WAHYU 21 - KITAB SUCI ZABUR INJIL

Langit baru dait gumi baru

¹ Terus tiang serioq langit saq baru dait gumi saq baru, séngaq langit saq penembéq dait gumi saq penembéq éndah sampun telang, dait segare éndah ndéq araq malik.

² Make tiang serioq kote suci nike, nike Yerusalem saq baru, turun léman sorge, léman Allah. Kote nike sampun tesiepang maraq sopoq pengantén nine saq tepayas jari bedait kance pengantén mame.

³ Terus tiang dengah suare saq beléq léman tahte nike, “Mangkin kémah Allah araq léq tengaq-tengaq manusie! Ie gen idup kance ie pade, dait ie pade gen jari umat-Ne. Allah mésaq gen araq kance ie pade dait jari Allah ie pade.

⁴ Ie gen usap selapuq aiq penenteng léman penenteng ie pade. Kematéan ndéq gen araq malik; kesedihan, tangisan, atao kesakitan gen ndéq araq éndah. Hal-hal saq laéq sampun musnah.”

⁵ Terus Ie saq melinggih léq atas tahte nike bemanik, “Mangkin Tiang jariang selapuqne baru!” Ie bemanik éndah léq tiang, “Tulis niki, séngaq selapuq manik niki kenaq dait bau tepercaye.”

⁶ Beterus manik-Ne, “Sampun selesé! Tiang niki saq penembéq dait saq penutuq; Tiang Tuhan léman Penembéq jangke Penutuq. Sebilang dengan saq bedak, gen Tiang béng nginem secare cume-cume léman pengembulan aiq kehidupan.

⁷ Dengan-dengan saq menang gen nerimaq hal-hal nike léman Tiang. Tiang gen jari Allahne, dait ie jari bije Tiang.

⁸ Laguq dengan penakut, dengan saq ndéq percaye, dengan bejat, tukang nyematéq, dengan saq gawéq perbuatan cabul, tukang-tukang séhér, penyembah berhale, dait selapuq penduste, gen tetetéh ojok dalem segare api dait urirang saq nyale, nike kematéan saq kedue.”

Yerusalem baru

⁹ Sopoq léq antare kepituq malaékat saq sampun negel cawan-cawan saq penoq siq kepituq bencane penutuq nike, dateng ojok tiang dait bebase, “Silaq! Gen tiang petitoqang side pengantén nine, nike pengantén-Ne Anak Dombe.”

¹⁰ Make Roh Allah nguasein tiang, dait malaékat nike jauq tiang ojok pucuk gunung saq beléq dait atas gati. Ie metitoqang tiang Yerusalem, kote suci nike, saq turun léman sorge, léman Allah.

¹¹ Kote nike penoq siq kemuliean Allah dait cahayene pade maraq permate saq paling solah, maraq batu baiduri pandan saq menéng maraq kristal.

¹² Tembok penyengkerne atas gati, bedowé due olas jebak beléq, dait tejagaq siq due olas malaékat. Léq jebak-jebak beléqne tetulis aran-aran kedue olas suku bangse Israel.

¹³ Léq sedi timuq araq telu jebak beléq, léq sedi daye telu jebak beléq, léq sedi lauq telu jebak beléq dait léq sedi bat telu jebak beléq.

¹⁴ Tembok kote nike tepiaq léq atas due olas batu dasar. Léq atas batu-batu dasar nike tetulis aran-aran kedue olas rasul Anak Dombe nike.

¹⁵ Malaékat saq bebaos kance tiang nike bedowé tunjang pengukur léman emas, jari ngukur kote nike, jebak-jebak beléqne dait tembokne.

¹⁶ Kote nike ruene maraq persegi empat -- bélone pade kance gamberne. Make malaékat nike ngukur kote nike kadu tunjang pengukurne; bélone due iyu samas kilométer; gamber dait atasne pade maraq bélone.

¹⁷ Waktu malaékat nike ngukur tembokne, ternyate atas tembok nike enem dase méter. Ukuran saq tekadu siq malaékat nike maraq ukuran saq tekadu siq manusie.

¹⁸ Tembok kote nike tepiaq léman batu baiduri pandan, dait kotene léman emas tulén, menéng maraq kace.

¹⁹ Batu-batu dasar kote nike terias siq segale macem batu permate. Batu dasar saq penembéq tepiaq léman batu baiduri pandan, saq kedue léman batu nilam, ketelu léman batu yakut, keempat léman batu zamrud,

²⁰ kelime léman batu baiduri sepah, keenem léman batu jeliman, kepituq léman batu ratne cempake, kebaluq léman batu pirus, kesiwaq léman batu topas, kesepulu léman batu krisopras, kesolas léman batu lazuardi, dait saq kedue olas léman batu kecubung.

²¹ Kedue olas jebak beléqne tepiaq léman due olas mutiare, sopoq-sopoq lawang tepiaq léman sopoq mutiare. Langan léq kote nike tepiaq léman emas tulén, menéng maraq kace.

²² Tiang ndéq serioq Gedéng Suci Allah léq dalem kote nike, séngaq Gedéng Sucine nike Allah mésaq, nike Tuhan Saq Mahekuase, dait Anak Dombe nike.

²³ Kote nike ndéq perlu temenahin siq jelo atao bulan, séngaq ie temenahin siq kemuliean Allah, dait Anak Dombe nike dilahne.

²⁴ Bangse-bangse léq dunie gen lampaq léq dalem cahayene, dait raje-raje éndah gen jauq kesugihan ie pade ojok dalem kote nike.

²⁵ Jebak-jebak beléq kote nike gen tebukaq sejeloan; séngaq ndéq araq kelem léq derike.

²⁶ Kemuliean dait kesugihan bangse-bangse gen tejauq ojok dalem kote nike.

²⁷ Laguq dengan saq ngelaksaneang hal-hal saq ékék, atao dengan saq beduste -- tetu-tetu ndéq gen tame ojok dalemne. Saq gen tame cume dengan saq aranne tetulis léq dalem kitab kehidupan, kitab Anak Dombe nike.