YAHYA 14 - KITAB SUCI ZABUR INJIL

Gedéng Bapa

¹ “Ndaq osah angende,” manik Deside Isa léq ie pade. “Pade percaye léq Allah dait pade percaye léq Tiang éndah.

² Léq gedéng Bapa Tiang araq luwéq taoq ndot. Tiang lalo ojok derike jari nyedieang side pade taoq. Tiang ndéq gen badaq side maraq nike, lamun ndéqne tetu maraq nike.

³ Sesampun Tiang lalo nyedieang taoq umaq side pade, Tiang gen tulak dait tutut side pade, adéq léq mbé Tiang araq, léq derike éndah side pade araq.

⁴ Ojok taoq saq Tiang laiq side pade nenaoq langanne.”

⁵ Beterus Tomas matur léq Deside Isa, “Junjungan Saq Mulie, tiang pade ndéq nenaoq ojok mbé Pelungguh lumbar, berembé tiang pade nenaoq langanne?”

⁶ Jawab Deside Isa, “Tiang niki langan dait kebenaran dait idup. Ndéq araq sopoq dengan juaq saq bau parek tipaq Bapa lamun ndéq langan Tiang.

⁷ Lamun side pade kenal Tiang, pasti side pade gen kenal éndah Bapa Tiang. Mangkin side pade sampun kenal Ie, dait sampun serioq Ie!”

⁸ Beterus Pilipus matur léq Deside Isa, “Junjungan Saq Mulie, nyatayang Bapa léq tiang pade, adéq tiang pade puas.”

⁹ Laguq jawab Deside Isa, “Sampun bégaq ngonéqne Tiang bareng kance side pade, laguq ndéqman éndah side kenal Tiang, Pilipus? Dengan saq sampun serioq Tiang, sampun serioq Bapa, berembé side iniq bebase, ‘Silaq nyatayang Bapa léq tiang pade’?

¹⁰ Pilipus! Napi side ndéq percaye, bahwe Tiang léq dalem Bapa, dait Bapa léq dalem Tiang? Napi saq Tiang sampéang léq side, ndéq Tiang sampéang léman diriq Tiang mésaq. Bapa saq tetep léq dalem Tiang, Ie saq ngelaksaneang selapuqne nike.

¹¹ Pade percaye léq Tiang, bahwe Tiang niki léq dalem Bapa, dait Bapa léq dalem Tiang, atao paling ndéq pade percaye léq napi saq sampun Tiang laksaneang.

¹² Tiang badaq side: Setetune dengan saq percaye léq Tiang, gen ngelaksaneang napi saq sampun Tiang laksaneang -- malahan ie gen ngelaksaneang saq beléqan malik -- séngaq Tiang lalo tipaq Bapa.

¹³ Dait napi-napi saq side pade tunas kadu aran Tiang, gen Tiang laksaneang, adéq Bapa temulieang langan Bije.

¹⁴ Napi-napi saq side pade tunas kadu aran Tiang, gen Tiang laksaneang.”

Deside Isa janjiqang Roh Suci

¹⁵ “Lamun side pade ngasihin Tiang, side pade gen ngelaksaneang préntah-préntah Tiang.

¹⁶ Tiang gen tunas léq Bapa, dait Ie gen ngicanin side Penulung lain, saq gen bareng side pade selaéq-laéqne.

¹⁷ Ie nike Roh Kebenaran. Dunie ndéq iniq nerimaq Ie, séngaq dunie ndéqne serioq Ie dait ndéqne kenal Ie. Laguq side kenal Ie, séngaq Ie araq bareng side pade dait gen ndot kance side pade.

¹⁸ Side pade ndéq gen Tiang bilin jari anak iwoq. Tiang gen tulak tipaq side.

¹⁹ Karing semendaq dunie ndéq gen serioq Tiang malik. Laguq side pade gen serioq Tiang. Dait lantaran Tiang idup, side pade gen idup éndah.

²⁰ Lamun sampun dateng jelo nike, side pade gen nenaoq bahwe Tiang léq dalem Bapa, side pade léq dalem Tiang, dait Tiang éndah léq dalem side pade.

²¹ Dengan saq taat léq préntah-préntah Tiang dait ngelaksaneang préntah-préntah nike, ie saq ngasihin Tiang. Bapa Tiang gen ngasihin dengan saq ngasihin Tiang, dait Tiang éndah gen ngasihin dengan nike, dait nyatayang diriq Tiang léq ie.”

²² Yudas (saq ndéqne Iskariot) metakén léq Deside Isa, “Junjungan Saq Mulie, kembéq Pelungguh kayun nyatayang diriq tipaq tiang pade dait nénten tipaq dunie?”

²³ Jawab Deside Isa, “Dengan saq ngasihin Tiang, gen turut manik Tiang. Bapa Tiang gen ngasihin ie. Bapa dait Tiang gen rauh tipaq ie dait ndot bareng ie.

²⁴ Dengan saq ndéq ngasihin Tiang, ndéq turut manik Tiang. Manik saq side pade dengah nike, ndéq léman Tiang, laguq léman Bapa saq ngutus Tiang.

²⁵ Selapuqne nike Tiang sampéang léq side semasih Tiang araq bareng kance side pade.

²⁶ Laguq Roh Suci, Penulung saq gen teutus Bapa kadu aran Tiang, Ie saq gen ngajah side pade selapuqne dait ngingetang side pade léq napi saq sampun Tiang sampéang tipaq side pade.

²⁷ Damé sejahtere Tiang adéqang umaq side pade. Damé sejahtere Tiang, Tiang béng léq side pade, dait napi saq Tiang béng ndéq maraq saq tebéng siq dunie tipaq side. Ndaq osah dait takut.

²⁸ Side pade sampun dengahang Tiang bemanik, ‘Tiang gen lalo, laguq Tiang gen dateng malik ojok side.’ Lamun side pade ngasihin Tiang, side pade gen besukecite lantaran Tiang lalo tipaq Bapa, séngaq Bapa beléqan léman Tiang.

²⁹ Mangkin Tiang badaq hal nike léq side, sendéqman selapuqne telaksane, adéq lamun éraq hal nike telaksane, side pade gen percaye.

³⁰ Tiang ndéq gen badaq side padu luwéqan malik, séngaq sampun waktune penguase dunie niki dateng. Laguq ie ndéq bedowé kuase napi-napi léq diriq Tiang.

³¹ Timaqne maraq nike, adéq dunie niki nenaoq bahwe Tiang ngasihin Bapa, make Tiang ngelaksaneang selapuq saq tepréntahang siq Bapa tipaq Tiang. Pade ures, silaq ite lumbar léman deriki.”