YAHYA 6 - KITAB SUCI ZABUR INJIL

Deside Isa ngicanin bekelor lime iyu dengan

¹ Sesampun nike Deside Isa lumbar ojok itoqan Danao Galilea, saq tesebut éndah Danao Tiberias.

² Sesampun rauh léq derike, luwéq dengan ngiring Deside Isa, séngaq ie pade sampun serioq muqjizat-muqjizat saq tepiaq siq Deside Isa sewaktu Ie nyelahang dengan sakit.

³ Deside Isa taék ojok atas gunung, terus melinggih léq derike teiring siq pengiring-pengiring-Ne.

⁴ Léq waktu nike Hari Raye Paskah dengan Yahudi sampun rapet.

⁵ Waktu Deside Isa cingakin léq sekelining-Ne, Ie cingakin dengan luwéq dateng tipaq Ie. Beterus manik Deside Isa léq Pilipus, “Léq mbé taoqte beli keloran, adéq selapuq dengan niki mauq ngelor?” (

⁶ Setetune Deside Isa sampun wikan napi saq harus Ie laksaneang, laguq Ie bemanik maraq nike jari nguji Pilipus.)

⁷ Jawab Pilipus, “Ruti saq beraji satak képéng perak ndéqne cukup umaq dengan-dengan niki, timaq sebilang dengan cume mauq pade sekediq.”

⁸ Salaq sopoq pengiring Deside Isa saq lain aranne Andreas, semeton Simon Petrus matur,

⁹ “Léq deriki araq kanak mame bedowé lime ruti dait due empaq. Laguq napi artine léq dengan saq luwéqne maraq niki?”

¹⁰ Manik Deside Isa, “Suruq dengan-dengan nike tokol.” Léq taoq nike luwéq pupaq, make dengan-dengan nike tokol léq pupaq -- selapuqne kire-kire lime iyu dengan mame.

¹¹ Beterus Deside Isa bait ruti nike, dait ngucap syukur tipaq Allah. Sesampun nike bagi-bagiang-Ne ruti nike ojok dengan luwéq. Terus Ie bagi empaq nike, dait ie pade ngelor jangke puas.

¹² Sesampun selapuqne bekelor jangke besuh, Deside Isa bemanik tipaq pengiring-pengiring-Ne, “Kumpulang salo keloran nike; ndaq jangke araq saq tetetéh.”

¹³ Terus ie pade kumpulang due olas bakaq penoq salo keloran léman lime ruti saq tekelorang siq dengan luwéq nike.

¹⁴ Sewaktu dengan luwéq serioq keajaipan saq tepiaq siq Deside Isa, ie pade bebase, “Mule tetu, niki Nabi saq gen rauh ojok dunie!”

¹⁵ Deside Isa wikan ie pade mélé dateng jari paksaq Ie jari raje ie pade. Keranaq nike Deside Isa lumbar nyingkir ojok gunung mésaq-mésaq.

Deside Isa bemargi léq atas aiq

¹⁶ Sesampun serep jelo, pengiring-pengiring Deside Isa turun ojok danao.

¹⁷ Beterus ie pade taék perau mbelat danao nike lumbar ojok Kapernaum. Waktu nike sampun peteng laguq Deside Isa ndéqman éndah rauh tipaq ie pade,

¹⁸ sedeng umbak léq danao mulai beléq séngaq keras angin.

¹⁹ Sesampun belayar kire-kire lime atao enem kilométer, ie pade serioq Deside Isa rauh ojok perau bemargi léq atas aiq. Ie pade takut gati.

²⁰ Laguq manik Deside Isa léq ie pade, “Niki Tiang, ndaq takut!”

²¹ Make seneng gati angen ie pade terus pesilaq Deside Isa taék ojok dalem perau. Dait waktu nike éndah perau ie pade dateng léq taoq saq ie pade laiq.

Dengan luwéq boyaq Deside Isa

²² Léq jelo jemaqne dengan luwéq saq masih ndot léq itoqan danao, sadar bahwe sendéqmanne cume araq sopoq perau léq derike. Ie pade nenaoq bahwe pengiring-pengiring Deside Isa sampun berangkat kadu perau nike, laguq Deside Isa nénten milu.

²³ Beterus perau-perau léman kote Tiberias dateng dait belabuh léq dékét taoq nike, taoq dengan luwéq ngelorang ruti sesampun Junjungan Saq Mulie ngucapang syukur.

²⁴ Sewaktu dengan luwéq nike serioq bahwe Deside Isa dait pengiring-pengiring-Ne ndéq araq léq derike, ie pade taék perau-perau nike dait lumbar ojok Kapernaum boyaq Deside Isa.

