YAHYA 5 - KITAB SUCI ZABUR INJIL

Deside Isa nyelahang dengan léq telage Betesda

¹ Sesampun nike araq perayaan Yahudi, make Deside Isa lumbar ojok Yerusalem.

² Léq Yerusalem dékét Jebak Dombe araq sopoq telage, dalem base Ibrani tearanin Betesda. Léq derike araq lime sesangkok.

³ Léq sesangkok-sesangkok nike luwéq dengan sakit tetindoqang, araq saq bute, araq saq démpang, dait araq éndah saq képaq. [Ie pade selapuq ngantih aiq telage nike beumbak-umbak.

⁴ Séngaq sewaktu-waktu malaékat Tuhan turun ojok telage nike terus miaq aiqne jari beumbak-umbak. Dengan sakit saq penembéq tame léq dalem telage nike sewaktu aiqne beumbak-umbak, gen selah, napi juaq penyakitne.]

⁵ Léq taoq nike araq sopoq dengan mame saq sampun telung dase baluq taun ngonéqne sakit.

⁶ Deside Isa cingakin ie tindoq léq derike, dait wikanang-Ne bahwe ie ngonéq gati sakit; make Deside Isa bemanik léq ie, “Mélé side teselahang?”

⁷ Dengan sakit nike bejawab, “Guru, nénten araq dengan saq tamaq tiang ojok dalem telage sewaktu aiqne beumbak-umbak. Baruq tiang mélé tame, sampun araq dengan lain saq juluan tame.”

⁸ Beterus Deside Isa léq ie, “Silaq ures, angkat tipahde, terus lampaq.”

⁹ Léq waktu nike éndah ie langsung selah. Ie ngangkat tipahne terus lampaq. Hal nike telaksane léq jelo Sabat.

¹⁰ Keranaq nike penguase-penguase Yahudi bebase léq dengan saq baruq teselahang nike, “Jelo niki jelo Sabat. Ndéq kanggo side ngangkat tipahde.”

¹¹ Laguq jawab dengan nike, “Dengan saq nyelahang tiang, Ie saq suruq tiang ngangkat tipah tiang terus lampaq.”

¹² Ie pade beketuan, “Sai dengan nike saq suruq side ngangkat tipahde terus lampaq?”

¹³ Laguq dengan saq sampun selah nike ndéq nenaoq sai dengan nike, séngaq Deside Isa sampun telang léq tengaq dengan luwéq nike.

¹⁴ Beterus Deside Isa bedait kance dengan nike léq dalem Gedéng Allah, dait bemanik léq ie, “Mangkin side sampun selah, ndaq gawéq dose malik, adéq side ndéq ndait saq lengéan malik.”

¹⁵ Beterus dengan nike lumbar, dait nyampéang ojok pare penguase Yahudi bahwe Deside Isa saq nyelahang ie.

¹⁶ Dait nike lantaranne, ie pade mulai berusahe nganiaye Deside Isa séngaq Ie nyelahang dengan léq jelo Sabat.

¹⁷ Laguq Deside Isa bemanik léq ie pade, “Bapa Tiang terus bekarye jangke mangkin, maraq nike éndah Tiang terus bekarye.”

¹⁸ Nike penguase-penguase Yahudi jari sayan berusahe gen nyematéq Ie. Ie pade piaq maraq nike, ndéqne cume lantaran Deside Isa ngelanggar aturan agame mengenai jelo Sabat, laguq éndah lantaran Ie badaqang bahwe Allah nike Bapa-Ne; artine Ie padeang diriq-Ne kance Allah.

Kesaksian Deside Isa mengenai diriq-Ne

¹⁹ Deside Isa jawab ie pade maraq niki, “Tiang badaq side, setetune Bije ndéqne tao ngelaksaneang napi-napi léman diriq-Ne mésaq. Ie cume ngelaksaneang napi saq Ie cingakin telaksaneang siq Bapa-Ne. Séngaq napi saq telaksaneang siq Bapa, nike éndah saq telaksaneang siq Bije.

²⁰ Séngaq Bapa ngasihin Bije-Ne dait nyatayang tipaq Bije nike selapuq saq Ie laksaneang mésaq. Malahan Bapa gen nyatayang tipaq Bije nike karye-karye saq beléqan malik, jangke side pade jari bengaq.

²¹ Bapa nike nguresang dengan ninggal, dait ngidupang ie pade, maraq nike éndah Bije ngidupang sai saq Ie kayunang.

²² Bapa mésaq nénten hakimin sai juaq. Selapuq kekuasean jari hakimin sai juaq sampun teserahang tipaq Bije.

