YAHYA 9 - KITAB SUCI ZABUR INJIL

Deside Isa nyelahang dengan bute léman tebijeang

¹ Sewaktu Deside Isa bemargi, Ie cingakin dengan bute léman tebijeang.

² Pengiring-pengiring Deside Isa metakén léq Deside Isa, “Bapaq Guru, kembéq dengan niki tebijeang bute? Napi lantaran ie mésaq bedose atao lantaran inaq amaqne bedose?”

³ Jawab Deside Isa, “Ie bute ndéq lantaran dosene mésaq atao dengan toaqne, laguq adéq dengan bau serioq kuase Allah bekarye dalem diriqne.

⁴ Kedung masih tengari, ite harus ngelaksaneang karye Allah saq ngutus Tiang. Kelem gen dateng, dait ndéq araq sopoq dengan juaq saq bau begawéan.

⁵ Semasih Tiang léq dunie niki, Tiang niki cahaye dunie.”

⁶ Sesampun bemanik maraq nike Deside Isa beludah ojok tanaq, dait ngaduk ludah-Ne nike kance tanaq. Beterus Ie ngolésang léq penenteng dengan nike,

⁷ beterus bemanik léq ie, “Silaq lumbar persiq muende léq Telage Siloam.” (Siloam artine ‘Saq Teutus’.) Make dengan nike lumbar persiq muene. Sewaktu ie tulak, ie sampun tao nyerioq.

⁸ Tetangge-tetanggene dait dengan-dengan saq sendéqmanne serioq ie mekir, selapuqne bebase, “Ndéq napi dengan niki saq biase tokol mekir?”

⁹ Araq saq bebase, “Mule ie.” Laguq araq éndah saq bebase, “Ndéqne ie, ie cume berambis ruene maraq dengan nike.” Laguq dengan nike mésaq bebase, “Tiang uwah dengan bute nike.”

¹⁰ “Berembé ceritene jangke side tao nyerioq?” basen ie pade léq dengan nike.

¹¹ Jawabne, “Dengan saq bepeséngan Deside Isa nike saq miaq reraok, terus ngolésang léq maten tiang dait bemanik, ‘Silaq lumbar persiq muende léq Telage Siloam.’ Beterus tiang lalo. Dait sewaktu tiang persiq muen tiang, tiang tao nyerioq.”

¹² Ie pade beketuan, “Léq mbé dengan nike?” Terus ie bejawab, “Mindah tiang.”

Dengan Parisi selidik dengan bute teselahang

^13-14 Jelo nike jelo Sabat waktu Deside Isa ngaduk tanaq siq ludah-Ne jari miaq dengan bute nike tao nyerioq. Make dengan saq sendéqmanne bute nike tejauq ojok dengan-dengan Parisi.

¹⁵ Ie pade éndah beketuan léq dengan nike berembé ie tao nyerioq. Jawab dengan nike, “Ie ngolésang reraok léq maten tiang, beterus tiang persiq dait tiang tao nyerioq.”

¹⁶ Pire dengan léq antare dengan-dengan Parisi nike bebase, “Ndéqne mungkin dengan saq ngelaksaneang niki asalne léman Allah, séngaq Ie ndéq hormatin jelo Sabat.” Laguq dengan lain bebase, “Ndéqne mungkin dengan bedose miaq keajaipan-keajaipan maraq niki?” Beterus araq béde pendapet antare ie pade.

¹⁷ Make dengan-dengan Parisi nike beketuan malik léq dengan nike, “Napi pendapet side léq Ie saq miaq side jangke tao nyerioq?” “Ie nabi,” jawab dengan nike.

¹⁸ Laguq pare pemimpin Yahudi nike ndéq mélé percaye bahwe dengan nike mule bute sendéqmanne dait mangkin tao nyerioq. Keranaq nike ie pade ngempoh dengan toaqne,

¹⁹ dait beketuan, “Napi tetu ie anak side, saq side paran teanakang bute? Berembé ie tao nyerioq mangkin?”

²⁰ Jawab inaq amaq dengan nike, “Mule ie niki anak tiang pade; dait mule ie bute léman teanakang.