Deside Isa, ruti saq ngicanin idup

²⁵ Sewaktu dengan-dengan nike bedait kance Deside Isa léq itoqan danao, ie pade metakén léq Deside Isa, “Bapaq Guru, piran Pelungguh rauh léq deriki?”

²⁶ Jawab Deside Isa, “Tiang badaq side, setetune side pade boyaq Tiang ndéqne lantaran side pade sampun ngerti napi maksut keajaipan-keajaipan saq Tiang piaq, laguq lantaran side pade sampun bekelor jangke besuh.

²⁷ Ndaq begawéan jari mauq keloran saq iniq bis dait séde. Laguq side pade harus begawéan jari mauq keloran saq bau tahen jangke dateng idup sejati dait kekel, saq gen teicanin siq Bije Manusie, séngaq Ie sampun tesahang siq Allah Bapa.”

²⁸ Beterus ie pade metakén léq Deside Isa, “Napi saq harus tiang pade piaq adéq tiang pade ngelaksaneang karye saq tekayunang siq Allah?”

²⁹ Jawab Deside Isa, “Niki karye saq tekayunang siq Allah: Side pade harus percaye léq Ie saq teutus siq Allah.”

³⁰ Beterus ie pade matur, “Lamun maraq nike, bukti napi saq gen Pelungguh icanin adéq tiang pade serioq dait percaye léq Pelungguh? Napi saq Pelungguh gen laksaneang?

³¹ Leluhur tiang pade ngelorang manna léq padang gurun, maraq tetulis léq Kitab Suci, ‘Allah ngicanin ie pade kelorang ruti léman sorge.’ ”

³² Terus Deside Isa bemanik léq ie pade, “Tiang badaq side: Setetune ndéqne Musa, laguq Bapa Tiang saq ngicanin side ruti saq setetune léman sorge.

³³ Séngaq ruti saq teicanin siq Allah nike Ie saq turun léman sorge dait ngicanin idup tipaq manusie léq dunie.”

³⁴ Terus ie pade matur, “Junjungan Saq Mulie, tunas tetep icanin tiang pade ruti nike.”

³⁵ Manik Deside Isa léq ie pade, “Tiang niki ruti saq ngebéng idup, dengan saq dateng tipaq Tiang, ndéqne gen lapah malik. Dait dengan saq percaye léq Tiang ndéqne gen bedak malik.”

³⁶ “Laguq maraq saq sampun Tiang sampéang léq side: Timaq side pade sampun serioq Tiang, side pade ndéq percaye.

³⁷ Selapuq saq Bapa icanin tipaq Tiang gen dateng tipaq Tiang dait sai-sai saq dateng tipaq Tiang ndéq uwah Tiang tolaq.

³⁸ Séngaq Tiang turun léman sorge, ndéq jari ngelaksaneang keméléq Tiang mésaq, laguq pekayunan Ie saq ngutus Tiang.

³⁹ Dait niki pekayunan Ie saq ngutus Tiang: Adéq selapuq saq sampun Ie icanin tipaq Tiang, ndéq araq saq telang; laguq adéq Tiang idupang malik léq ahir jaman.

⁴⁰ Mule maraq niki pekayunan Bapa Tiang: Adéq selapuq saq serioq Bije dait percaye léq Ie, bedowé idup sejati dait kekel, dait Tiang idupang malik léq ahir jaman.”

⁴¹ Dengan-dengan Yahudi mulai ngoméh léq Deside Isa, lantaran Ie bemanik: “Tiang ruti saq turun léman sorge.”

⁴² Ie pade bebase, “Tekan Ie niki Isa, bije Yusup? Tiang pade kenal inaq amaq-Ne! Berembé Ie bau paran diriq-Ne, “Ie turun léman sorge?”

⁴³ Beterus Deside Isa bemanik léq ie pade, “Ndaq ngoméh!

⁴⁴ Ndéq araq sopoq dengan juaq saq bau dateng ojok Tiang, lamun Bapa saq ngutus Tiang, nénten gadingang ie tipaq Tiang; dait sai saq dateng, gen Tiang idupang léq ahir jaman.

⁴⁵ Léq dalem Kitab Nabi-nabi tetulis maraq niki: ‘Selapuq dengan gen teajah siq Allah.’ Jari, selapuq dengan saq dengahang Bapa dait berajah léman Ie, dateng ojok Tiang.

⁴⁶ Nike ndéqne berarti bahwe araq dengan saq sampun serioq Bapa. Cume Ie saq rauh léman Allah, sampun cingakin Bapa.

