasola um wuukna.

⁶ Pahpaan sa si wéwéné é soo un uluna ing kungkungan, um wuukna é léwo'zéi' im pototela. Taan sa um wuukna pinototla kaapa lino'gasla, niitu é mapaiza-izang ni sia, tawimo un uluna éng kungkungala.

⁷ Un ulu né tuama én toro in zéi'kan pahkungkungan, pahpaan si tuama winangun tanu si Opo Empung wo si tuama itii mapailek ung kawangko'an ni Opo Empung. Taan un ulu né wéwéné ém pahkungkungan pahpaan si wéwéné itii é mapailek ung kawangko'an ni tuama.

⁸ Pahpaan si tuama én zéi'kan winanguné im wia si wéwéné, taan si wéwéné ém winanguné wia si tuama.

⁹ Téntu kasii si tuama winangun zéi'kan pahpaan si wéwéné taan si wéwéné winangun pahpaan si tuama.

¹⁰ Niitumo, un ulu ni wéwéné ém pahkungkungan un tumuzu'mé i ni sia é mahsigi' wo mahtali-talinga si tuama mahayona, pahpaan sé malaekat kangkasii é mahwéhé genang wia si wéwéné itii.

¹¹ Zozo' in téntu, wia ni kita i ma'éman wia si Opo Empung, zéi'kan siapa wéwéné si zéi'kan memandung si tuama wo zéi'kan siapa tuama si zéi'kan memandung si wéwéné.

¹² Pahpaan im puuna, i si Opo Empung nimangun si wéwéné é niéndo-Namé wia si tuama, tumondongé niitu si tuama méitoumé ni wéwéné. Wo péléng am péléng ém wia si Opo Empung a méyé.

¹³ Amoké pakagena-genangen nioula. Wangun wé si wéwéné sa mengaléi wia si Opo Empung un uluna én zéi'kan kinungkungan?

¹⁴ Zéi'kan kuaa am pahilekenta wia ung kaayahan, si tuama én zéi'kan wangun sa um wuukna lambo'.

¹⁵ Taan sa si wéwéné um wuukna lambo', niitu é maéndo kaloozan ni wéwéné. Pahpaan um wuuk né wéwéné é méiwéhé i maéndo tanu ung kukungkung un ulu néra.

¹⁶ Taan sa wéwéhan tou paaz mahéndo-éndoan tumoro a méikuakuma itii, ni kai wo sé jamaat ni Opo Empung é nimanaramo i mahwangun niitu, zéi'kan siapa an tinotoz walina.

An zéi'kan mata'u wangunen im witu um perjamuan

¹⁷ Tumoro an tutuzu tumondong kenu, ni aku zéi'kan lumooz ni kamu, pahpaan wana am pahréwo-réwokan niou én zéi'kan mahwua'mé am wangun taan an zéi'kan wangun.

¹⁸ Pahpaan ung kataré-taré tinalingakula, ni kamu in jamaat sa nimaréwok é mahéndo-éndoan makaz zéi'kan nimaesaan, wo a nimamuali itii wéwéhan am pa'émanengku.

¹⁹ Pahpaan im wia ni kamu é léwo'zéi' wéwéhan sé mahéndo-éndoan, wo toro kata'uan séi si uli-ulit mahkiit si Opo Empung.

²⁰ Wo sa kamu nimaréwok i mangun um perjamuan, ni kamu zéi'kan mangun niitu ing gumenang um patéan ni Yesus Mahpiara.

²¹ Pahpaan in toro niitu, wéwéhan sé mahkakahat ing kiman taka-takazan sé walina é maharem wo sé walina é nimatewelen.

²² Zéi'kan siapa walé kamu wé wo kamu toro kuman wo melep? Kaapa paaz kamu wé i mahséro' sé jamaat ni Opo Empung wo mapaiza-izang sé tou zéi'kan siapa apa? Apapé' un totoz ikuakuma wia ni kamu? Lumooz ni kamu? Wana am pahwangunen niou itii, ni kamu én zéi'kan loozengku!

²³ Pahpaan a méikuakuma wia ni kamu éng kinailekangkumé wia si Mahpiara. Im wengi puunala si Yesus Mahpiara i méiayo wia sé mahkawasa, Sia méndomé u roti,

²⁴ a Sia kumuama u makasé wia si Opo Empung. Tumondong niitu, pemété-météngen-Nala u roti ang kuan-Na, “Ung kenumo un awak-Ku u méiayo wia ni kamu; pahwangunela niia ing gumenang ni Aku!”

²⁵ Téntu kangkasii, makaapula séra, a Sia méndomé um pengengelepan tinahu'an un anggor ang kuan-Na, “Um pengengelepan kenu ém pinataazan weru u nienté' karia un zaha'-Ku. Pahwangunela niia sekez ni kamu melep tanu niia, ing gumenang ni Aku.”

²⁶ Pahpaan sekez ni kamu ing kuman u roti wo melep un anggor witu um pengengelepan kenu, niitu é masuat wo ni kamu mahwoka' wia sé tou tumoro um patéan ni Mahpiara, makaz Sia i mawurimé sumaup.

²⁷ Niitumo, séi si kiman u roti wo nimelep un anggor witu um pengengelepan ing gumenang um patéan ni Mahpiara taan am pahwangunenna i mahkan u roti wo mahelep un anggor witu um pengengelepan én zéi'kan wangun, si tou itii é nimangunola u singkéla' pahpaan ni sia én zéi'kan mahsigi' un awak wo un zaha' ni Yesus si Mahpiara.

²⁸ Niitumo, pahtata'ula ni esa wo ni esa un aténa, weresi kaapa zéi'kan, wo taré kumiit ing kuman u roti wo melep un anggor witu um pengengelepan.

²⁹ Pahpaan séi si kiman u roti wo nimelep un anggor, taan zéi'kan mahsigi' un awak ni Yesus si Mahpiara, ni sia é makailek un ukuman ni Opo Empung.

³⁰ Pahpaano niitu, lakez sé tou im wia ni kamu sé makaawak un zéi'kan enté', sé saki wo sé nimaté.

³¹ Taan sa pinahtata'utapé'la un atéta, weresi kaapa zéi'kan, ni kita én zéi'kan ukumen.

³² Taan sa kita ukumen ni Opo Empung, ni kita ém pahtuzu'en i mahwangunla an ulit, wo kita zéi'kan maukumen makaz ing kauré-uré karia né tou zéi'kan ma'éman wia ung kaayahan.

³³ Niitumo, katuari-katuariku, sa kamu maréwokla ing kuman witi perjamuan, ni kamu péléng é maheento'ala wo taré kuman mahwali-wali.

³⁴ Sa wéwéhan si maharem, tawimo sia kumanomé witi waléna. Karia in téntu um perjamuan niou én zéi'kan mangun ni kamu in ukumen ni Opo Empung. Am walina én imekengkumokan sa ni aku méyé in tumondong.