²³ Bapa ngelaksaneang hal nike adéq selapuq dengan hormatin Bije maraq ie pade hormatin Bapa. Dengan saq ndéq hormatin Bije artine ie éndah ndéq hormatin Bapa saq ngutus Ie.

²⁴ Tiang badaq side: Setetune dengan saq dengah Tiang, dait percaye léq Bapa saq ngutus Tiang, ie gen mauq idup sejati dait kekel, dait ie ndéq gen tehukum; ie sampun ngalih léman ninggal ojok dalem idup.

²⁵ Tiang badaq side: Setetune gen dateng waktune -- malahan sampun dateng waktune -- dengan ninggal gen dengah suare Bije saq asalne léman Allah. Dait dengan saq dedengah gen idup.

²⁶ Pade maraq Bapa saq jari sumber idup, make Bapa jariang Bije nike éndah sumber idup.

²⁷ Bapa sampun ngicanin Bije-Ne kuase jari hakimin sai juaq, séngaq Ie Bije Manusie.

²⁸ Ndaq side pade bengaq dengah hal niki, séngaq gen dateng waktune bahwe selapuq dengan saq sampun ninggal dengah suare-Ne,

²⁹ dait ie pade saq gawéq solah gen sugul dait idup malik jari mauq idup saq kekel, laguq ie pade saq sampun gawéq jahat gen teidupang malik jari tehukum.”

Bukti-bukti mengenai Deside Isa

³⁰ “Tiang ndéq tao ngelaksaneang napi-napi léman diriq Tiang mésaq, Tiang cume ngakimin sesuai napi saq Tiang dengah. Dait penghakiman Tiang adil, séngaq Tiang ndéq turut keméléq Tiang mésaq, laguq pekayunan Bapa saq ngutus Tiang.

³¹ Lamun Tiang ngebéng kesaksian mengenai diriq Tiang mésaq, kesaksian nike ndéq bau tesaduq.

³² Laguq araq dengan lain saq ngebéng kesaksian mengenai Tiang, dait Tiang nenaoq bahwe kesaksian-Ne nike kenaq.

³³ Side pade sampun ngirim utusan ojok Yahya, dait Yahya sampun ngebéng kesaksian mengenai kebenaran.

³⁴ Hal niki Tiang sampéang, ndéqne lantaran Tiang merluang saksi léman manusie, laguq adéq side pade teselametang.

³⁵ Yahya nike maraq dilah saq nyale dait becahaye. Semendaq doang side pade seneng nerimaq cahayene nike.

³⁶ Laguq kesaksian Tiang pentingan léman kesaksian Yahya. Napi saq mangkin Tiang laksaneang, niki karye saq tetugasang siq Bapa tipaq Tiang, jari bukti bahwe Bapa sampun ngutus Tiang.

³⁷ Dait Bapa saq ngutus Tiang éndah ngebéng kesaksian mengenai Tiang. Side pade ndéq uwah dengah manik-Ne atao serioq rue-Ne.

³⁸ Selapuq manik-Ne ndéq side pade simpen léq dalem aténde, séngaq side pade ndéq percaye léq Tiang saq Ie utus.

³⁹ Side pade berajah Kitab Suci séngaq side paran siq care nike side bedowé idup sejati dait kekel. Dait Kitab Suci éndah ngebéng kesaksian mengenai Tiang.

⁴⁰ Laguq side pade ndéq mélé dateng ojok Tiang adéq side pade mauq idup.

⁴¹ Tiang ndéq boyaq pujian léman manusie.

⁴² Tiang kenal side pade. Tiang nenaoq side pade ndéq ngasihin Allah dalem aténde.

⁴³ Tiang dateng dalem peséngan Bapa Tiang, laguq side pade ndéq nerimaq Tiang. Laguq lamun dengan lain saq dateng dalem pesénganne mésaq, side pade mélé nerimaq ie.

⁴⁴ Berembé side pade bau percaye, lamun side pade boyaq pujian léman sepade manusie, dait ndéq berusahe boyaq pujian léman Allah saq Esa?

⁴⁵ Ndaq paran Tiang gen tuduh side pade léq arepan Bapa. Malahan Musa saq side pade harepang, ie saq tuduh side pade.

⁴⁶ Seandéne side pade percaye léq Musa, side pade gen percaye léq Tiang, séngaq Musa saq nulis mengenai Tiang.

⁴⁷ Laguq lamun side pade ndéq percaye léq napi saq tetulis siq Musa, berembé side pade bau percaye léq napi saq Tiang sampéang?”