WAHYU 7 - KITAB SUCI ZABUR INJIL

Satus petang dase empat iyu dengan léman umat Israel

¹ Sesampun nike, tiang serioq empat malaékat nganjeng léq keempat penjuru gumi. Ie pade nahen keempat angin léq gumi adéq ndéq araq angin saq betiup léq darat atao léq segare, atao léq leloloan.

² Terus tiang serioq sopoq malaékat saq lain sugul léman timuq. Ie jauq ségel léman Allah saq idup. Siq suare saq beléq malaékat nike bekuih tipaq keempat malaékat saq sampun mauq kuase léman Allah jari nyédaq gumi dait segare.

³ Malaékat nike bebase, “Ndaq nyédaq gumi atao segare, atao leloloan lamun tiang pade ndéqman ngebéng tande ségel léq telakar hambe-hambe Allahte.”

⁴ Beterus tiang dengah bahwe araq satus petang dase empat iyu dengan saq tebéng tande ségel léman Allah léq telakar ie pade. Dengan-dengan nike tebait léman kedue olas suku bangse Israel.

⁵ Léman suku Yehuda dueolas iyu, léman suku Ruben dueolas iyu, léman suku Gat dueolas iyu,

⁶ léman suku Asyer dueolas iyu, léman suku Naptali dueolas iyu, léman suku Manasye dueolas iyu,

⁷ léman suku Simeon dueolas iyu, léman suku Lewi dueolas iyu, léman suku Isakar dueolas iyu,

⁸ léman suku Zebulon dueolas iyu, léman suku Yusup dueolas iyu, dait léman suku Benyamin dueolas iyu.

Kumpulan manusie saq luar biase luwéqne

⁹ Sesampun nike tiang serioq malik, terus penggitan kumpulan manusie saq luar biase luwéqne -- ndéq araq sopoq dengan juaq saq bau rékéng jumlahne. Ie pade dengan-dengan léman sebilang bangse, suku, kaum, dait base. Léq arepan tahte dait léq arepan Anak Dombe nike ie pade selapuq nganjeng kadu jubah putéq dait negel pémpang-pémpang lolo palem léq imene.

¹⁰ Terus siq suare saq beléq ie pade bekuih, “Keselametante datengne léman Allahte, saq melinggih léq atas tahte, dait léman Anak Dombe nike!”

¹¹ Selapuq malaékat nganjeng ngiterin tahte dait pare pemimpin dait keempat mahluk nike. Malaékat-malaékat nike nyungkur léq arepan tahte terus nyembah Allah.

¹² Ie pade bebase, “Amin! Ya Tuhan tiang pade, bagi Deside selapuq pujian, kemuliean, hikmat, ucapan syukur, hormat, kuase, dait kekuatan jangke selaéq-laéqne! Amin!”

¹³ Salaq sopoq dengan léman pemimpin-pemimpin nike beketuan léq tiang, “Sai dengan-dengan saq bejubah putéq niki dait léman mbé ie pade dateng?”

¹⁴ “Mindah tiang, tuan. Pelungguh mésaq saq wikan,” jawab tiang. Make ie bebase léq tiang, “Niki dengan-dengan saq sampun selamet léman mase penganiayean saq beléq. Ie pade sampun popoq jubah ie pade dait tejariang putéq kadu daraq Anak Dombe nike.

¹⁵ Keranaq nike ie pade nganjeng léq arepan tahte Allah, dait beribadah tipaq Ie peteng menah léq dalem Gedéng Suci Allah. Dait Ie saq melinggih léq atas tahte nike gen ngelindungin ie pade siq kémah-Ne.

¹⁶ Ie pade ndéq malik gen beridap lapah, atao bedak; jelo atao panas jelo ndéq malik gen nimpe ie pade,

¹⁷ séngaq Anak Dombe saq melinggih léq tengaq-tengaq tahte nike gen jari pengarat ie pade. Ie gen jauq ie pade ojok embulan aiq kehidupan. Dait Allah gen usap selapuq aiq penenteng léman penenteng ie pade.”