²¹ Laguq berembé ie tao nyerioq mangkin, mindah tiang. Dait sai saq miaq ie tao nyerioq, nike éndah mindah tiang. Ketuanang doang léq ie, ie sampun beléq; ie tao jawab mésaq.”

²² Inaq amaq dengan nike bebase maraq nike séngaq ie pade takut léq dengan-dengan Yahudi; séngaq ie pade sampun sepakat, bahwe dengan saq ngakuq Deside Isa nike Almasih, ndéqne kanggo malik tame balé ibadah.

²³ Keranaq nike inaq amaq dengan nike bebase, “Ie sampun beléq; ketuan doang léq ie.”

²⁴ Beterus ie pade ngempoh malik dengan saq sendéqmanne bute nike, dait bebase léq ie, “Sampéang saq kenaq léq arepan Allah! Tiang pade nenaoq dengan nike dengan bedose.”

²⁵ Jawab dengan nike, “Napi Ie bedose atao ndéq, mindah tiang. Laguq sopoq hal saq tiang taoq; laéq tiang bute, mangkin tiang nyerioq.”

²⁶ Beterus ie pade bebase malik léq dengan nike, “Ie kumbéqang side? Berembé entane Ie piaq side tao nyerioq.”

²⁷ Jawab dengan nike, “Sampun tiang ceriteang léq pelungguh, laguq pelungguh sami nénten kayun pirengang. Kembéq pelungguh sami kayun pirengang malik? Sang pelungguh sami kayun jari pengiring-pengiring-Ne éndah?”

²⁸ Beterus ie pade sumpaq ie dait bebase, “Side pengiring-Ne; tiang pade ndéq! Tiang pade pengiring Musa.

²⁹ Tiang pade nenaoq bahwe Allah sampun bemanik léq Musa. Laguq mengenai dengan nike, tiang pade ndéq nenaoq léman mbé asal-Ne.”

³⁰ Jawab dengan nike, “Segerah pelungguh sami nénten wikan léman mbé asal-Ne, padahal Ie sampun miaq tiang tao nyerioq.

³¹ Ite nenaoq bahwe Allah nénten gen mirengang dengan bedose, laguq dengan saq soléh dait ngelaksaneang pekayunan-Ne.

³² Léman penembéq dunie niki araq, ndéq uwah tedengah bahwe araq dengan miaq dengan saq teanakang bute tao nyerioq.

³³ Lamun dengan nike nénten léman Allah, Ie nénten gen bau ngelaksaneang napi-napi.”

³⁴ Jawab ie pade, “Napi? Side saq penoq dose léman teanakang, side mélé ngajah tiang pade?” Make mulai waktu nike ie tebalaq tame ojok balé ibadah.

Bute secare rohani

³⁵ Deside Isa pireng bahwe ie pade sampun sediq dengan nike léman balé ibadah. Deside Isa boyaq dengan nike beterus bemanik léq ie, “Napi side percaye léq Bije Manusie?”

³⁶ Jawab dengan nike, “Sai Ie, Junjungan Saq Mulie? Tunas manikang adéq tiang percaye léq Ie.”

³⁷ “Side sampun serioq Ie,” jawab Deside Isa. “Ie saq mangkin niki kenyeke bebaos kance side.”

³⁸ “Tiang percaye, Junjungan Saq Mulie,” basen dengan nike, beterus sujut léq arepan Deside Isa.

³⁹ Manik Deside Isa, “Tiang dateng ojok dunie niki jari ngakimin; adéq dengan saq bute tao nyerioq, dait dengan saq tao nyerioq, jari bute.”

⁴⁰ Pire dengan Parisi saq araq léq derike dengah Deside Isa bemanik maraq nike, beterus ie pade metakén léq Ie, “Maksut Pelungguh tiang pade éndah bute?”

⁴¹ Jawab Deside Isa, “Seandéne side pade bute, side pade ndéq bedose. Laguq lantaran side pade bebase, ‘Tiang pade nyerioq,’ nike artine side pade masih bedose.”