WAHYU 20 - KITAB SUCI ZABUR INJIL

Waktu siyu taun

¹ Sesampun nike tiang serioq sopoq malaékat turun léman sorge. Léq imene ie negel kunci jurang maut dait sopoq ranté saq beléq.

² Terus ie bau nage, ulah toaq nike, -- nike Belis dait Sétan nike -- dait sékoqne siyu taun ngonéqne.

³ Beterus malaékat nike tetéh nage nike ojok dalem jurang maut, dait lentingne jurang nike dait teségel, adéq nage nike ndéq bau malik nyesatang bangse-bangse sendéqman tutuq waktu saq siyu taun nike. Sesampun nike ie harus telepas, laguq waktune singket.

⁴ Beterus tiang serioq tahte-tahte, dait dengan-dengan saq tokol léq tahte-tahte nike teicanin kuase jari mutusang hukuman. Tiang serioq éndah jiwe-jiwe dengan-dengan saq sampun tepeleng belongne lantaran ie pade ngebéng kesaksian mengenai Deside Isa, dait nyampéang Manik Allah. Dengan-dengan nike ndéq nyembah binatang, atao tetatone. Ie pade ndéq uwah nerimaq tande binatang nike léq telakar dait léq ime ie pade. Make ie pade idup malik dait mréntah jari raje bareng Almasih siyu taun ngonéqne.

⁵ Niki penembéqne dengan-dengan ninggal teidupang malik. (Laguq dengan-dengan ninggal saq lainne ndéqman teidupang léq waktu saq siyu taun nike.)

⁶ Bahagie dengan-dengan saq milu teidupang malik léq waktu saq penembéq nike. Ie pade patut jari dowén Allah. Kematéan saq kedue ndéq bekuase malik léq ie pade. Ie pade gen jari imam-imam Allah dait imam-imam Almasih; dait ie pade gen mréntah bareng Almasih siyu taun ngonéqne.

Belis tekalahang

⁷ Sesampun tutuq waktu saq siyu taun nike, Belis gen telepas léman bui,

⁸ dait ie gen lalo nyesatang bangse-bangse saq nyebar léq seantéro gumi, nike Gog dait Magoq, dait ngumpulang ie pade jari perang dait jumlah ie pade luwéq gati, maraq gerés léq segare.

⁹ Beterus ie pade bepencar-pencar ojok seantéro gumi, terus ngepung kémah dengan-dengan saq tehususang bagi Allah dait kote saq tetunah siq Allah. Laguq api turun léman langit dait musnahang ie pade.

¹⁰ Beterus Belis saq nyesatang ie pade nike, tesaut ojok segare api dait urirang. Léq derike taoqne binatang dait nabi palsu nike tetetéh, dait ie pade gen tesiksaq kenjelo kekelem jangke selaéq-laéqne.

Hukuman saq penutuq

¹¹ Sesampun nike tiang serioq sopoq tahte putéq saq beléq dait Ie saq melinggih léq atasne. Langit dait gumi musnah léman arepan-Ne, sehingge ndéq penggitan malik.

¹² Dait tiang serioq dengan-dengan ninggal, beléq dait kodéq, nganjeng léq arepan tahte nike. Make kitab-kitab tebukaq. Terus sopoq kitab saq lain tebukaq éndah, nike kitab kehidupan. Beterus hukuman tetimpeang tipaq dengan-dengan saq ninggal, setimpal kance perbuatan ie pade maraq saq tecatet léq dalem kitab-kitab nike.

¹³ Beterus segare nyerahang dengan-dengan ninggal saq araq léq dalemne. Maut dait Alam Maut éndah nyerahang dengan-dengan ninggal saq araq léq ie. Dait dengan-dengan ninggal nike selapuqne tehukum siq hukuman saq setimpal kance perbuatan ie pade.

¹⁴ Beterus Maut dait Alam Maut nike tetetéh ojok segare api. (Segare api niki kematéan saq kedue.)

¹⁵ Dengan-dengan saq aranne ndéq tetulis léq kitab kehidupan, tetetéh ojok dalem segare api.