WAHYU 9 - KITAB SUCI ZABUR INJIL

¹ Terus malaékat kelime niup terompétne, dait tiang serioq sopoq bintang geriq léman langit ojok gumi. Bintang nike teicanin kunci jurang maut.

² Make bintang nike bukaq jurang maut nike, terus sugul pendet léman dalemne maraq pendet léman keren saq beléq. Jelo dait awang-awang jari peteng siq pendet léman jurang nike.

³ Terus léman dalem pendet nike sugul balang-balang saq turun ojok gumi. Balang-balang nike teicanin kuase saq pade maraq saq teicanin tipaq teledu.

⁴ Ie pade tebalaq nyédaq pupaq, atao leloloan, atao tetaletan-tetaletan lainne. Ie pade cume kanggo nyerang dengan-dengan saq léq telakarne ndéq araq tande ségel léman Allah.

⁵ Balang-balang nike ndéq teijinang nyematéq dengan-dengan nike, laguq cume nyiksaq ie pade sengonéq lime bulan. Sakit lantaran siksaqan balang-balang nike pade maraq sakitne tesenget siq teledu.

⁶ Sengonéq lime bulan nike, dengan-dengan nike berusahe adéqne iniq ninggal, laguq ie pade ndéq iniq ninggal; ie pade melét ninggal, laguq maut jaoq léman ie pade.

⁷ Rue balang nike maraq jaran saq siep lalo perang. Léq otak balang-balang nike araq penggitan maraq rue mahkote emas. Mue balang-balang nike pade maraq mue manusie.

⁸ Bulu balang-balang nike maraq bulu dengan nine, dait gigine pade maraq gigi singe.

⁹ Dade balang-balang nike maraq tetutup siq kelambi besi. Suare kelétékne pade maraq suare pasukan keréte-keréte jaran saq luwéq saq kenyeke nyerbu perang.

¹⁰ Ie pade bedowé élong dait senget maraq teledu. Dait léq dalem élongne nike araq kekuatan jari nyiksaq manusie sengonéq lime bulan.

¹¹ Ie pade bedowé raje saq mréntah ie pade, dait raje nike malaékat jurang maut. Dalem base Ibrani aranne Abadon; dait dalem base Yunani Apolion (saq artine “Penyédaq”).

¹² Celake saq penembéq sampun liwat. Sesampun nike araq due celake malik saq gen dateng.

¹³ Beterus malaékat saq keenem niup terompétne. Make tiang dengah suare dateng léman keempat bucu méje taoq kurban saq tepiaq léman emas saq araq léq arepan Allah.

¹⁴ Suare nike bemanik tipaq malaékat saq keenem nike, “Lepas keempat malaékat saq tetaliq léq dékét Kokoq Eprat, kokoq saq beléq nike!”

¹⁵ Keempat malaékat nike telepas. Ie pade sampun tesiepang husus umaq jam, jelo, bulan, dait taun nike jari nyematéq sepertelu léman selapuq umat manusie.

¹⁶ Tiang dengah bahwe jumlah pasukan-pasukan saq kadu jaran nike araq satak jute luwéqne.

¹⁷ Dait dalem penyerioqan tiang, tiang serioq jaran-jaran nike dait penunggang-penunggangne. Penunggang-penunggangne kadu kelambi besi saq bewarne béaq toaq dait biru maraq batu nilam, dait kuning maraq urirang. Otak jaran-jaran nike maraq otak singe, dait léman biwihne sugul api, pendet, dait urirang.

¹⁸ Sepertelu léman umat manusie ninggal siq telu bencane nike; api, pendet, dait urirang saq sugul léman biwih jaran-jaran nike.

¹⁹ Kekuatan jaran-jaran nike araq léq biwihne dait léq élongne éndah. Élong-élongne maraq ulah saq bedowé otak. Siq élongne nike, jaran-jaran nike nyiksaq manusie.

²⁰ Laguq sise umat manusie saq ndéq ninggal siq bencane-bencane nike ndéqne tobat léman perbuatanne mésaq. Ie pade ndéq mélé engkah nyembah roh-roh jahat dait berhale-berhale emas, perak, tembage, batu dait kayuq saq ndéq iniq gitaq atao dengah atao lampaq.

²¹ Ie pade éndah ndéq mélé tobat léman perbuatan-perbuatan nyematéq dengan, ilmu-ilmu séhér, gawéq perbuatan saq cabul dait memaling.