YAKUB 4 - KITAB SUCI ZABUR INJIL

Bebatur kance dunie

¹ Léman mbé asalne selapuq pesiaqan dait pegejuhan léq antare side? Tekan nike dateng léman hawe napsu side saq saling bejuang léq dalem awakde?

² Side pade bedowé keméléq, laguq ndéq mauq napi saq jari keméléqde nike, terus side pade nyematéq! Side pade talon até, laguq side pade éndah ndéq mauq napi saq side pade boyaq, terus side pade betungkasan dait besiaq. Side pade ndéq mauq napi-napi lantaran side pade ndéq bedo'e.

³ Dait timaq side pade sampun bedo'e, side pade ndéq nerimaq, séngaq side pade salaq bedo'e, séngaq napi saq side pade tunas nike gen side pade bisang jari muasang hawe napsunde.

⁴ Side pade dengan saq ndéq setie! Napi side pade nenaoq bahwe lamun side pade bebatur kance dunie, make side pade jari musuh Allah? Jari, sai-sai saq mélé jari sahabat dunie niki, ie jariang diriqne musuh Allah.

⁵ Ndaq paran bahwe Kitab Suci ndéq bedowé alasan nyatayang, “Roh saq tetoloq siq Allah léq dalem diriqte, nike roh saq keras keméléqne.”

⁶ Timaq maraq nike, rahmat Allah saq teicanin tipaq ite kuatan tebanding keméléq rohte nike. Keranaq nike léq dalem Kitab Suci tetulis éndah, “Allah nentang dengan saq sombong, laguq sebalikne Ie ngasihin dengan saq rendah até.”

⁷ Keranaq nike, pade tunduk léq Allah dait pade lawan Belis, make Belis gen pelai léman side pade.

⁸ Rapetang diriqde léq Allah, dait Allah éndah gen ngerapetin side pade. Persiq imende, side pade saq bedose! Dait suciang aténde, side pade saq due angen!

⁹ Pade sadar léq sengsarende, bedukecite dait nangis éroq aséq; keréréqande harus berobah jari tangisan, dait sukecitende jari dukecite!

¹⁰ Pade rendahang diriq léq arepan Tuhan, make Tuhan gen ninggiang side pade.

Peringetan adéq ndaq girang ngewade dengan

¹¹ Semeton senamian, ndaq saling pitnah. Dengan saq pitnah semetonne, ie ngewade hukum dait ngadilin ie. Dait lamun side pade ngadilin hukum, nike artine side pade ndéq taat léq hukum-hukum nike, laguq jari hakimne.

¹² Padahal cume sopoq saq berhak miaq hukum tipaq manusie dait ngadilin manusie, nike Allah saq bekuase nyelametang dait binaseang. Jari, sai setetune side sehingge side mélé ngadilin sepade manusie?

Peringetan adéq ndaq nyombongang diriq

¹³ Semeton-semeton saq bebase, “Jelo niki atao lémaq tiang pade gen lumbar ojok sopoq kote, dait ndot léq derike setaun ngonéqne bedagang dait boyaq képéng.”

¹⁴ Padahal napi saq gen telaksane léq kehidupande lémaq, side mésaq éndah ndéq gen nenaoq! Idup side pade cume maraq pendet saq penggitan seberaq doang, beterus telang.

¹⁵ Seharusne side pade bebase maraq niki, “Lamun Tuhan ngijinang, tiang pade gen idup dait ngelaksaneang hal saq maraq niki atao hal saq maraq nike.”

¹⁶ Laguq mangkin side pade banggeang diriq léq dalem kesombongande, selapuq kesombongan saq maraq nike salaq.

¹⁷ Keranaq nike, dengan saq nenaoq napi saq solah saq harus ie laksaneang laguq ndéqne laksaneang, dengan nike bedose.