YAHYA 3 - KITAB SUCI ZABUR INJIL

Deside Isa kance Nikodemus

¹ Araq sopoq ahli Taurat léman golongan dengan Parisi aranne Nikodemus.

² Léq sopoq kelem ie parek ojok Deside Isa, dait matur, “Bapaq Guru, tiang pade nenaoq Pelungguh teutus siq Allah. Séngaq nénten araq sopoq dengan juaq saq bau miaq keajaipan maraq Pelungguh, lamun Allah nénten bareng ie.”

³ Jawab Deside Isa, “Tiang badaq side: Setetune ndéq araq sopoq manusie saq bau serioq Kerajaan Allah lamun ie ndéq tebijeang malik.”

⁴ Jawab Nikodemus tipaq Deside Isa, “Segerah dengan saq sampun toaq tebijeang malik? Napi ie iniq tame malik léq dalem tian inaqne beterus tebijeang malik?”

⁵ Jawab Deside Isa, “Tiang badaq side, setetune lamun dengan ndéq tebijeang léman aiq dait léman Roh Allah, dengan nike ndéq gen bau tame Kerajaan Allah.

⁶ Manusie secare jasmani tebijeang siq dengan toaqne, laguq secare rohani tebijeang léman Roh Allah.

⁷ Ndaq bengaq lantaran Tiang badaq side: Side selapuq harus tebijeang malik.

⁸ Angin lalo ojok mbé ie mélé; ite dengah suarene, laguq ndéq nenaoq léman mbé datengne dait ojok mbé aningne. Maraq nike éndah dengan saq tebijeang léman Roh Allah.”

⁹ Nikodemus metakén, “Berembé nike iniq telaksane?”

¹⁰ Jawab Deside Isa, “Side guru léq Israel; segerah side ndéq nenaoq hal-hal nike?

¹¹ Tiang badaq side: Setetune tiang pade nyampéang mengenai napi saq tiang pade taoq, dait tiang pade ngebéng kesaksian mengenai napi saq sampun tiang pade serioq; laguq side pade ndéq mélé nerimaq kesaksian tiang pade.

¹² Side pade ndéq percaye lamun Tiang nyeriteang side mengenai hal-hal léman dunie niki; berembé side pade bau percaye, lamun Tiang nyeriteang side hal-hal mengenai sorge?

¹³ Ndéq araq sopoq dengan juaq saq sampun taék ojok sorge, kecuali Ie saq turun ojok dunie, nike Bije Manusie.

¹⁴ Pade maraq Musa saq taékang ulah tembage léq sopoq kayuq léq padang gurun, maraq nike éndah Bije Manusie harus tetaékang,

¹⁵ adéq selapuq dengan saq percaye léq Ie mauq idup sejati dait kekel.

¹⁶ Séngaq beléq gati kasih Allah tipaq manusie léq dunie niki, jangke Ie ngicanin Bije-Ne saq nunggal, adéq sebilang dengan saq percaye léq Ie ndéqne binase, laguq mauq idup sejati dait kekel.

¹⁷ Séngaq Allah ngutus Bije-Ne nénten jari hakimin dunie niki, laguq adéq langan Ie, dunie niki teselametang.

¹⁸ Dengan saq percaye léq Ie ndéq gen tehukum. Laguq dengan saq ndéq percaye sampun tehukum siq Allah, séngaq ie ndéq percaye léq dalem peséngan Bije Nunggal saq asalne léman Allah.

¹⁹ Hukuman nike: Cahaye nike sampun rauh ojok dunie, laguq manusie demenan peteng ketimbang menah, séngaq perbuatan-perbuatan ie pade jahat.

²⁰ Sebilang dengan saq gawéq jahat, meriq léq cahaye; ie ndéq mélé dateng léq cahaye nike, adéq perbuatanne saq jahat ndéq penggitan.

²¹ Laguq dengan saq ngelaksaneang napi saq kenaq, dateng tipaq cahaye nike adéqne jari nyate bahwe napi saq ie laksaneang sesuai pekayunan Allah.”

Deside Isa dait Yahya Pembaptis

²² Sesampun nike Deside Isa dait pengiring-pengiring-Ne lumbar ojok Yudea. Léq derike Ie mererepan pire jelo ngonéqne teiring siq ie pade sambil baptis dengan saq betobat.

^23-24 Waktu nike Yahya ndéqman tame bui. Ie baptis dengan léq Ainon, ndéqne jaoq léman Salim, séngaq léq derike luwéq aiq. Dengan-dengan pade dateng ojok derike terus Yahya, baptis dengan-dengan nike.

²⁵ Terus pengiring-pengiring Yahya mulai pade betungkasan kance dengan Yahudi mengenai aturan penyucian.

²⁶ Ie pade lumbar ojok Yahya, dait bebase, “Paq Guru, napi pelungguh masih iling léq dengan saq bareng kance pelungguh léq itoqan Kokoq Yordan nike saq piranan sampun pelungguh ceriteang tiang pade? Ie éndah baptis dengan, dait selapuq dengan lumbar ojok Ie!”

²⁷ Jawab Yahya, “Ndéq araq sopoq dengan juaq saq bau nerimaq napi-napi lamun ie nénten teicanin siq Allah.

²⁸ Side pade sampun dengah raos tiang, ‘Tiang ndéqne Mesias saq tesebut éndah Almasih. Tiang teutus senjuluq Ie.’

²⁹ Pengantén nine nike épéne pengantén mame. Sahabat pengantén mame nike cume nganjeng léq dékétne dait dengahang, dait ie besukecite lamun dengah suare pengantén mame. Maraq nike éndah tiang. Mangkin tiang seneng gati.

³⁰ Ie harus sayan beléq, laguq tiang harus sayan kodéq.”

Ie saq rauh léman sorge

³¹ Sai saq rauh léman atas ngelebihin selapuqne; sai saq asalne léman dunie, ie manusie warge dunie dait ngeraos mengenai hal-hal léq dunie. Sai saq rauh léman sorge ngelebihin selapuqne.

³² Ie bebaos mengenai napi saq sampun Ie cingakin dait Ie pirengang, laguq ndéq araq sopoq dengan juaq saq percaye léq kesaksian-Ne.

³³ Dengan saq percaye léq kesaksian-Ne nike, ngakuq bahwe Allah kenaq.

³⁴ Séngaq dengan saq teutus siq Allah nyampéang Manik Allah, séngaq nénten araq tutuqne Allah ngicanin Roh-Ne.

³⁵ Bapa ngasihin Bije, dait sampun nyerahang selapuq kuase léq Ie.

³⁶ Dengan saq percaye léq Bije nike gen mauq idup sejati dait kekel. Laguq dengan saq ndéq taat léq Bije nike ndéqne mauq idup. Ie tehukum siq Allah selaéq-laéqne.