⁴⁷ Tiang badaq side: Setetune dengan saq percaye, bedowé idup sejati dait kekel.

⁴⁸ Tiang niki ruti saq ngebéng idup.

⁴⁹ Leluhurde kelorang manna léq padang gurun dait ie pade ninggal éndah.

⁵⁰ Laguq ndéqne maraq nike ruti saq turun léman sorge; dengan saq ngelorang ruti nike ndéqne gen ninggal.

⁵¹ Tiang niki ruti saq turun léman sorge -- ruti saq ngebéng idup. Dengan saq ngelorang ruti niki gen idup selaéq-laéqne. Ruti saq gen Tiang béng jari kehidupan manusie léq dunie, nike ragen Tiang.”

⁵² Dengahne manik Deside Isa maraq nike, dengan-dengan Yahudi betungkasan sopoq kance lainne, basen ie pade, “Berembé Dengan niki ngicanin ite rage-Ne jari tekelorang?”

⁵³ Beterus Deside Isa bemanik léq ie pade, “Tiang badaq side: Setetune lamun side pade ndéq ngelorang rage Bije Manusie dait nginem daraq-Ne, side pade ndéq bedowé idup léq dalem diriqde.

⁵⁴ Dengan saq ngelorang ragen Tiang dait nginem daraq Tiang bedowé idup sejati dait kekel, dait Tiang gen idupang ie léq ahir jaman.

⁵⁵ Séngaq ragen Tiang tetu-tetu keloran dait daraq Tiang tetu-tetu ineman.

⁵⁶ Dengan saq ngelorang ragen Tiang dait nginem daraq Tiang, ie araq léq dalem Tiang, dait Tiang araq léq dalem ie.

⁵⁷ Pade maraq Bapa saq idup ngutus Tiang, dait Tiang éndah idup léman Bapa, maraq nike éndah halne sai-sai saq kelorang ragen Tiang gen idup léman Tiang.

⁵⁸ Niki ruti saq sampun turun léman sorge: Ndéqne maraq ruti saq tekelorang siq leluhurde. Séngaq sesampun ie pade ngelorang ruti nike, ie pade ninggal éndah. Laguq dengan saq ngelorang ruti niki gen idup selaéq-laéqne.”

⁵⁹ Selapuqne nike temanikang siq Deside Isa sewaktu Ie ngajahang léq balé ibadah léq Kapernaum.

Manik saq ngicanin idup sejati dait kekel

⁶⁰ Sesampun dengah manik Deside Isa nike, luwéq léq antare pengiring-pengiring-Ne matur, “Perajahan niki keras, sai saq sanggup dengahang perajahan niki?”

⁶¹ Deside Isa wikan bahwe pengiring-pengiring-Ne ngerumun mengenai hal nike. Make Ie bemanik, “Napi perajahan nike miaq side bimbang?

⁶² Berembé jarine éraq lamun side pade serioq Bije Manusie taék gen tulak ojok taoq-Ne semule?

⁶³ Roh saq ngicanin idup, awak manusie tetu-tetu ndéqne araq manpaatne. Perajahan-perajahan saq Tiang sampéang léq side nike roh dait idup.

⁶⁴ Laguq léq antare side pade araq saq ndéq percaye.” (Deside Isa sampun wikan léman penembéqne sai-sai saq ndéq mélé percaye, dait sai saq gen behianat léq Ie.)

⁶⁵ Terus Deside Isa bemanik malik, “Keranaq nike Tiang badaq side bahwe ndéq araq sopoq dengan juaq bau dateng ojok Tiang, lamun Bapa nénten ngicanin ie paice.”

⁶⁶ Mulai waktu nike luwéq pengiring-Ne ngundurang diriq, dait ndéq ngiring Ie malik.

⁶⁷ Beterus Deside Isa beketuan léq kedue olas pengiring-Ne, “Napi side pade éndah mélé bilin Tiang?”

⁶⁸ Simon Petrus matur léq Deside Isa, “Junjungan Saq Mulie, sai saq gen tiang pade laiq? Pelungguh doang saq bedowé idup sejati dait kekel.

⁶⁹ Tiang pade sampun percaye dait yakin bahwe Pelungguh Saq Suci léman Allah.”

⁷⁰ Jawab Deside Isa, “Tekan Tiang mésaq saq piléq side pade, saq due olas dengan niki? Laguq salaq sopoq léq antare side nike Belis!”

⁷¹ Saq temaksut siq Deside Isa nike, Yudas bije Simon Iskariot. Séngaq timaq Yudas jari salaq sopoq léman kedue olas pengiring-Ne, ie gen behianat léq Deside Isa.