YAKUB 2 - KITAB SUCI ZABUR INJIL

Peringetan léq sipat saq girang curige

¹ Semeton-semeton tiang! Sebagé dengan saq beriman léq Deside Isa Almasih, Junjungante Saq Mulie, ndaq side pade girang béde-bédeang dengan tedasarang hal-hal lahiriah.

² Séngaq lamun araq sopoq dengan sugih ngengadu ali-ali emas dait kelambi solah dateng ojok perkumpulande, beterus dateng éndah sopoq dengan miskin saq ngengadu kelambi roék,

³ make side pade lebih hormat léq dengan saq bekelambi solah nike. Side pade bebase léq ie, “Silaq pelungguh melinggih léq kursi saq paling solah niki,” laguq léq dengan saq miskin, side pade bebase, “Nganjeng léq to!” atao “Tokol léq bawaq dékét naén tiang.”

⁴ Siq perbuatan maraq nike, side pade miaq perbédean léq dalem angen side pade dait jari hakim siq pikiran-pikiran saq jahat.

⁵ Inget, semeton-semeton saq tiang kasihin! Dengan saq miskin léq dunie niki tepiléq siq Allah adéqne jari dengan saq sugih léq dalem iman dait jari ahli waris Kerajaan saq sampun tejanjiqang siq Allah tipaq dengan-dengan saq ngasihin Ie.

⁶ Laguq malahan side menghine dengan miskin, padahal dengan-dengan sugih nike saq nindes side pade dait jauq side pade ojok pengadilan!

⁷ Ie pade saq menghine peséngan saq paling tehormatin saq side pade terimaq léman Allah.

⁸ Side pade ngelaksaneang saq kenaq, lamun side pade ngelaksaneang hukum utame saq tetulis léq Kitab Suci niki, “Kasihin sepadende manusie, pade maraq side ngasihin diriqde mésaq.”

⁹ Laguq lamun side pade béde-bédeang dengan tedasarang hal-hal lahiriah, make side piaq dose, dait hukum Allah nyatayang bahwe side pade ngelanggar hukum.

¹⁰ Séngaq sai juaq saq turut hukum nike, laguq ngeréméhang sopoq bagian léman hukum nike, ie salaq tipaq selapuqne.

¹¹ Séngaq Ie saq bemanik, “Ndaq bezinah,” Ie éndah saq bemanik, “Ndaq nyematéq.” Jari lamun side pade ndéq bezinah, laguq nyematéq make side pade éndah ngelanggar hukum.

¹² Jari side pade harus bebase dait bekelakuan maraq dengan saq gen teadilin menurut hukum Allah saq merdékeang manusie.

¹³ Séngaq bagi dengan saq ndéq nyatayang belas kasihan, hukumanne ndéq gen kadu belas kasihan éndah, laguq dengan saq bedowé belas kasihan ndéq gen takut ngadepin penghakiman!

Iman dait perbuatan

¹⁴ Semeton senamian! Napi manpaatne dengan bebase, “Tiang dengan saq bedowé iman,” lamun ie ndéq buktiang siq perbuatanne? Napi bau iman saq maraq nike nyelametang ie?

¹⁵ Seumpame sopoq semeton mame atao nine merluang kelambi dait ndéq bedowé keloran saq cukup sebilang jelo.

¹⁶ Napi manpaatne side pade bebase léq ie, “Silaq lumbar, kadu kelambi saq anget dait bekelor jangke besuh!”, laguq side pade ndéq béng ie napi saq jari keperluan awakne?

¹⁷ Maraq nike éndah iman, lamun ndéqne tenyatayang siq perbuatan, make iman nike setetune maté.

¹⁸ Sang araq dengan saq bebase, “Léq side araq iman dait léq tiang araq perbuatan.” Tiang gen bejawab, “Petitoqang léq tiang imande laguq ndaq siq perbuatan, dait tiang gen petitoqang iman tiang siq perbuatan tiang.”

¹⁹ Side pade percaye bahwe Allah cume sopoq? Nike solah! Laguq sétan-sétan éndah percaye léq hal nike dait ie pade ngijik siq takutne!

²⁰ Hai side pade saq bebel! Napi perlu tebuktiang léq side bahwe ndéq araq manpaatne bedowé iman lamun ndéq tebarengin siq perbuatan?

²¹ Serioq Ibrahim leluhurte! Ie tejariang kenaq léq arepan Allah lantaran perbuatanne, sewaktu ie ngaturang bijene, Ishak tipaq Allah, léq atas méje taoq kurban.

²² Dalem hal niki sampun jelas bahwe iman harus tenyatayang siq perbuatan dait siq perbuatan nike iman jari sempurne.

²³ Hal nike sesuai ayat Kitab Suci, “Ibrahim percaye léq Allah, dait lantaran imanne nike make ie tejariang kenaq léq arepan Allah.” Keranaq nike Ibrahim tesebut, “Sahabat Allah.”

²⁴ Mangkin sampun jelas, bahwe dengan tejariang kenaq léq arepan Allah, lantaran napi saq telaksaneang siq dengan nike, dait ndéqne cume lantaran imanne doang.

²⁵ Serioq éndah Rahab, dengan nine pelacur nike. Ie tejariang kenaq léq arepan Allah lantaran perbuatanne, sewaktu ie nerimaq mate-mate Israel léq dalem baléne dait nulung ie pade pelai nyelametang diriq liwat langan saq lain.

²⁶ Jari, maraq awak saq ndéq bedowé roh, nike awak saq maté, maraq nike éndah iman, lamun ndéq tebarengin siq perbuatan, iman nike maté.