1 Korintus 1 - Taaz Weru Witu u Nunuwu'en Tombulu

U sigi'

¹ Um pinantik kenu ém wia ni aku Paulus wo si Sostenes si katuarita esa pa'émanen a mangé. Witu um paaz ni Opo Empung ni aku én tinawah nimaéndo aatu ni Kristus Yesus.

² Um pinantik kenu én iwéhé wia ni kamu sé tou linenas ni Opo Empung, pahpaan nimaesamo karia ni Kristus Yesus wo sé tinawah i maéndo jamaat ni Opo Empung sé witi Korintus. Wo kasii wia péléng sé tou ma'éman wisa uman um pahento'an néra, sé sekezé é mahlooz wo mahmengaléi wia si Yesus Kristus Mahpiara néra wo Mahpiarata.

³ Mengalé-ngaléi uman ung kamang tatambér wo ung kaluasan witu un até, um wia si Opo Empung, si Ama'ta wo um wia si Yesus Kristus Mahpiara é menaté-natér ni kamu.

Si Paulus mapaayo u makasé wia si Opo Empung

⁴ Ni aku sekezé é mapaayo u makasé wia si Opo Empungku, pahpaan ni Sia én timambér ung kamang-Na wia ni kamu wo ni kamu é nimaesa karia ni Kristus Yesus.

⁵ Pahpaan ni kamu nimaesamo karia ni Kristus Yesus, ni kamu nimawa'ilano im wana am péléng: wana péléng am pakahnuwu' wo wana péléng ang kata'uan.

⁶ Niitu un tumuzu'mé a méipahwoka'ku wia ni kamu tumoro si Kristus én totozo kata'uan niou.

⁷ Pahpaano niitu, péléng an tatambér ni Roh Lenas ém wiamo ni kamu, karegas ni kamu i ma'ento' si Yesus Kristus Mahpiarata i mawurimé sumaup.

⁸ Si Yesus Kristus Mahpiarata kangkasii é sumawang ni kamu wo um pa'émanen niou éng kaenté'na makaz witu un endo kaakazan ung kaayahan, wo im witu un endo itii i ni Sia méyé sumaup, ni kamu én zéi'kan siapa a sinala'.

⁹ Si Opo Empung én zéi'kan maliuz wana a méitaaz-Na. Ni Sia én timawah ni kamu makaz ni kamu nimaesa karia ni Oki'-Na, si Yesus Kristus Mahpiarata.

Um pahéndo-éndoan né jamaat

¹⁰ Katuari-katuari! Pahpaan ni aku nimaesa karia ni Yesus Kristus si Mahpiarata, ni aku sumésama wia ni kamu, wo ni kamu én esa nuwu', tia'mo mahéndo-éndoan taan maesaanola wo esa genang.

¹¹ Ni aku éng kumuama in téntu wia ni kamu katuari-katuariku, pahpaan sé tou wia sé sana awu ni Kloe éng kimua wia ni aku, i ni kamu é mahéndo-éndoan.

¹² Ung kalakoana ém, “Wéwéhan sé wia ni kamu é mahkua in téntii, ‘Ni aku é mahkiit si Paulus.’ Sé walina é mahkua, ‘Ni aku é mahkiit si Apolos’, wo sé walina é mahkua, ‘Ni aku é mahkiit si Petrus.’ Wo sé walina kasii é mahkua, ‘Ni aku é mahkiit si Kristus.’ ”

¹³ Si Kristus én zéi'kan nimahwéwéténg! Ni Sia én esa uman. Ni aku, Paulus én zéi'kan nimaté sinalip pahpaan ni kamu, wo ni kamu kasii én zéi'kan sinarani karia u ngaranku i maéndo mahkii-kiit ni aku.

¹⁴ Ni aku éng kumuama u makasé wia si Opo Empung pahpaan zéi'kan siapa tou walina im wia ni kamu sé sinaranikumé, akaz uman si Krispus wo si Gayus.

¹⁵ Én taa wéwéhan si tou kumuamé i sinaranikumé karia u ngaranku wo mahkiit ni aku.

¹⁶ O ndéén, ni aku kasii é simaranimé si Stefanus wo sé sana awuna. Ni séra uman sé sinaraniku, sé walina én zéi'mo kagenangangkula.

¹⁷ Pahpaan ni aku i méiatu ni Kristus én zéi'kan i sumarani sé tou, taan mahwoka' u Nuwu' Lé'os tumoro ni Sia. Ni aku i mahwoka' u Nuwu' Lé'os itii én zéi'kan karia ung katulapangku i mahnuwu', pahpaan sa sé tou ém paaz uman ung katulapangku i mahnuwu', tantumo ung kawasa si Kristus i nimaté witu u salip én zéi'kan siapa torona.

