WAHYU 8 - KITAB SUCI ZABUR INJIL

Ségel saq kepituq

¹ Sewaktu Anak Dombe nike bukaq ségel saq kepituq, sorge jari sepi kire-kire setenge jam ngonéqne.

² Terus tiang serioq kepituq malaékat saq nganjeng léq arepan Allah, dait ie pade teicanin pituq terompét.

³ Sopoq malaékat saq lain, saq jauq sopoq tangkaq dupe emas, rauh dait nganjeng léq julu méje taoq kurban. Ie teicanin menyan luwéq gati jari teaturang bareng-bareng kance do'e selapuq dengan saq tehususang bagi Allah léq atas méje taoq kurban saq tepiaq léman emas léq arepan tahte nike.

⁴ Bareng kance do'e dengan-dengan saq tehususang bagi Allah, pendet dupe saq kenyeke nyale nike nyempuq taék léman ime malaékat saq nganjeng léq arepan Allah nike.

⁵ Beterus malaékat nike bait tangkaq dupe nike, dait isiqne siq api léman méje taoq kurban, terus timpohne ojok gumi. Make kedengahan suare guntur kance kisap dait araq lindur.

Terompét-terompét

⁶ Sesampun nike, pituq malaékat saq negel pituq terompét nike sampun siep gen niup terompétne.

⁷ Malaékat penembéq niup terompétne, make ujan és dait api becampur daraq, selapuqne geriq ojok gumi. Sepertelu gumi bis julat; maraq nike éndah sepertelu léman leloloan, dait selapuq pupaq saq ijo.

⁸ Terus malaékat saq kedue niup terompétne, terus araq penggitan maraq ruen sopoq gunung beléq saq kenyeke nyale tesaut ojok dalem segare. Sepertelu segare berobah jari daraq,

⁹ dait sepertelu léman selapuq mahluk léq segare maté; maraq nike éndah sepertelu léman kapal-kapal musnah.

¹⁰ Beterus malaékat saq ketelu niup terompétne, make sopoq bintang saq beléq, saq nyale maraq obor, geriq léman langit, terus nimpe sepertelu léman kokoq-kokoq dait pengembulan-pengembulan aiq.

¹¹ (Aran bintang nike “Apsintus”.) Make sepertelu léman aiq jari pait, dait luwéq dengan ninggal séngaq nginem aiq saq sampun jari pait nike.

¹² Terus malaékat keempat niup terompétne. Make suare terompét nike ngempuk sepertelu léman cahaye jelo, sepertelu léman bulan, dait sepertelu léman bintang-bintang sehingge sepertelu léman selapuqne nike jari peteng. Sepertelu léman kenjelo ndéq terang malik dait maraq nike éndah sepertelu léman kelem.

¹³ Beterus tiang serioq dait dengah sopoq kedit rajewali saq kenyeke kesur léq atas langit, bekuih, “Celake! Celake! Celake selapuq dengan léq gumi lamun kedengahan suare ketelu terompét lainne saq gen tetiup siq ketelu malaékat saq lain!”