WAHYU 4 - KITAB SUCI ZABUR INJIL

Penyembahan léq sorge

¹ Sesampun nike tiang mauq penyerioqan malik. Tiang serioq sopoq lawang kebukaq léq sorge. Beterus kedengahan malik suare saq penembéq sampun bebase tipaq tiang maraq suare terompét. Basen suare nike, “Silaq taék ojok deriki. Tiang gen petitoqang side napi saq gen telaksane éraq.”

² Langsung tiang tekuasein siq Roh Allah. Terus tiang serioq araq sopoq tahte léq sorge, dait araq sopoq dengan melinggih léq tahte nike.

³ Penjarupan Dengan nike besinar maraq permate baiduri pandan dait permate jeliman. Sopoq sabuk bidedari saq bewarne zamrud lingkerin tahte nike.

⁴ Léq sekelining tahte nike araq empat likur tahte saq lain. Léq derike melinggih empat likur pemimpin saq bekelambi putéq, dait kadu mahkote emas.

⁵ Léman tahte nike sugul cahaye kisap dait suare guntur saq beléq. Dait léq arepan tahte nike araq pituq obor saq nyale; nike kepituq Roh Allah.

⁶ Dait léq arepan tahte nike éndah araq sopoq saq penggitan maraq segare kace, menéng maraq kristal. Léq tengaq-tengaq tahte, léq sebilang sedine, araq empat mahluk, saq bagian julu dait bagian mudine penoq siq mate.

⁷ Mahluk saq penembéq penggitan maraq singe. Saq kedue, maraq anak sampi mame. Saq ketelu bedowé mue maraq muen manusie. Saq keempat, penggitan maraq kedit rajewali saq kenyeke kesur.

⁸ Keempat mahluk nike, sopoq-sopoq bedowé enem keléték, sekeliningne dait léq bagian dalemne penoq siq mate. Peteng menah mahluk-mahluk nike ndéq engkah-engkah bekuih, “Suci, suci, suci, Allah, Tuhan Saq Mahekuase; saq araq, saq sampun araq, dait saq araq selaéqne.”

⁹ Keempat mahluk nike nyanyiang lagu-lagu pujian, hormat dait syukur tipaq Ie saq melinggih léq tahte nike, Ie saq idup selaéq-laéqne. Dait sewaktu mahluk-mahluk nike benyanyi,

¹⁰ keempat likur pemimpin nike nyungkur léq arepan Dengan saq melinggih léq tahte nike, terus nyembah Ie saq idup selaéq-laéqne. Beterus ie pade timpoh mahkote-mahkote ie pade léq arepan tahte nike, dait matur,

¹¹ “Ya Allah, Ya Tuhan tiang pade! Deside doang saq patut nerimaq pujian, hormat dait kuase. Séngaq Deside saq cipteang selapuq-lapuqne, dait siq pekayunan Deside éndah selapuqne nike sampun araq dait tecipteang.”