Ung kawasa wo ung katulapan ni Opo Empung ém wia si Kristus

¹⁸ Pahpaan im wia sé tou maléwo'en, u Nuwu' Lé'os tumoro si Yesus i nimaté witu u salip éng kalemouan. Taan im wia ni kita sé méipiloté ni Opo Empung im witu un ukuman wana a singkéla', u Nuwu' Lé'os itii un tumuzu'mé i si Opo Empung én totoz mahkawasa.

¹⁹ Pahpaan im witu um Pinantik Lenas é méipantik in téntii, “Pakaléwo'eng-Ku ang katulapan né tou tulap wo pakazéi'eng-Ku ang kata'uan né tou lakez kata'uan.”

²⁰ In tarékan, kuramotuu sé tou tulap? Kuramo sé tou tulap un Torat? Kuramo sé tou wia ung kaayahan kenu sé paaz uman mahzéi' an ipahkua né tou wia ni sia? Péléng ang katulapan néra ém winangunola ni Opo Empung nimaéndo kalemouan néra.

²¹ Pahpaan maan ing kuramokan ung katulapan ni tou, ni sia én zéi'kan makawawa i mata'u si Opo Empung. Taan si Opo Empung én timotoz i miloté im witu um patéan, sé tou timalinga u Nuwu' Lé'os tumoro si Yesus u méipahwoka' nai a ma'éman wia ni Sia, zozo' sé tou wia ung kaayahan ém wéwéhan sé mahkua sa u Nuwu' Lé'os itii éng kalemouan.

²² Sé tou Yahudi sa zéi'kampé' nimilek u makakompo'en ni séra én zéi'kan ma'éman, wo sé tou Yunani én zéi'kan ma'éman sa zéi'kan pinapata'uan mengiit ung katulapan né tou.

²³ Taan ni kai é mahwoka' i si Kristus é nimaté sinalip. Un ipahwoka' nai kenu éng kasoo né tou Yahudi pahpaan mahwangun un até néra i rumara, wo im wia sé tou zéi'kan Yahudi niitu ém pahkuan néra ing kalemouan.

²⁴ Taan im wia sé tou tinawah ni Opo Empung, séra in tou Yahudi kaapa séra in zéi'kan tou Yahudi, si Kristus si tumuzu'mé ung kawasa wo ung katulapan ni Opo Empung.

²⁵ Pahpaan am pahpaayangen ni Opo Empung um pahkuan né tou i lemou, niitupé' un tulap taan ung katulapan né tou. Téntu kangkasii am pahpaayangen ni Opo Empung am pahkuan né tou in zéi'kan enté', taan ndéén un zéi'kan enté' im wia si Opo Empung itiipé' un enté' taan ung kaenté'an né tou.

²⁶ Katuari-katuari! Amoké genangen nioula, kura ung katou-touan niou in tinawah ni Opo Empung a maéndo tou-Na. In toro niitu, mengiit um pahgenangen né tou: sé tou tulap, sé mahkawasa wo sé tou ipahkua-kua é mena'sapé' sé wia ni kamu.

²⁷ Pahpaan si Opo Empung é niméléng um pahgenangen né tou wia ung kaayahan i lemou, i mapaiza-izang sé pahkuan né tou in tou tulap. Wo ni Sia é niméléng am pahgenangela né tou wia ung kaayahan in zéi'kan enté', i mapaiza-izang sé tou enté'.

²⁸ Si Opo Empung é niméléng am pahgenangela né tou wia ung kaayahan im pahroro-roros, pahséro'an wo zéi'kan siapa torona, in zuméi' am pahgenangela né tou wia ung kaayahan im wéwéhan torona.

²⁹ Niitu ém winangun ni Opo Empung wo zéi'kan siapa zozo' in esa uman si tou nimaloozan witu u sinaru-Na.

³⁰ Si Opo Empung si nimangun ni kamu nimaesa karia ni Kristus Yesus wo si Kristus Yesus nimangun ni kita makailek ung katulapan ni Opo Empung. Ni kita nimaéndo ulit im witu u sinaru ni Opo Empung, nimaéndo tou linenas ni Opo Empung wo timubus ni kita.

³¹ Niitumo, um pahwangunenta é masuat wo u méipantik witu um Pinantik Lenas, in téntii, “Séi si mahloo-looz, tia' mahloo-looz un touna in esa, tawimo mahloo-loozla am winangun ni Opo Empung wia ni sia.”