YAHYA 2 - KITAB SUCI ZABUR INJIL

Gawé ngawinang léq Kana

¹ Due jelo sesampun nike araq gawé ngawinang léq kote Kana, léq Galilea, dait mamiq bini Deside Isa araq léq derike.

² Deside Isa kance pengiring-pengiring-Ne tepesilaq éndah léq gawé ngawinang nike.

³ Sewaktu ie pade kurangan aiq anggur, mamiq bini-Ne bebase léq Deside Isa, “Aiq anggur ie pade sampun bis.”

⁴ Jawab Deside Isa, “Inaq napi saq side kayunang léq Tiang? Ndéqman waktune Tiang nyatayang diriq.”

⁵ Laguq mamiq bini Deside Isa bebase léq pelayan-pelayan, “Laksaneang napi saq Ie manikang léq side.”

⁶ Léq derike araq enem gentong saq tesadangang jari bisoq naé menurut adat Yahudi. Gentong nike sopoq-sopoq isine kire-kire satus liter.

⁷ Manik Deside Isa léq pelayan-pelayan nike, “Isiqang gentong-gentong nike.” Ie pade isiq gentong-gentong nike jangke penoq.

⁸ Beterus Deside Isa bemanik léq ie pade, “Mangkin bait aiq nike sekediq dait atong ojok ketue saq ngatur gawé.” Ie pade jauq aiq nike ojok ketue.

⁹ Terus ketue nike rasaq aiq saq sampun jari anggur nike. (Ie ndéq nenaoq léman mbé anggur nike, cume pelayan-pelayan saq ngisiq aiq doang saq nenaoq.) Beterus ketue nike ngerapetin pengantén mame,

¹⁰ terus bebase léq ie, “Biasene dengan nyugulang anggur saq paling maiq juluan dait lamun selapuq temué sampun puas nginem baruq anggur saq biase. Laguq side nyimpen anggur saq paling solah jangke mangkin!”

¹¹ Nike keajaipan penembéq saq tepiaq siq Deside Isa. Ie ngelaksaneang nike léq Kana léq Galilea. Siq tande nike Ie nyatayang kemuliean-Ne. Make pengiring-pengiring-Ne percaye léq Ie.

¹² Sesampun nike Deside Isa lumbar ojok Kapernaum bareng-bareng kance mamiq bini-Ne, sanak-sanak-Ne dait pengiring-pengiring-Ne. Ie pade mererepan léq derike pire jelo ngonéqne.

Deside Isa tame ojok Gedéng Allah

¹³ Sewaktu sampun rapet Hari Raye Paskah Yahudi, Deside Isa lumbar ojok Yerusalem.

¹⁴ Léq Gedéng Allah léq Yerusalem, dait-Ne dengan-dengan saq jual sampi, dombe, kedit dare; dait éndah tukang tukah képéng tokol léq derike.

¹⁵ Deside Isa piaq pecut léman tali, beterus siuh-Ne selapuq sampi dait dombe nike léman dalem Gedéng Allah. Balik-belah-Ne méje-méje saq tekadu taoq nukahang képéng jangke selapuq képéng ie pade begelanyatan.

¹⁶ Beterus Deside Isa bemanik léq dagang kedit dare nike, “Jauq selapuqne niki. Ndaq jariang Gedéng Bapa Tiang taoq bedagang!”

¹⁷ Beterus pengiring-pengiring-Ne inget bahwe araq tetulis, “Rase kasih Tiang léq Gedéng Deside, nguasein atén Tiang.”

¹⁸ Pare penguase Yahudi nantang Deside Isa, basen ie pade, “Silaq miaq keajaipan jari tande léq tiang pade bahwe Pelungguh berhak ngelaksaneang maraq niki.”

¹⁹ Jawab Deside Isa, “Runtuhang Gedéng Allah niki, dait dalem telu jelo Tiang bau penganjeng malik.”

²⁰ Terus ie pade bebase, “Teperluang waktu petang dase enem taun jari penganjeng Gedéng Allah niki, laguq Pelungguh gen penganjeng malik dalem telu jelo?”

²¹ Laguq Gedéng Allah saq temaksut siq Deside Isa nike, rage-Ne mésaq.

²² Beterus sesampun Deside Isa idup léman ninggal, pengiring-pengiring-Ne inget bahwe hal nike sampun Ie manikang. Make ie pade percaye napi saq tetulis léq Kitab Suci dait napi saq temanikang siq Deside Isa.

Deside Isa kenal selapuq dengan

²³ Deside Isa araq léq Yerusalem sengonéq Perayaan Paskah, luwéq dengan percaye léq Ie lantaran keajaipan-keajaipan saq Ie piaq.

²⁴ Laguq Deside Isa mésaq nénten percayeang diriq-Ne léq ie pade, séngaq Ie kenal selapuq dengan.

²⁵ Ndéq perlu dengan ngebéng kesaksian tipaq Ie mengenai sai juaq, séngaq Ie mésaq wikan napi saq araq léq dalem angen manusie.